ନୂଆଦିଲ୍ଲୀ,୨୯।୭: କରୋନା ଯୋଗୁ ଅର୍ଥ ବ୍ୟବସ୍ଥାକୁ ଗଭୀର କ୍ଷତି ହୋଇଛି। ଏହାଦ୍ୱାରା ଦେଶର ବିଭିନ୍ନ କ୍ଷେତ୍ର ପ୍ରଭାବିତ ହୋଇ ରହିଛି। ମାତ୍ର ଏପ୍ରିଲ ତୁଳନାରେ ବର୍ତ୍ତମାନ ଅର୍ଥ ବ୍ୟବସ୍ଥା ଟ୍ରାକ୍କୁ ଫେରୁ ଥିବା ଶିଳ୍ପ ସଂଘ ସିଆଇଆଇ ମତ ପ୍ରକାଶ କରିଛି। ସଂଘ ପକ୍ଷରୁ ମଙ୍ଗଳବାର କୁହାଯାଇଛି ଯେ, ଜିଏସ୍ଟି ସଂଗ୍ରହରେ ଉନ୍ନତି, ରେଳ ମାଲ ପରିବହନ ବୃଦ୍ଧି ଏବଂ ଦେଶରେ ପେଟ୍ରୋଲ ଓ ଡିଜେଲ ଚାହିଦା ବଢୁଥିବା ନଜରକୁ ଆସିଛି। ସବୁ କ୍ଷେତ୍ରରେ ଡାଟା ନ ଆସିଥିଲେ ମଧ୍ୟ କିଛି କ୍ଷେତ୍ରର ଡାଟାକୁ ବିଚାରକରି ଏହା ଜଣାପଡୁଛି ଯେ ଆର୍ଥତ୍କ କାର୍ଯ୍ୟକଳାପ ଧୀରେ ଧୀରେ ତ୍ୱରାନ୍ବିତ ହେଉଛି। ଅର୍ଥ ବ୍ୟବସ୍ଥା ଲକ୍ଡାଉନ ଯୋଗୁ ନିମ୍ନଗାମୀ ହୋଇଥିଲା। ମାତ୍ର ବର୍ତ୍ତମାନ ଏହା ଭି ଆକାରରେ ଟ୍ରାକ୍କୁ ଫେରୁଥିବା ସିଆଇଆଇ ରିପୋର୍ଟରେ ମତ ପ୍ରକାଶ ପାଇଛି। ଲକ୍ଡାଉନ ସମ୍ପୂର୍ଣ୍ଣ ଖୋଲିଲେ ଏହା ଅର୍ଥ ବ୍ୟବସ୍ଥାକୁ ଟ୍ରାକ୍କୁ ଫେରିବାକୁ ଅଧିକ ସହାୟକ ହେବ। ସିଆଇଆଇ ମହାନିର୍ଦ୍ଦେଶକ ଚନ୍ଦ୍ରଜିତ ବାନାର୍ଜୀ କହିଛନ୍ତି, ଲକ୍ଡାଉନକୁ ନଜରରେ ନୂଆ କୌଶଳ ସହ ଆର୍ଥତ୍କ ଗତିବିଧିକୁ ଅନୁମତି ଦେବାକୁ ପଡିବ। ଏମ୍ଏସ୍ଏମ୍ଇ ଏବଂ ବିତ୍ତ ଅନୁଷ୍ଠାନଗୁଡିକ ଲାଗି ସରକାର ଗ୍ରହଣ କରିଥିବା ପଦକ୍ଷେପର ଲାଭ ଧୀରେ ଧୀରେ ଦେଖିବାକୁ ମିଳୁଛି। ଚଳିତ ବର୍ଷର ମାନ୍ଦାବସ୍ଥା ଗତ ବର୍ଷଠାରୁ ଭିନ୍ନ ରହିଛି। ଅର୍ଥ ବ୍ୟବସ୍ଥାକୁ ଟ୍ରାକ୍କୁ ଫେରାଇ ଆଣିବା ଲାଗି କୃଷି କ୍ଷେତ୍ର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରେ ବୋଲି ସେ ମତବ୍ୟକ୍ତ କରିଛନ୍ତି।