ଭୁବନେଶ୍ୱର, ୩।୭(ବ୍ୟୁରୋ) – ସ୍କୁଲ ଫି’ ଛାଡ଼ ନେଇ ହାଇକୋର୍ଟଙ୍କ ନିର୍ଦ୍ଦେଶକୁ ଅନେକ ଶିକ୍ଷାନୁଷ୍ଠାନ ପାଳନ କରୁନାହାନ୍ତି। ଏହାର ପ୍ରତିବାଦରେ ଆସନ୍ତା ୮ ତାରିଖରୁ ଓଡ଼ିଶା ଅଭିଭାବକ ମହାସଂଘ ଭୁବନେଶ୍ୱର ଏଡିଏମ୍ଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନ କରିବ ବୋଲି ଚେତାବନୀ ଦେଇଛି।
ସଂଘର କହିବାନୁଯାୟୀ, କରୋନା ମହାମାରୀରେ ଘରୋଇ ସ୍କୁଲରେ ଫି’ ଆଦାୟ ମାମଲାରେ ହାଇକୋର୍ଟଙ୍କ ନିର୍ଦ୍ଦେଶରେ ଏମ୍ଓୟୁ ହୋଇ କେତୋଟି ସ୍ଲାବ୍ରେ ଫି’ ଛାଡ଼ ପାଇଁ ଗଣଶିକ୍ଷା ବିଭାଗ ନିର୍ଦ୍ଦେଶ ଦେଇଥିଲା। ପରବର୍ତ୍ତୀ ସମୟରେ ସୁପ୍ରିମକୋର୍ଟଙ୍କ ରାୟ ପରେ ବିଭାଗ ପକ୍ଷରୁ ପରବର୍ତ୍ତୀ ନିର୍ଦ୍ଦେଶନାମା ପ୍ରକାଶ ପାଇଥିଲା। ପୂର୍ବରୁ ଏମ୍ଓୟୁରେ ସାମିଲ ନ ଥିବା ସ୍କୁଲମାନେ ରିଆଡ୍ମିଶନ, ସେସନ, ପରୀକ୍ଷା, ଡେଭଲପ୍ମେଣ୍ଟ ଆଦି ଅନ୍ୟ ଫି’କୁ ଛାଡ଼ି କେବଳ ଟ୍ୟୁଶନ ଫି’ରୁ ୧୫% ଛାଡ଼ କରି ଅଭିଭାବକଙ୍କଠାରୁ କିଛି ମାସ ସମୟ ଦେଇ ଆଦାୟ କରିବାକୁ କୁହାଯାଇଥିଲା। ଏ ନେଇ ଗତ ଜୁନ ୩ରେ ଜିଲାପାଳ ଓ ଜିଲା ଶିକ୍ଷାଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ମାସେ ବିତିଯାଇଥିଲେ ସୁଦ୍ଧା ନିର୍ଦ୍ଦେଶ ଠିକ ଭାବେ କାର୍ଯ୍ୟକାରୀ ହେଲା ନାହିଁ। ଏପରିକି ଫି’ ଆଦାୟକୁ ନେଇ କୌଣସି ସ୍କୁଲ ପିଲାଙ୍କୁ ଅନ୍ଲାଇନ ପାଠପଢ଼ା, ପରୀକ୍ଷା, ପ୍ରୋଗ୍ରେସ କାର୍ଡ, କ୍ଲାସ ପ୍ରମୋଗଶନ ଆଦିରୁ ବଞ୍ଚତ୍ତ କରିପାରିବେ ନାହିଁ ବୋଲି ସ୍ପଷ୍ଟ ନିର୍ଦ୍ଦେଶ ଥିବାବେଳେ ଅନେକ ସ୍କୁଲ ଆଦୌ ମାନୁନାହାନ୍ତି। ତେଣୁ ଆସନ୍ତା ୭ ତାରିଖ ସୁଦ୍ଧା ନିର୍ଦ୍ଦେଶର ଠିକ୍ କାର୍ଯ୍ୟକାରୀ ନ ହେଲେ ୮ ତାରିଖରେ ମହାସଂଘର ଭୁବନେଶ୍ୱର ଆବାହକ ପ୍ରଦ୍ୟୁମ୍ନ ମିଶ୍ରଙ୍କ ନେତୃତ୍ୱରେ ୧୦୦ରୁ ଊର୍ଦ୍ଧ୍ୱ ଅଭିଭାବକ ନେତା ଅନଶନରେ ବସିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ମହାସଂଘ ଜିଲାପାଳଙ୍କୁ ଚିଠି ଲେଖି ମଧ୍ୟ ଜଣାଇଦେଇଛି।
