ଆକ୍ସନ ହିରୋ ଅଜୟ ଦେବଗନ ତାଙ୍କ ଚମତ୍କାର ଅଭିନୟ ପାଇଁ ଦର୍ଶକଙ୍କ ହୃଦୟ ଜିତିପାରିଛନ୍ତି। କେବଳ ସେତିିକି ନୁହେଁ ତାଙ୍କ ନିର୍ଦ୍ଦେଶିତ ଫିଲ୍ମକୁ ଜୀବନ୍ତ କରିବାକୁ ସେ ସବୁପ୍ରକାର ଚେଷ୍ଟା କରିଥାନ୍ତି। ଅଜୟଙ୍କ ଏହା ଆତ୍ମବିଶ୍ୱାସ ମଧ୍ୟ ରହିଛି ଯେ, ସେ ଜଣେ ଭଲ ଅଭିନେତା ସହ ନିର୍ଦ୍ଦେଶନା ମଧ୍ୟ ଦେଇପାରିବେ। ସେଥିପାଇଁ ତାଙ୍କ ନିର୍ଦ୍ଦେଶିତ ଫିଲ୍ମ ‘ରନୱେ ୩୪’ ଇଦ୍ରେ ରିଲିଜ୍ ହେବା ପରେପରେ ଖୁବଶୀଘ୍ର ଏକ ନୂତନ ଫିଲ୍ମ ଆରମ୍ଭ କରିବାକୁ ଯାଉଛନ୍ତି। ଏହି ଫିଲ୍ମ ହିନ୍ଦୀ ସିନେମାର ସବୁଠାରୁ ବଡ ବଜେଟ୍ରେ କରାଯିବ ବୋଲି କୁହାଯାଉଛି। ଏଥିଲାଗି କାମ ମଧ୍ୟ ଆରମ୍ଭ ହୋଇଯାଇଛି। ଏ ନେଇ ନିର୍ଦ୍ଦେଶକ ନୀରଜ ପାଣ୍ଡେଙ୍କ ଫିଲ୍ମ ‘ଚାଣକ୍ୟ’ ପୁଣି ଥରେ ଆଗକୁ ବଢ଼ିବାର ସମ୍ଭାବନା ରହିଛି।
ଅଜୟ ୨୦୦୮ ମସିହାରେ ଫିଲ୍ମ ‘ୟ ମେ ଅର୍ ହମ୍’ ସହିତ ଫିଲ୍ମ ନିର୍ଦ୍ଦେଶକ ଭାବେ ଡେବ୍ୟୁ କରିଥିଲେ। ଆଠ ବର୍ଷ ପରେ, ୨୦୧୬ରେ ଅଜୟ ଆଉ ଏକ ଲୋକପ୍ରିୟ ଫିଲ୍ମ ‘ଶିବାୟ’ର ନିର୍ଦ୍ଦେଶନା ଦେଇଥିଲେ । ‘ଶିବାୟ’ର ଛଅ ବର୍ଷ ପରେ ଅଜୟ ତୃତୀୟ ନିର୍ଦ୍ଦେଶିତ ଫିଲ୍ମ୍ମ ‘ରନୱେ ୩୪’ ଚଳିତ ବର୍ଷ ଇଦ୍ରେ ମୁକ୍ତିଲାଭ କରିବାକୁ ଯାଉଛି । ଏଥିରେ ଅଜୟ ମଧ୍ୟ ଅଭିନୟ କରୁଛନ୍ତି। ଏହା ବ୍ୟତୀତ ଅଜୟଙ୍କ ‘ଭୋଲା’, ‘ଥ୍ୟାଙ୍କ୍ସ ଗଡ’ ଏବଂ ‘ଦୃଶ୍ୟମ ୨’ ଭଳି ଫିଲ୍ମ ରହିଛି ଯାହାର ଶୁଟିଂ ଏବଂ ପ୍ରଡକ୍ସନ ବିଭିନ୍ନ ପର୍ଯ୍ୟାୟରେ ରହିଛିି। ଫିଲ୍ମ ‘ମୈଦାନ’ ସମାପ୍ତ ହୋଇଛି ଏବଂ ରୋହିତ ଶେଟ୍ଟୀଙ୍କ ଫିଲ୍ମ‘ସର୍କସ’ର ଶୁୁଟିଂ ମଧ୍ୟ ଶେଷ ହୋଇଛି। ‘ଭୋଲା’, ‘ଥ୍ୟାଙ୍କ୍ସ ଗଡ’ ଏବଂ ‘ଦୃଶ୍ୟମ ୨’ ଅଧାରେ ଥିବା ଫିଲ୍ମ ଶୁଟିଂ ଶେଷ ହେବା ପରେ ସେ ଖୁବଶୀଘ୍ର କାମ ଆରମ୍ଭ କରିବେ। ପ୍ରାୟ ୪୦୦ କୋଟି ଟଙ୍କାର ମେଗା ବଜେଟ୍ରେ ପ୍ରସ୍ତାବିତ ଏହି ଫିଲ୍ମ ଆଜି ପର୍ଯ୍ୟନ୍ତ ହିନ୍ଦୀ ସିନେମାର ସବୁଠାରୁ ମହଙ୍ଗା ଫିଲ୍ମ ହେବ।
ଅଜୟଙ୍କ ଏହି ମେଗା ବଜେଟ୍ ଫିଲ୍ମ ଏକ ପୌରାଣିକ ଯାହାର ସ୍କ୍ରିପ୍ଟ ମଧ୍ୟ ସରିଯାଇଛି। ୨୦୧୮ରେ ନିର୍ଦ୍ଦେଶକ ନୀରଜ ପାଣ୍ଡେଙ୍କ ସହ ଅଜୟ ଦେବଗାନ ଐତିହାସିକ ଫିଲ୍ମ ‘ଚାଣକ୍ୟ’ ଆରମ୍ଭ କରିବାକୁ ମଧ୍ୟ ଘୋଷଣା କରିଥିଲେ।୨୦୨୦ ଶେଷରେ ଏହି ଫିଲ୍ମଟି ଆରମ୍ଭ କରିବା ପାଇଁ ନୀରଜ ପୂର୍ବରୁ ପ୍ରସ୍ତୁତି କରିଥିଲେ । ପରେ କରୋନା କାଳରେ ଏହା ହୋଇ ପାରି ନ ଥିଲା।
