ଛେଣ୍ଡିପଦା,୧୪ା୧୦(ସ୍ବ.ପ୍ର.): ବାପା ଚଳାଉଥିଲେ ଡାଲା ଅଟୋ। ପାଖରେ ବସିଥିଲେ ୮ ବର୍ଷର ଝିଅ। ହେଲେ ହମ୍ପ୍ସ୍ ନିକଟରେ ବାପା ବ୍ରେକ୍ ମାରିବାରୁ ଗାଡ଼ିରୁ ରାସ୍ତା ଉପରକୁ ଗଳିପଡ଼ିଥିଲେ ଝିଅ। ଏହି ସମୟରେ ଗାଡ଼ିଟି ତାଙ୍କ ଉପରେ ଚଢ଼ିଯାଇଥିଲା। ଗୁରୁତର ଅବସ୍ଥାରେ ଝିଅଙ୍କୁ ମେଡିକାଲରେ ଭର୍ତ୍ତି କରାଯାଇଛି। ଅନୁଗୋଳ ଜିଲା ଛେଣ୍ଡିପଦା ବ୍ଲକରେ ଗୁରୁବାର ଘଟିଛି ଏହି ଦୁର୍ଘଟଣା।
ସୂଚନା ଅନୁଯାୟୀ, ଛେଣ୍ତିପଦା ଥାନା କୁମ୍ଭାରସାହି ବିଦ୍ୟାଳୟରେ ପଢ଼ୁଥିବା ଝିଅ ରୋଜାଲିନ ସାହୁ (୮)ଙ୍କୁ ବାପା କୁମ୍ଭାରସାହିର ସୁନୀଲ ସାହୁ ଆଣିବାକୁ ଯାଇଥିଲେ। ସ୍କୁଲରୁ ଝିଅଙ୍କୁ ଆଣି ନିଜ ଡାଲା ଅଟୋରେ ବସାଇ ସୁନୀଲ ଥାନା ଛକ ଲକ୍ଷ୍ମୀପୂଜା କମିଟି ପକ୍ଷରୁ ପୂର୍ତ୍ତବିଭାଗ ଡାକ ବଙ୍ଗଳାଠାରେ ଦିଆଯାଉଥିବା ଅନ୍ନପ୍ରସାଦ ଖାଇବାକୁ ଯାଇଥିଲେ। ସେଠାରୁ ରୋଜାଲିନଙ୍କୁ ଧରି ସୁନୀଲ ଗାଡ଼ିରେ ଘରକୁ ଫେରୁଥିବା ବେଳେ ସ୍କୁଲ ନିକଟରେ ହମ୍ପ୍ସ୍ ଦେଖି ବ୍ରେକ୍ ମାରିଥିଲେ। ଏହି ସମୟରେ ଆଗରେ ବସିଥିବା ରୋଜାଲିନ ଅଟୋରୁ ଗଳି ପଡିବାରୁ ଗାଡ଼ିଟି ତାଙ୍କ ପେଟ ଉପରେ ଚଢି ଯାଇଥିଲା। ଗୁରୁତର ଅବସ୍ଥାରେ ରୋଜାଲିନଙ୍କୁ ଛେଣ୍ତିପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରୁ ତାଙ୍କୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
