ବାରଙ୍ଗ, ୨।୧୦(ଡି.ଏନ୍.ଏ.): ଜମି ଜାଲିଆତି ନେଇ ନ୍ୟାଯ୍ୟ ଦାବି ନ ମିଳିବା ଓ ପ୍ରଶାସନ ପ୍ରତିଶ୍ରୁତି ଦେଇ ପୂରଣ କରୁ ନ ଥିବା ପ୍ରତିବାଦରେ ରାଷ୍ଟ୍ରୀୟ ଦଳିତ ପଛୁଆ ବର୍ଗ ମହାସଂଘ ପକ୍ଷରୁ ବାରଙ୍ଗ ତହସିଲ କାର୍ଯ୍ୟାଳୟ ସାମ୍ନାରେ ଶୁକ୍ରବାର ପୁଣି ଧାରଣା ଦିଆଯାଇଥିଲା। ସାରେ ତହସିଲଦାର ସଂକଳ୍ପ ସ୍ବାସ୍ଥିକ ସାହୁ ଆସି ଆନ୍ଦୋଳନକାରୀଙ୍କ ଆଲୋଚନା କରିବା ସହ ୫ ତାରିଖରେ ଏହାର ସ୍ଥାୟୀ ସମାଧାନ କରିବାକୁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ବାରଙ୍ଗ ତହସିଲ ଅଧୀନ ବିଦ୍ୟାଧରପୁର ମୌଜାର ସିଡିଏ ସେକ୍ଟର-୧୩ରେ ସରକାର ପଛୁଆବର୍ଗ ଓ ଦଳିତମାନଙ୍କୁ ଦେଇଥିବା ଜମିକୁ ଜାଲିଆତି କରି ପ୍ରଶାସନ ପକ୍ଷରୁ ଉଚ୍ଛେଦ ପାଇଁ ଯୋଜନା କରାଯାଉଛି। ଦଳିତ ପରିବାରକୁ ଜମି ପଟ୍ଟା ମିଳିଥିବାରୁ ସେମାନେ ପାଉତି ମଧ୍ୟ କାଟୁଛନ୍ତି। କିନ୍ତୁ ଜମିର ବିବରଣୀରେ ଜମିହୀନ ଥିବା ପଟ୍ଟାରେ ଉଲ୍ଲେଖ ରହିଛି। ଏହାକୁ ବିରୋଧ କରି ଦଳିତମାନେ ପ୍ରଶାସନକୁ ଅଭିଯୋଗ କରିବା ସତ୍ତ୍ୱେ କୌଣସି ସୁଫଳ ମିଳି ନ ଥିଲା। ଫଳରେ ସେମାନେ କୋର୍ଟର ଦ୍ୱାରସ୍ଥ ହୋଇଥିଲେ। କୋର୍ଟଙ୍କର ନିର୍ଦ୍ଦେଶ ଉପରେ କଟକ ଜିଲା ଓ ବାରଙ୍ଗ ତହସିଲ ପ୍ରଶାସନ କୌଣସି ପଦକ୍ଷେପ ନେଲେ ନାହିଁ। ନ୍ୟାୟ ପାଇଁ ଗତ ମାସ ୧ ତାରିଖରେ ତହସିଲ କାର୍ଯ୍ୟାଳୟ ସାମ୍ନାରେ ମହାସଂଘ ପକ୍ଷରୁ ଧାରଣା ଦିଆଯାଇଥିଲା। ତହସିଲ ପକ୍ଷରୁ ପ୍ରତିଶ୍ରୁତି ପରେ ମଧ୍ୟ ସମସ୍ୟା ସମାଧାନ ପାଇଁ କିଛି କରାଗଲା ନାହିଁ। ଶେଷରେ ଶୁକ୍ରବାର ଅପରାହ୍ନରେ ପୁଣିଥରେ ସଙ୍ଗଠନର ସଞ୍ଜିତ ସାମଲ, ଭାସ୍କର ସାହୁଙ୍କ ନେତୃତ୍ୱରେ ଶତାଧିକ ଦଳିତ ପରିବାର ପାଇଁ ଧାରଣାରେ ବସିଥିଲେ।
