ଭୁବନେଶ୍ୱର,୭ା୧(ସୂର୍ଯ୍ୟକାନ୍ତ ବେହେରା):ନାବାଳିକା ଝିଅଙ୍କୁ ବଳାତ୍କାର କରିବା ଅଭିଯୋଗରେ ଜଣେ ଅଭିଯୁକ୍ତ ବାପାଙ୍କୁ ଭୁବନେଶ୍ୱର ଅତିରିକ୍ତ ଜିଲା ଦୌରାଜଜ ତଥା ଫାଷ୍ଟଟ୍ରାକ ସ୍ପେଶାଲ କୋର୍ଟ (ପୋକ୍ସୋ-୧) ସୋମବାର ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତ ସକିଲା ଟୁଡୁଙ୍କ ଘର ମୟୂରଭଞ୍ଜ ଜିଲାରେ ହୋଇଥିବାବେଳେ ସେ ଭୁବନେଶ୍ୱର ଶହୀଦନଗର ଅଞ୍ଚଳରେ ଥିବା ଏକ ବସ୍ତିରେ ରହୁଥିଲେ। ବିଚାରପତି ସରୋଜ କୁମାର ସାହୁ ମାମଲାର ଶୁଣାଣି ସମୟରେ ସରକାରଙ୍କ ପକ୍ଷରୁ ୨୩ ଏବଂ ଅଭିଯୁକ୍ତଙ୍କ ପକ୍ଷରୁ ୪ ଜଣ ସାକ୍ଷୀଙ୍କ ବୟାନ ଓ ୨୬ ଦସ୍ତାବିଜକୁ ଆଧାର କରି ଏହି ରାୟ ଶୁଣାଇଛନ୍ତି।
ପ୍ରାପ୍ତସୂଚନା ଅନୁଯାୟୀ, ଅଭିଯୁକ୍ତ ସକିଲା ପୀଡ଼ିତାଙ୍କ ବାପା। ସେ ପୀଡ଼ିତାଙ୍କ ଇଚ୍ଛା ବିରୋଧରେ ତାଙ୍କୁ ୪ ମାସ ଧରି ତାଙ୍କ ସହ ଜୋରଜବଦସ୍ତି ବଳାତ୍କାର କରୁଥିଲେ। ଏନେଇ କାହାକୁ କହିଲେ ଜୀବନରୁ ମାରି ଦେବାକୁ ଧମକ ଦେଇ ଆସୁଥିଲେ। ଶେଷରେ ଅଭିଯୁକ୍ତ ବାପା ସକିଲା ନିଜ ଝିଅକୁ ବିବାହ କରିବାକୁ ଜିଦ୍ ଧରିବାରୁ ଏନେଇ ଝିଅ ମା’ଙ୍କୁ ଜଣାଇଥିଲେ। ପୀଡ଼ିତାଙ୍କ ମା’ ଏନେଇ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରିବା ସହ ୨୦୨୧ ଏପ୍ରିଲ ୯ ତାରିଖରେ ଅଭିଯୁକ୍ତଙ୍କୁ ଗିରଫ କରିଥିଲା। ତେବେ ମାମଲାର ବିଚାରପ୍ରକ୍ରିୟା ଚାଲୁଥିବାବେଳେ ପୀଡ଼ିତା ନାବାଳିକା ଜଣଙ୍କ ଲୋକଲଜ୍ଜା ଭୟରେ ଆତ୍ମହତ୍ୟା କରିଥିଲେ, ଯାହା ଫଳରେ ମାମଲାର ଗୁରୁତ୍ୱ ବଢ଼ି ଯାଇଥିଲା। ଏହି ମାମଲାକୁ ସରକାରଙ୍କ ପକ୍ଷରୁ ସ୍ପେଶାଲ ପିପି ରାଜୀବ ସାସ୍ମଲ ଓ ଅତିରିକ୍ତ ପିପି ବଳରାମ ଦେଓ ପରିଚାଳନା କରୁଥିଲେ।
