ଭୁବନେଶ୍ୱର, ୬।୪(କ୍ରୀଡ଼ା ପ୍ରତିନିଧି)-ଉତ୍ତର ପ୍ରଦେଶର ଲକ୍ଷ୍ନୌସ୍ଥିତ ଇନ୍ଦିରା ଗାନ୍ଧି ପ୍ରତିଷ୍ଠାନରେ ଗତ ୩ ଓ ୪ ତାରିଖ ଦୁଇଦିନଧରି ଅନୁଷ୍ଠିତ ଜାତୀୟ ଫେଡେରେଶନ କପ୍ ସୁନ୍ଦରସ୍ବାସ୍ଥ୍ୟ ପ୍ରତିଯୋଗିତାରେ ଓଡ଼ିଶାର ରଶ୍ମିରଞ୍ଜନ ସାହୁ ସ୍ବର୍ଣ୍ଣ ପଦକ ପାଇଛନ୍ତି। ସେ ୮୦ କେଜି ବର୍ଗରେ ପ୍ରଥମସ୍ଥାନ ଅଧିକାର କରି ଏହି ସଫଳତା ହାସଲ କରିଛନ୍ତି। ଏହାକୁ ମିଶାଇ ସେ ଫେଡେରେଶନ କପ୍ରେ ତୃତୀୟ ଥରପାଇଁ ସ୍ବର୍ଣ୍ଣ ପଦକ ଜିତିଛନ୍ତି। ଓଡ଼ିଶାର ଅନ୍ୟତମ ପ୍ରତିଯୋଗୀ ସତ୍ୟଜିତ ପ୍ରଅତିହାରୀ ୯୦ କେଜି ବର୍ଗରେ ୪ର୍ଥ ସ୍ଥାନରେ ସନ୍ତୁଷ୍ଟ ହୋଇଛନ୍ତି। ପୂର୍ବ ବର୍ଷ ମାନଙ୍କରେ ସତ୍ୟଜିତ ଫେଡେରେଶନ କପ୍ରେ କୃତୀତ୍ୱ ଅର୍ଜନ କରି ରାଜ୍ୟକୁ ଗର୍ବିତ କରିଥିଲେ ହେଁ ଏଥର ଆଶାନୁରୂପ ସଫଳତା ପାଇପାରି ନାହାନ୍ତି। ପ୍ରତିଯୋଗିତାରେ ଲଲାଟେନ୍ଦୁ ପାତ୍ର ଓ କାଳିକିଙ୍କର ପଟ୍ଟନାୟକ ଯଥାକ୍ରମେ ମ୍ୟାନେଜର ଓ ପ୍ରଶିକ୍ଷକ ଭାବେ ଯୋଗ ଦେଇଥିଲେ। ରଶ୍ମିରଞ୍ଜନ ସୋମବାର ପ୍ରତ୍ୟାବର୍ତ୍ତନ କରିବା ଅବସରରେ ସ୍ଥାନୀୟ ବିଜୁପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରଠାରେ ଓଡ଼ିଶା ବଲିବିଲ୍ଡିଂ ଆସୋସିଏଶନ ପକ୍ଷରୁ ଭବ୍ୟ ସ୍ବାଗତ କରାଯାଇଥିଲା। ଆସୋସିଏଶନ ସଭାପତି ସୁମିତ୍ରା ତ୍ରିପାଠୀ ଓ ସମ୍ପାଦକ ପ୍ରସନ୍ନ ମହାସୁଆର ତାଙ୍କ ଭବିଷ୍ୟତ କ୍ରୀଡ଼ା ଜୀବନର ଉନ୍ନତି ପାଇଁ କାମନା କରିଛନ୍ତି। ରଶ୍ମିରଞ୍ଜନ ଝାରସୁଗୁଡ଼ା ପୋଷ୍ଟାଲ ଡିଭିଜନରେ କାର୍ଯ୍ୟରତ।