ଲାଞ୍ଜିଗଡ଼,୨୯।୫(ଡି.ଏନ୍.ଏ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବସନ୍ତପଡା ପଞ୍ଚାୟତ ନିୟମଗିରି ପାହାଡର ପାଦ ଦେଶର ଥିବା ବସନ୍ତ ପଡା ଗ୍ରାମର ହାତୀ ଆକ୍ରମଣରେ ଜଣଙ୍କ ମୃତ୍ୟୁ ଘଟିଛି। ସେ ହେଲେ ବାଙ୍ଗରା ମାଝୀ(୫୭)। ସ୍ବର୍ଗତ ବାଙ୍ଗରା ରବିବାର ସାରେ ବସନ୍ତପଡା ଠାରୁ ପାହାଡିଆଚଲା ରାସ୍ତା ଦୁଇ କିମି ଦୂରରେ ଥିବା ନିକଟସ୍ଥ ଗାଁ ଡେଙ୍ଗସର୍ଗି ଝିଅ ଘରକୁ ଯାଉଥିଲେ। ହେଲେ ବାଙ୍ଗରା ରାତି ପର୍ଯ୍ୟନ୍ତ ଘରକୁ ନ ଫେରିବା ଯୋଗୁ ସ୍ତ୍ରୀ ଓ ବନ୍ଧୁବାନ୍ଧବ ଲୋକେ ମିଶି ପ୍ରଥମେ ନିଜ ଝିଅ ଘର ଡଙ୍ଗସର୍ଗି ଯାଇ ପଚାରି ଥିଲେ। ପରେ ଖୋଜାଖୋଜି କରିବା ପରେ ରାତିରେ ଡେଙ୍ଗସର୍ଗି ଗାଁ ନିକଟରେ ଥିବା ଆମ୍ବ ଗଛ ତଳେ ବାଙ୍ଗେରାଙ୍କୁ ହାତୀ ଆକ୍ରମଣ କରିଥିବା ଦେଖିବାକୁ ପାଇଥିଲେ। ଗଛ ତଳେ ବାଙ୍ଗରା ପିନ୍ଧିଥିବା ଲୁଙ୍ଗି, ଗାମୁଛା, ଧରିଥିବା ଝୁଲି ମୁଣା ଓ ଟାଙ୍ଗିଆ ପଡିଥିଲା। ବାଙ୍ଗରାକୁ ହାତୀ ଘୋଷାରି ଘୋଷାରି ମାଡି ଚକଟି ଶରୀରର ବିଭିନ୍ନ ଅଂଶ କ୍ଷତ ବିକ୍ଷତ କରିଛି। ଏ ନେଇ ପରିବାର ଲୋକେ ଲାଞ୍ଜିଗଡ଼ ବନ ବିଭାଗ କର୍ମଚାରୀଙ୍କୁ ଖବର ଦେଇଥିଲେ। ସେମାନେ ଖବରପାଇ ଘଟଣାସ୍ଥଳରେ ପହଞ୍ଚି ଥିଲେ। ବର୍ତ୍ତମାନ ବନ ବିଭାଗ ପକ୍ଷରୁ ଘଟଣାର ତଦନ୍ତ ଜାରି ରହିଛି।