ନୂଆଦିଲ୍ଲୀ: ଆସନ୍ତା ବର୍ଷରେ ଦେଶର ଅର୍ଥ ବ୍ୟବସ୍ଥା ସ୍ବାଭାବିକ ସ୍ଥିତିକୁ ଫେରିବା ନେଇ ଆଶା ରହିଛି ବୋଲି ଏସ୍ବିଆଇ ଅଧ୍ୟକ୍ଷ ଦିନେଶ କୁମାର ଖାରା ଶନିବାର କହିଛନ୍ତି। କୋଭିଡ୍-୧୯ ଯୋଗୁ ଅର୍ଥ ବ୍ୟବସ୍ଥାକୁ ବଡ଼ ସମସ୍ୟା ସାମ୍ନା କରିବାକୁ ପଡିଛି। ଏହି ସମସ୍ୟାରୁ ଅର୍ଥ ବ୍ୟବସ୍ଥା ବର୍ତ୍ତମାନ ବାହାରିବାକୁ ପ୍ରୟାସ ଜାରି ରଖିଛି। ଏହା ପରେ ସିଷ୍ଟମ ଅଧିକ ପରିପକ୍ୱ ହେବ ବୋଲି ବେଙ୍ଗଲ ଚାମ୍ବର୍ସ ଅଫ୍ କମର୍ସର ଏକ ଭର୍ଚୁଆଲ କାର୍ଯ୍ୟକ୍ରମକୁ ସମ୍ବୋଧିତ କରି ଖାରା ଏହା କହିଛନ୍ତି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଅର୍ଥ ବ୍ୟବସ୍ଥାରେ ସକାରାତ୍ମକ ଦିଗ ଦେଖିବାକୁ ମିଳିଛି। କର୍ପୋରେଟ୍ଗୁଡିକର ନିବେଶ ଚାହିଦା ବଢ଼ିବା ପାଇଁ ହେଲେ କିଛି ସମୟ ଲାଗିବ। ବର୍ତ୍ତମାନ କର୍ପୋରେଶନଗୁଡିକର କ୍ଷମତା ଉପଯୋଗ ୬୯% ସ୍ତରରେ ରହିଛି। ରାଷ୍ଟ୍ରାୟତ୍ତ କମ୍ପାନୀଗୁଡ଼ିକରେ ନଗଦ ସ୍ଥିତି ଉନ୍ନତ ଥିବାରୁ ଏହା ନିବେଶ ଚାହିଦାକୁ ବଢାଇବ। ଋଣ କରିବା କ୍ଷେତ୍ରରେ ଦେଶର କର୍ପୋରେଟ କ୍ଷେତ୍ର ବର୍ତ୍ତମାନ ସତର୍କତା ଦେଖାଉଛି। କମ୍ପାନୀଗୁଡିକ ନିଜର ସମ୍ବଳକୁ କିଛି କିଛି ମାତ୍ରାରେ ଖର୍ଚ୍ଚ କରୁଛନ୍ତି। ଦେଶର କୋର୍ ସେକ୍ଟର ଶିଳ୍ପ ବର୍ତ୍ତମାନ ଉନ୍ନତ ସ୍ଥିତିକୁ ଆସୁଛି। ଶିଳ୍ପଗୁଡିକ ରପ୍ତାନି ଲାଗି ବର୍ତ୍ତମାନ ଆଗଭର ହେଲେଣି। ମାତ୍ର ଟ୍ରାଭେଲ ଏବଂ ଟୁରିଜମ କ୍ଷେତ୍ର ଏବେ ସୁଦ୍ଧା ମଧ୍ୟ ସଙ୍କଟ ସମୟ ଦେଇ ଗତି କରୁଛନ୍ତି।