କେନ୍ଦୁଝର,୨୯ା୧୧:ଓଡ଼ିଶାର ମୟୂରଭଞ୍ଜ ଜିଲାର କାଇଚଟଣି ସମେତ ଢେଙ୍କାନାଳ ଜିଲାର ମଗ୍ଜି ଲଡୁ ଓ କେନ୍ଦ୍ରାପଡ଼ା ଜିଲାର ରସାବଳି ତଥା ଅନ୍ୟ ତିନୋଟି ସାମଗ୍ରୀକୁ ମିଳିବ ଜିଆଇ (ଜିଓଗ୍ରାଫିକାଲ ଇଣ୍ଡିକେସନ) ଟ୍ୟାଗ୍। ଏ ନେଇ ଓୟୁଏଟି ପକ୍ଷରୁ ଆବେଦନକୁ ଗ୍ରହଣ କରି ବିସ୍ତୃତ ସମୀକ୍ଷା କରିବା ପାଇଁ ଆସନ୍ତା ଡିସେମ୍ବର ୬ ରେ ଜିଆଇ ପଞ୍ଜୀକରଣ ସଂସ୍ଥା, ଚେନ୍ନାଇ ପକ୍ଷରୁ ଏକ ଟିମ୍ ଓଡ଼ିଶା ଆସୁଛନ୍ତି। କାଇ ଚଟଣି ଆଦିବାସୀଙ୍କ ପ୍ରମୁଖ ଖାଦ୍ୟ ସହ ଜଡ଼ିତ ଥିବାରୁ ଏ ନେଇ ବନବାସୀଙ୍କ ମହଲରେ ଉତ୍ସାହ ଦେଖାଯାଇଛି।
ବା କୁରୁକୁଟିଚଟଣି ବିଶେଷତଃ ଆଦିବାସୀ ବହୁଳ କେନ୍ଦୁଝର ଓ ମୟୂରଭଞ୍ଜ ଜିଲାରେ ପ୍ରଚଳନ ଅଧିକ ରହିଛି। ଆଦିବାସୀଙ୍କ ପରମ୍ପରା ସହିତ ଏହା ବହୁ ଆଗରୁ ରହିଛି। ଏହାକୁ ଆଦିବାସୀମାନେ ବଣଜଙ୍ଗଲରୁ ସଂଗ୍ରହ କରି ଖାଇବା ସହ ବିକ୍ରି କରି ଚଳନ୍ତି। ବିଶେଷ କରି ବର୍ଷା ଓ ଶୀତଋତୁରେ ଏହା ଅଧିକ ମିଳିଥାଏ। ଏହି ଦିନରେ କାଇ ବା କୁରୁକୁଟିମାନେ ଜଙ୍ଗଲରେ ଶାଳ, କୁସୁମ ଆଦି ଗଛରେ ପତ୍ରକୁ ବାନ୍ଧି ଅଣ୍ଡା ଦେଇଥାନ୍ତି। ଅଣ୍ଡାକୁ ସ୍ଥାନୀୟ ଲୋକେ ଭାତ କୁହନ୍ତି। ବନବାସୀମାନେ ଉକ୍ତ ବସାକୁ ଆଣି ସେଥିରୁ ଅଣ୍ଡା ଓ କୁରୁକୁଟିକୁ ଅଲଗା କରି ରାନ୍ଧି ଖାଇଥାନ୍ତି। ବିଶେଷ କରି ସେଥିରେ ଲଙ୍କା, ଲୁଣ ମିଶାଇ ଚଟଣି କରି ଗରମ ବା ପଖାଳ ଭାତରେ ଖାଆନ୍ତି। ଆଜିକାଲି ଗ୍ରାମାଞ୍ଚଳ ତଥା ସହରାଞ୍ଚଳରେ ଏହାର ଚାହିଦା ରହିଛି। ଏଣୁ ରାସ୍ତାଘାଟରେ ଏହାକୁ ବିକ୍ରି କରି ଦୁଇ ପଇସା ରୋଜଗାର କରୁଛନ୍ତି। ଏଥିରେ ନିଆରା ସ୍ବାଦ ଥିବା ବେଳେ ଔଷଧୀୟ ଗୁଣ ଭରି ରହିଛି। ବିଶେଷ କରି ପେଟ ରୋଗ ପାଇଁ ଏହା ଉପାଦେୟ ବୋଲି ବୈଦ୍ୟ ବିଶାରଦ ହରେକୃଷ୍ଣ ମହାନ୍ତ କହିଛନ୍ତି। ଏହାକୁ ଏବେ ସବୁ ବର୍ଗର ଲୋକ ଖାଉଛନ୍ତି। ଏଣୁ ଏହାକୁ ଜିଆଇ ମାନ୍ୟତା ମିଳିଲେ ନିଶ୍ଚିତ ଭାବରେ ଅଞ୍ଚଳ ପାଇଁ ଖୁସିର ବିଷୟ ହେବ ବୋଲି ଗବେଷକ ଡ. କୃଷ୍ଣଚନ୍ଦ୍ର ନାୟକ କହିଛନ୍ତି। କାଇ ସଂଗ୍ରହକାରୀ ଗୋବିନ୍ଦ ମୁଣ୍ଡା କୁହନ୍ତି, ଏଥିରେ ବହୁତ ଔଷଧୀୟ ଗୁଣ ରହିଛି। ପିଲା ଦିନରୁ ଆମେ ଖାଇ ଆସୁଛୁ। ଏହା ସଂଗ୍ରହ କରିବା କଷ୍ଟକର। ସେମାନଙ୍କ ବସାକୁ ଭାଙ୍ଗିଲେ ସେମାନେ କାମୁଡ଼ିଥାନ୍ତି। ଅନେକ ସମୟରେ ଏହା ଦ୍ୱାରା ଅସୁସ୍ଥ ହୋଇପଡ଼ନ୍ତି ବୋଲି ସେ କହିଛନ୍ତି।
ନରେଶ ଚନ୍ଦ୍ର ପଟ୍ଟନାୟକ