ବାରିପଦା ଅଫିସ,୬।୩: ଶିମିଳିପାଳ ଅଭୟାରଣ୍ୟରେ ଲାଗିଥିବା ନିଆଁ ଅଣାୟତ୍ତ ହୋଇଥିବା ବେଳେ ଦିନକୁ ଦିନ ଏହା ବ୍ୟାପିବାରେ ଲାଗିଛି। ନାସା ପକ୍ଷରୁ ପ୍ରଦତ୍ତ ରିପୋର୍ଟ ଅନୁଯାୟୀ, ଶିମିଳିପାଳ କୋର୍ ଓ ବୋଫର ଅଞ୍ଚଳରେ ପ୍ରାୟ ୧୧୨ରୁ ଊର୍ଦ୍ଧ୍ୱ ସ୍ଥାନରେ ନିଆଁ ଜଳୁଥିବା ଜଣାପଡ଼ିଛି। ୧୨ରୁ ଊର୍ଦ୍ଧ୍ୱ ଦମକଳ ବାହିନୀ, ୧୨ଶହ କର୍ମଚାରୀ, ସ୍ବେଚ୍ଛାସବୀ ସଙ୍ଗଠନ ଓ ଅଞ୍ଚଳବାସୀଙ୍କ ପକ୍ଷରୁ ନିଆଁ ଲିଭା କାର୍ଯ୍ୟ ଜାରି ରହିଛି। ତେବେ କେତେକ ସ୍ଥାନରେ ନିଆଁକୁ ଆୟତ୍ତ କରୁଥିବା ବେଳେ ଅନ୍ୟ ସ୍ଥାନରେ ନିଆଁ ଜଳୁଥିବା ଜଣାଯାଇଛି। ୧୨ଦିନ ମଧ୍ୟରେ ଜଳୁଥିବା ନିଆଁ ଯୋଗୁ ହଜାର ହଜାର ହେକ୍ଟର ଜଙ୍ଗଲ ପୋଡ଼ି ପାଉଁଶ ହୋଇଯାଇଛି। ବନ ବିଭାଗ ପକ୍ଷରୁ ଏହାକୁ ଆୟତ୍ତ କରାଯାଉଥିବା କୁହାଯାଉଥିବା ବେଳେ ନାସା ପକ୍ଷରୁ ପ୍ରଦତ୍ତ ଚିତ୍ରକୁ ନେଇ ଅଡୁଆ ପରିସ୍ଥିତି ଉପୁଜିଛି। ଅଣାୟତ୍ତ ନିଆଁକୁ ନେଇ ଏବେ ଚିନ୍ତାରେ ପଡ଼ିଛନ୍ତି ପରିବେଶବିତ୍। ତେବେ ବିଭାଗ ପକ୍ଷରୁ ଘଟଣାକୁ ଲୁଚାଇବାକୁ ଉଦ୍ୟମ କରାଯାଉଥିବା ନେଇ ପରିବେଶବିତ୍ ତଥା ଅବୈତନିକ ବନ୍ୟପ୍ରାଣୀ ସଂରକ୍ଷକ ଭାନୁମିତ୍ର ଚିନ୍ତା ବ୍ୟକ୍ତ କରିଛନ୍ତି।