ବାରିପଦା ଅଫିସ,୧୨ା୩: ୨୭୫୦ ବର୍ଗ କି.ମି. ପରିଧି ମଧ୍ୟରେ ଥିବା ଶିମିଳିପାଳ ଅଭୟାରଣ୍ୟର ୨୧ଟି ରେଞ୍ଜରେ ଦୀର୍ଘଦିନ ହେଲା ଲାଗି ରହିଥିବା ନିଆଁ ନିୟନ୍ତ୍ରଣକୁ ଆସିଛି। ବନ କର୍ମଚାରୀ, ଓଡ୍ରାଫ ଟିମ୍, ଅଗ୍ନିଶମ ବାହିନୀ, ସ୍ବେଚ୍ଛାସେବୀ ଅନୁଷ୍ଠାନ ଓ ସ୍ଥାନୀୟ ଲୋକଙ୍କ ସହଯୋଗ ତଥା ୨ଦିନ ହେଲା ହୋଇଥିବା ବର୍ଷାରେ ଲାଗିଥିବା ନିଆଁ ଲିଭି ଆସୁଥିବା ସୂଚନା ମିଳିଛି। ଫରେଷ୍ଟ ସର୍ଭେ ଅଫ୍ ଇଣ୍ଡିଆର ସାଟେଲାଇଟ୍ ଇମେଜରେ ବୁଧବାର ୨୪ରୁ ୨୬ଟି ଫାୟାର ପଏଣ୍ଟ ଥିବାବେଳେ ଗୁରୁବାର ଏହାର ସଂଖ୍ୟା ୫କୁ ଖସି ଆସିଥିଲା। ଅନ୍ୟପକ୍ଷେ ନିଆଁ ଲାଗିବାର କାରଣ ଓ କ୍ଷୟକ୍ଷତିର ଆକଳନ ପାଇଁ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଏକ ପ୍ରତିନିଧି ଦଳ ଶିମିଳିପାଳରେ ପହଞ୍ଚତ୍ଛନ୍ତି। ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ(ଏନଟିସିଏ)ର ଆଇଜିଏଫ୍ ଅମିତ ମଲ୍ଲିକ ଓ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟର ମହାନିର୍ଦ୍ଦେଶକ ସୁବ୍ରତ ମହାପାତ୍ର ଶୁକ୍ରବାର କରଞ୍ଜିିଆ ବନଖଣ୍ଡ ଅଧୀନ ଯଶିପୁର ରେଞ୍ଜ ଦେଇ ଅପରବାରହାକାମୁଡ଼ା, ଗୁଡୁଗୁଡ଼ିଆ, ବରେହିପାଣି, ନଅଣା, ଉସୁକି ଆଦି ଆଭ୍ୟନ୍ତରୀଣ (କୋର)ଅଞ୍ଚଳ ବୁଲି ସ୍ଥିତି ସମୀକ୍ଷା କରିବା ସହ ତଥ୍ୟ ସଂଗ୍ରହ କରିଛନ୍ତି।
