ମହାମାରୀ କରୋନା ସଂକ୍ରମଣ ରୋକିବା ଦିଗରେ ଏକମାତ୍ର ପ୍ରଭାବଶାଳୀ ପ୍ରତିକାର ହେଉଛି ଟିକା। ଏହାକୁ ଦୃଷ୍ଟିରେ ରଖି ବିଶ୍ୱର ବିଭିନ୍ନ ଦେଶରେ ଟିକାକରଣ ଦ୍ରୁତ ଗତିରେ ଚାଲିଛି। କରୋନା ସହ ଯୁଦ୍ଧରେ ଯେକୌଣସି ଟିକାର ଦୁଇଟି ଡୋଜ୍ ଆବଶ୍ୟକ ବୋଲି କୁହାଯାଉଛି। କିନ୍ତୁ ଟିକାକରଣକୁ ନେଇ ଏକ ଆଶ୍ଚର୍ଯ୍ୟ କଲାଭଳି ଖବର ଇଟାଲୀରୁ ଆସିଛି। ଏଠାକାର ଜଣେ ୨୩ ବର୍ଷୀୟା ମହିଳାକୁ ଗୋଟିଏ କିମ୍ବା ଦୁଇଟି ନୁହେଁ ବରଂ ୬ଟି ଡୋଜ୍ ଫାଇଜର୍(କୋଭିଡ-୧୯) ଟିକା ଦିଆଯାଇଛି। ଏବେ ତାଙ୍କୁ ଡାକ୍ତରଖାନାରୁ ଡିସଚାର୍ଜ ମଧ୍ୟ କରିଦିଆଯାଇଛି। ହେଲେ ତାଙ୍କଠାରେ କୌଣସି ପାର୍ଶ୍ୱ ପ୍ରତିକ୍ରିୟାକୁ ଦୃଷ୍ଟିରେ ରଖି ନିରନ୍ତର ମନିଟରିଂ କରାଯାଉଛି।
ଏହି ପରିପ୍ରେକ୍ଷୀରେ ନୋଭା ହସ୍ପିଟାଲର ମୁଖପାତ୍ର କହିଛନ୍ତି, କୋଭିଡ-୧୯ ଟିକା ପାଇଁ ଉକ୍ତ ମହିଳା ଡାକ୍ତରଖାନାକୁ ଆସିଥିଲେ। ତାଙ୍କୁ ସ୍ବାସ୍ଥ୍ୟକର୍ମୀ ସିରିଞ୍ଜରେ ଦେଇଥିବା ଟିକା ୬ଟି ଡୋଜ୍ ସହ ସମାନ ଥିଲା। ସେ ନିଜର ଭୁଲ ଜାଣିବା ବେଳକୁ ବିଳମ୍ବ ହୋଇସାରିଥିଲା। ଏବେ ବଡ଼ ଘଟଣାକୁ ନେଇ ମହିଳାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବାର ଅନୁମାନ କରି ସ୍ବାସ୍ଥ୍ୟକର୍ମୀ ଚିନ୍ତାରେ ପଡ଼ିଯାଇଥିଲେ। ହେଲେ ସେଭଳି କିଛି ନ ଘଟିବାରୁ ତାଙ୍କୁ ଡିସ୍ଚାର୍ଜ କରାଯାଇଛି।
ଡାକ୍ତରଖାନାର ମୁଖପାତ୍ର କହିଛନ୍ତି, ମହିଳାଙ୍କୁ ଟିକା ଦିଆଯିବା ପରେ ଡାକ୍ତରମାନେ ରୋଗୀର ପାର୍ଶ୍ୱ ପ୍ରତିକ୍ରିୟା, ରୋଗ ପ୍ରତିରୋଧକ ଶକ୍ତି ଉପରେ ନଜର ରଖିଥିଲେ। ଏହା ମାନବୀୟ ତ୍ରୁଟି ଥିଲା। କାହାରିକୁ କ୍ଷତି ପହଞ୍ଚାଇବା ଉଦ୍ଦେଶ୍ୟରେ ଏଭଳି କରାଯାଇ ନ ଥିବା ସେ ସ୍ପଷ୍ଟ କରିଛନ୍ତି।