ବରଗଡ଼ ଅଫିସ୍,୨୭।୪: ଅଧିକ ଧାନ ଉତ୍ପାଦନ ଯୋଗୁ ବରଗଡ଼ ଜିଲାକୁ ରାଜ୍ୟର ଭାତହାଣ୍ଡି କୁହାଯାଏ। ମାତ୍ର ଜିଲାରେ ଚାଷ, ଚାଷୀ ସମସ୍ୟା ଅସମାହିତ ହୋଇପଡ଼ିଛି। କେତେବେଳେ ଅନାବୃଷ୍ଟି କିମ୍ବା ସ୍ବଳ୍ପ ବୃଷ୍ଟିପାତ ଯୋଗୁ ମରୁଡ଼ି ତ ଆଉ କେବେ ଫସଲରେ ରୋଗପୋକ ଉପଦ୍ରବ ଯୋଗୁ ଚାଷୀଙ୍କୁ ବହୁ କ୍ଷତି ସହିବାକୁ ପଡୁଛି। ଗତ ୪ଦିନ ମଧ୍ୟରେ ୨ଦିନ ଜିଲାରେ କରାମାଡ଼ ଚାଷୀଙ୍କ ଆର୍ଥିକ ମେରୁଦଣ୍ଡକୁ ଦୋହଲାଇ ଦେଇଛି। କରାମାଡ଼ ପ୍ରଭାବରୁ ଅମଳକ୍ଷମ ଅବସ୍ଥାରେ ରହିଥିବା ଧାନ ନଷ୍ଟ ହୋଇଯାଇଛି। ଏହାକୁ ନେଇ ଜିଲାର ଚାଷୀମାନେ ଚିନ୍ତିତ ହୋଇ ପଡ଼ିଥିବାବେଳେ କ୍ଷତିପୂରଣ ସହାୟତା ଦାବି କରିଛନ୍ତି। ଏହି ଦାବି ନେଇ ବୁଧବାର ଜିଲା ଭଟଲି ବ୍ଲକ ଅନ୍ତର୍ଗତ କମଗାଁ ପଞ୍ଚାୟତର କ୍ଷତିଗ୍ରସ୍ତ ଚାଷୀ ଜିଲାପାଳ ମୋନିଷା ବାନାର୍ଜୀ ଏବଂ ଜିଲା ମୁଖ୍ୟ କୃଷି ଅଧିକାରୀ ଅଶୋକ କୁମାର ଅମାତଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି। ଜିଲାପାଳ ବାନାର୍ଜୀଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଧା ଟପ୍ପୋ ସ୍ମାରକପତ୍ର ଗ୍ରହଣ କରିଥିଲେ। କ୍ଷତିପୂରଣ ସହାୟତା ନ ମିଳିଲେ ଚାଷୀମାନେ ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହେବେ ବୋଲି ଚେତାବନୀ ଦେଇଛନ୍ତି ।
ଜିଲାରେ ଧାନ ଫସଲ ଅମଳକ୍ଷମ ଅବସ୍ଥାକୁ ଆସିଯାଇଛି । ଆସନ୍ତା ମେ ୬ତାରିଖରୁ ଜିଲାର ଅତାବିରା ନିୟନ୍ତ୍ରିତ ବଜାର କମିଟି ଅଧିନ ମଣ୍ଡିଗୁଡ଼ିକରୁ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ। ଅମଳର ଅବ୍ୟବହିତ ପୂର୍ବରୁ କ୍ରମାଗତ କରାମାଡ଼ ହେବା ଯୋଗୁ ଧାନ ଫସଲ ଯଥେଷ୍ଟ ପ୍ରଭାବିତ ହୋଇଛି। କେଣ୍ଡାରୁ ଧାନ ଝଡ଼ି ଜମିରେ ପଡ଼ିଛି। ସେହିପରି କ୍ଷୀର ଢ଼ୋକୁଥିବା ଧାନକେଣ୍ଡା ମଧ୍ୟ ନଷ୍ଟ ହୋଇଯାଇଛି। ଗତ ୨୨ତାରିଖ ସନ୍ଧ୍ୟାରେ ଜିଲାର ଅତାବିରା, ବରଗଡ଼, ବରପାଲି, ବିଜେପୁର ବ୍ଲକର ବିଭିନ୍ନ ଗ୍ରାମରେ କରାମାଡ଼ ହୋଇଥିବା ଧାନ ଫସଲ ପ୍ରଭାବିତ ହୋଇଥିଲା। ସେହି ଫସଲକ୍ଷତିର କ୍ଷୟକ୍ଷତି ଆକଳନ ନ ସରୁଣୁ ମଙ୍ଗଳବାର ସନ୍ଧ୍ୟାରେ ଜିଲାର ବରଗଡ଼ ବ୍ଳକ ଅନ୍ତର୍ଗତ କଟାପାଲି, ଭଟଲି ବ୍ଲକ ଅନ୍ତର୍ଗତ କମଗାଁ ପଞ୍ଚାୟତ ସମେତ ବିଭିନ୍ନ ଅଞ୍ଚଳରେ ପୁଣି କରାମାଡ଼ ହୋଇଥିଲା। ୪ଦିନ ମଧ୍ୟରେ ୨ଥର କରାମାଡ଼ ଚାଷୀଙ୍କ ଧାନ ଫସଲକୁ ଧୂଳିସାତ୍ କରିଦେଇଛି। କମଗାଁ ପଞ୍ଚାୟତ ଜଡ଼ା ଗ୍ରାମର ଜଣେ ଚାଷୀ ଦୁଷ୍ମନ୍ତ ମହାପାତ୍ର କହିଛନ୍ତି, ଅନ୍ତପାଲି, ଜଡ଼ା, କର୍ଲାଜୁରୀ, ରୁଷିପାଲି, ଜାମବାହାଲି, କମଗାଁ, ଜାମବାହାଲି ଆଦି ଗ୍ରାମରେ କରାମାଡ଼ ଯୋଗୁ ପ୍ରାୟ ୯୦ପ୍ରତିଶତ ଧାନ ଫସଲ ନଷ୍ଟ ହୋଇ ଯାଇଛି। କମଗାଁ ପଞ୍ଚାୟତର ଚାଷୀମାନେ ସବୁଥର ବୀମା ପ୍ରିମିୟମ ଭରୁଛନ୍ତି, ହେଲେ କେବେ ବୀମା କ୍ଷତିପୂରଣ ପାଉନାହାନ୍ତି । କିନ୍ତୁ ଏଭଳି ସ୍ଥଳେ ସରକାର କ୍ଷତିପୂରଣ ନଦେଲେ ପଞ୍ଚାୟତବାସୀ ରାସ୍ତାକୁ ଓହ୍ଲାଇବେ ବୋଲି ସେ କହିଛନ୍ତି। ସେହିପରି କମଗାଁ ଗ୍ରାମର ଅନ୍ୟଜଣେ ଚାଷୀ ରବି ନାରାୟଣ ଭୋଇ କହିଛନ୍ତି, ପ୍ରଶାସନ ସଠିକ୍ଭାବେ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେଉ, ନଚେତ୍ ଚାଷୀମାନେ ବହୁତ ଅସୁବିଧାର ସମ୍ମୁଖୀନ ହେବେ। ଏ ନେଇ ମୁଖ୍ୟ ଜିଲା କୃଷି ଅଧିକାରୀ ଅଶୋକ କୁମାର ଅମାତ କହିଛନ୍ତି, କରାମାଡ଼ରେ ପ୍ରଭାବିତ ଅଞ୍ଚଳର କ୍ଷୟକ୍ଷତି ଆକଳନ କରାଯାଉଛି। ଆକଳନ ଚୂଡ଼ାନ୍ତ ହେଲେ ତାହା ଜିଲାପାଳଙ୍କ ଜରିଆରେ ରାଜ୍ୟ ସରକାରଙ୍କ ପାଖକୁ ପଠାଇ ଦିଆଯିବ।