ନୂଆଦିଲ୍ଲୀ, ୨୭।୮(ପି.ଟି.)- ଚଳିତ ବର୍ଷ ରାଣୀ ରାମପାଲଙ୍କ ସମେତ ୫ ଖେଳାଳି ଦେଶର ସର୍ବୋଚ୍ଚ ରାଜୀବଗାନ୍ଧୀ ଖେଳରତ୍ନ କ୍ରୀଡ଼ା ପୁରସ୍କାର ପାଇବାକୁ ମନୋନୀତ ହୋଇଛନ୍ତି। ପ୍ରଥମ ମହିଳା ହକି ଖେଳାଳିଭାବେ ରାଣୀ ଏହି ପୁରସ୍କାର ପାଇବାକୁ ଯାଉଛନ୍ତି। ଏହି ଖବର ଶୁଣିବାପରେ ଭାବାବେଗକୁ ରୋକି ନ ପାରି କାନ୍ଦି ପକାଇଥିଲେ ଭାରତୀୟ ହକି ଅଧିନାୟିକା। ରାଣୀଙ୍କ ସମେତ କ୍ରିକେଟର ରୋହିତ ଶର୍ମା, ରେସଲର ଭିନେଶ ଫୋଗତ, ଟେବୁଲ ଟେନିସ ତାରକା ମାନିକା ବାତ୍ରା ଓ ପାରାଅଲିମ୍ପିଆନ ଥାଙ୍ଗାଭେଲୁ ମାରିୟାପ୍ପାନ ଖେଳରନତ୍ ପୁରସ୍କାର ପାଇବେ।
ଜଣେ ମହିଳା ହକି ଖେଳାଳି ଖେଳରନତ୍ ପୁରସ୍କାର ପାଇବ ବୋଲି କେବେ ଭାବିପାରି ନ ଥିଲେ ୨୫ ବର୍ଷୀୟା ରାଣୀ। ୫ ଜଣଙ୍କ ମଧ୍ୟରେ ସେ ସ୍ଥାନ ପାଇଥିବାରୁ ଭାବପ୍ରବଣ ହୋଇ ପଡ଼ିଥିଲେ। ”ସତକହିବାକୁ ଗଲେ ଜଣେ ମହିଳା ଖେଳାଳିଭାବେ ମୁଁ କେବେ ଖେଳରତ୍ନ ପୁରସ୍କାର ପାଇବି ବୋଲି ଭାବି ନ ଥିଲି। ଖେଳାଳିଙ୍କ ନାମ ଘୋଷଣା ହେବାପରେ ମୁଁ କାନ୍ଦ ରୋକିପାରି ନ ଥିଲି। ଏହି ଶୁଭଖବର ପ୍ରଥମେ ମୁଁ ବାପାଙ୍କୁ ଫୋନ୍ କରି ଜଣାଇଥିଲି। ସେତେବେଳ ପର୍ଯ୍ୟନ୍ତ ମୁଁ କାନ୍ଦୁଥିଲି। ମୋ ସହିତ କିଛି ଖରାପ ହୋଇଛି ବୋଲି ଭାବି ବାପା ବ୍ୟସ୍ତ ହୋଇ ପଡ଼ିଲେ। କାରଣ ଖେଳରତ୍ନ ପୁରସ୍କାରର ଗୁରୁତ୍ୱକୁ ସେମାନେ ବୁଝି ନ ଥିଲେ। ମୁଁ ବୁଝାଇବାପରେ ବାପା ବହୁତ ଖୁସିହେଲେ ଏବଂ ଭାବପ୍ରବଣ ହୋଇପଡ଼ିଲେ“ ବୋଲି ରାଣୀ ଏକ ସାକ୍ଷାତକାରରେ କହିଛନ୍ତି। ଭାରତୀୟ ହକି ଇତିହାସରେ ରାଣୀଙ୍କ କ୍ୟାରିୟର ଅତ୍ୟନ୍ତ ଚମକପ୍ରଦ। ସେ ଅତି ଦରିଦ୍ର ପରିବାରରୁ ଆସିଥିଲେ। ତାଙ୍କ ବାପା ଜଣେ ଟଣାଗାଡ଼ି ଚାଳକ ଥିଲେ। ସେଠାରୁ ଆସି ଆଜି ରାଣୀ ଭାରତୀୟ ମହିଳା ହକିରେ ଆଦର୍ଶ ପାଲଟି ଯାଇଛନ୍ତି। ହରିୟାଣା ଶାହବାଦର ରାଣୀ ମାତ୍ର ୧୫ ବର୍ଷରେ ସର୍ବକନିଷ୍ଠ ଖେଳାଳିଭାବେ ଜାତୀୟ ଦଳରେ ସ୍ଥାନ ପାଇଥିଲେ।
କଠିନ ପରିଶ୍ରମ, ତ୍ୟାଗ ଏବଂ ପ୍ରତିଶ୍ରୁତିବଦ୍ଧତା ପାଇଁ ଏହି ପୁରସ୍କାର ତାଙ୍କୁ ମିଳିଛି ବୋଲି ଅନୁଭବ କରୁଛନ୍ତି ରାଣୀ। ଅଲିମ୍ପିକ୍ସରେ ପଦକ ହାସଲ ତାଙ୍କର ପରବର୍ତ୍ତୀ ଲକ୍ଷ୍ୟ। ଆମେ ଅଧିକ ପରିଶ୍ରମ କରି ଦଳଗତଭାବେ ଆସନ୍ତାବର୍ଷ ଟୋକିଓରେ ସଫଳ ହେବାକୁ ଚେଷ୍ଟା କରିବୁ ବୋଲି ରାଣୀ କହିଛନ୍ତି। କୋଭିଡ-୧୯ ସଂକ୍ରମଣ ପାଇଁ ଅଲିମ୍ପିକ୍ସ ୧ ବର୍ଷ ଘୁଞ୍ଚି ଯାଇଛି। ନିଜ ଜୀବନକୁ ପାଣି ଛଡ଼ାଇ ଅନ୍ୟମାନଙ୍କ ଜୀବନ ବଞ୍ଚାଉଥିବା କରୋନା ଯୋଦ୍ଧାଙ୍କ ଉଦ୍ଦେଶ୍ୟରେ ନିଜ ପୁରସ୍କାରକୁ ଉତ୍ସର୍ଗ କରିଛନ୍ତି ଏହି ତାରକା ଷ୍ଟ୍ରାଇକର। ”ଖେଳରନତ୍ ପୁରସ୍କାର ଉତ୍ସାହ ଆଣିଛି। ଅଲିମ୍ପିକ୍ସରେ ଭଲ ପ୍ରଦର୍ଶନ ପାଇଁ ଏହା ପ୍ରେରଣା ଦେବ। ଗତ କିଛିବର୍ଷ ଧରି ଭାରତୀୟ ମହିଳା ହକି ଏହାର ହକ୍ ପାଇବାରେ ସକ୍ଷମ ହୋଇଛି। ବ୍ୟକ୍ତିଗତଭାବେ ଏହା ମୋତେ ଅନ୍ତର୍ଜାତୀୟ ସ୍ତରରେ ଆହୁରି ଭଲ ପ୍ରଦର୍ଶନ ପାଇଁ ଉତ୍ସାହିତ କରିଛି“ ବୋଲି ରାଣୀ କହିଛନ୍ତି।
