ପେଟ୍ରୋଲରେ ପୋଡି ହୋଇ ବିବାହିତ ମହିଳାଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ, ହତ୍ୟା ଅଭିଯୋଗ ଆଣିଲେ ବାପା
8:33 pmJuly 25, 2023July 25, 2023 / 08

କୋକସରା,୨୫।୭(ଦୁଷ୍ମନ୍ତ କୁମାର ପାଟ୍ଟଯୋଷୀ)ଜଣେ ବିବାହିତା ମହିଳାଙ୍କୁ ତାଙ୍କ ସ୍ବାମୀ, ଶାଶୁ ଓ ବଡ଼ ଯାଆ ନିର୍ଯାତନା ଓ ଶେଷରେ ପେଟ୍ରୋଲ ଢାଳି ମହିଳାଙ୍କୁ ପୋଡି ହତ୍ୟା କରିଥିବା ନେଇ ସଙ୍ଗିନ ଅଭିଯୋଗ ଆଣିିଛନ୍ତି ମୃତ ଝିଅଙ୍କର ବାପା। ସୂଚନା ମତେ କଳାହାଣ୍ଡି ଜିଲା କୋକସରା ଥାନା ଅନ୍ତର୍ଗତ ଜୟନ୍ତପୁର ଗ୍ରାମର ଦିପେନ ସାଗରଙ୍କ ଝିଅ ଉର୍ମିଳା ସାଗର(ପୂଜା)ର ବିବାହ ସାମାଜିକ ରୀତିନୀତି ଅନୁସାରେ ଗତ ୨୦୨୦ ମସିହା ମାର୍ଚ୍ଚ ମାସ ୨୦ ତାରିଖରେ ମାଝୀଗୁଡା ଗ୍ରାମର ବାଲେଶର ନାଗଙ୍କ ପୁଅ ଜୟନ୍ତ ନାଗଙ୍କ ସହିତ ହୋଇଥିଲା। ବିବାହର କିଛିମାସ ଦାମ୍ପତ୍ୟ ସଂସାର ହସଖୁସିରେ ଅତିବାହିତ ହେବାପରେ ଉର୍ମିଳାଙ୍କ ଜୀବନରେ ମାଡି ଆସିଥିଲା ନିର୍ଯାତନାର କଳାବାଦଲ। ଅନେକ ସମୟରେ ସ୍ବାମୀ ଜୟନ୍ତ, ଶାଶୁ ଚମ୍ପାବତୀ ନାଗ ଓ ବଡ଼ ଯାଆ କୁଲକି ନାଗ ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିବା ଅଭିଯୋଗ ହୋଇଛି। ଗତ ଜୁଲାଇ ୨୩ରେ ଉର୍ମିଳା ନିଜ ମାଆଙ୍କୁୁ ଫୋନ କରି ଜୀବନରେ ମାରିଦେବାକୁ ଧମକ ଦେଉଥିବା ଓ ମୋତେ ଶୀଘ୍ର ଆସି ନେଇଯାଅ ବୋଲିି ଫୋନ କରି କହିଥିବା ବେଳେ ସେହିଦିନ ସାରେ ଖବର ମିଳିଲା ଯେ ଝିଅ ପୋଡି ହୋଇ ଯାଇଛି ଓ କୋକସରା ଡାକ୍ତରଖାନାରେ ଭର୍ତ୍ତି ଅଛି। ଖବର ପାଇ ଝିଅର ବାପା ମା କୋକସରା ଡାକ୍ତରଖାନାରେ ପହଞ୍ଚିବା ପରେ ଝିଅର ଶରୀର ସମ୍ପୂର୍ଣ୍ଣ ପୋଡି ଯାଇ ଅତି ଜଟିଳ ଅବସ୍ଥାରେ ରହିଥିବା ବେଳେ ଡାକ୍ତର ପିଡୀତାଙ୍କୁ ଭବାନୀପାଟଣା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରିଥିଲେ । ହେଲେ ଅବସ୍ଥା ଅତି ସଙ୍କଟାପନ୍ନ ଥିବାରୁ ଭୁବନେଶ୍ୱର ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ୨୪ତାରିଖ ସା ୬ ଘଣ୍ଟା ସମୟରେରେ ଉର୍ମିଳାଙ୍କ ମୃତ୍ୟୁ ହୋଇଥିଲା। ଗତ ଜୁଲାଇ ୨୩ରେ ଝିଅକୁ ପେଟ୍ରୋଲ ଢାଳି ପୋଡି ମାରି ଦେବାକୁ ଉଦ୍ୟମ କରାଯାଇଥିବା ନେଇ ମହିଳାଙ୍କ ମା ଆଶା ସାଗର କୋକସରା ପୋଲିସରେ ଲିଖିତ ଅଭିଯୋଗ କରିଥିଲେ। ଘଟଣା ପରେ କୋକସରା ପୋଲିସ ତଦନ୍ତ ଆରମ୍ଭ କରିଥିବା ବେଳେ ଖବର ଲେଖାଯିବା ପର୍ଯ୍ୟନ୍ତ ଏହି ଘଟଣାରେ କାହାକୁ ଗିରଫ କରାଯାଇନାହିଁ। ଅନ୍ୟପଟେ ମୃତ ମହିଳାଙ୍କ ଶବ ଭୁବନେଶ୍ୱରରୁ ଆସୁଥିବା ଜଣାପଡିଛି। କୋକସରା ଥାନାରେ ଏନେଇ କେଶ ନମ୍ବର ୧୯୩/୨୩ ରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଥିବା ନେଇ ତଦନ୍ତକାରୀ ପୋଲିସ ଅଧିକାରୀ ସୂଚନା ଦେଇଛନ୍ତି।