ମହାକାଳପଡ଼ା,୨୮ା୭(ପ୍ରତାପ ଚନ୍ଦ୍ର ସ୍ବାଇଁ) : କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ଚିରସ୍ରୋତା ମହାନଦୀ ପ୍ରବାହିତ ହେଉଛି। ହୀରାକୁଦରୁ ପ୍ରଥମ ବନ୍ୟାଜଳ ନିଷ୍କାସିତ ହେବା ପରେ ପ୍ରଥମଥର ଏହି ବନ୍ୟା ମହାକାଳପଡ଼ା ଅଞ୍ଚଳର ମହାନଦୀ ଜଳ ସମୁଦ୍ରରେ ମିଶୁଛି। ଏହି ମାଟି ମିଶ୍ରିତ ବନ୍ୟା ଜଳ ସମୁଦ୍ରରେ ମିଶିଲେ ଗଭୀର ଜଳରାଶିରୁ ଇଲିଶି ମାଛ ଯାଅଁାଳ ଦେବା ପାଇଁ ମୁହାଣରେ ମିଶିଥିବା ମାଟିଆ ମିଠା ପାଣିରେ ଡିମ୍ବ ଛାଡ଼ି ଥାନ୍ତି। ଏହି ବର୍ଷାଦିନରେ ଇଲିଶି ମାଛ ବର୍ଷ କରେ ଥରେ ଅଣ୍ଡାଦାନ କରିବାକୁ ମୁହାଣ ଅଭିମୁଖେ ଆସୁଥିବା ଦେଖିବାକୁ ମିଳେ। ଏହି ସମୟରେ ସ୍ଥାନୀୟ ମତ୍ସ୍ୟଜୀବୀମାନେ ଜାଲ ସାହାଯ୍ୟରେ ପ୍ରଚୁର ପରିମାଣରେ ଇଲିଶି ଧରି ବେଶ୍ ଭଲ ପଇସା ରୋଜଗାର କରନ୍ତି ବୋଲି ଜମ୍ବୁ ଅଞ୍ଚଳର ମତ୍ସ୍ୟଜୀବୀ ଶକ୍ତିପଦ ମିର୍ଦ୍ଧା କହିଛନ୍ତି। ତାଙ୍କ କହିବା ଅନୁଯାୟୀ, ବର୍ଷରେ ସାଢ଼େ ୭ ମାସ ସାମୁଦ୍ରିକ ପ୍ରବେଶ କଟକଣା ଲାଗୁ ହେବା ପରେ ଏହି ଅଞ୍ଚଳର ପାରମ୍ପରିକ ସାମୁଦ୍ରିକ ମତ୍ସ୍ୟଜୀବୀମାନେ ଉକ୍ତ ସମୟରେ ଜୀବିକା ହରାଇ ଥାନ୍ତି। ତେବେ ବର୍ଷାଦିନ ୪ମାସ ଝଡ ବାତ୍ୟା ଭୟ ରହେ। ଏହି ବର୍ଷାଦିନରେ ଜୀବନ ଜୀବିକା ପାଇଁ ଆମ୍ଭେମାନେ ବନ୍ୟା ଜଳକୁ ଅପେକ୍ଷା କରିଥାଉ।
ବନ୍ୟା ଜଳ ସମୁଦ୍ରରେ ମିଶିଲେ ଗଭୀର ଜଳରାଶିରୁ ଇଲିଶି ମାଛ କୂଳ ଅଭିମୁଖେ ମାଟି ମିଶ୍ରିତ ବନ୍ୟା ଜଳ ଖାଇବାକୁ ଆସିଥାନ୍ତି। ମତ୍ସ୍ୟଜୀବୀମାନେ ଏହି ସମୟରେ ଇଲିଶି ଧରି ଭଲ ପଇସା ରୋଜଗାର କରିଥାନ୍ତି। ବର୍ଷକରେ ସବୁ ସମୟରେ ଏହି ମୂଲ୍ୟବାନ ସାମୁଦ୍ରିକ ମାଛ ମିଳେ ନାହିଁ। ଏହି ଇଲିଶି କିଲୋ ପ୍ରତି ବଜାର ଦର ଅଦ୍ୟାବଧି ୧ ହଜାରରୁ ୨ ହଜାର ଟଙ୍କାରୁ ଅଧିକ ରହିଛି ବୋଲି କୁହାଯାଇଛି। ବ୍ଲକର ଜମ୍ବୁ, ବତିଘର, ଟୁବି, ଖରିନାସୀ, ରାମନଗର, ବଉଳକଣି, ସୁନିତି, ତନ୍ତିଆପାଳ ଆଦି ଅଞ୍ଚଳର ମତ୍ସ୍ୟଜୀବୀ ବର୍ଷାଦିନରେ ସମୁଦ୍ରରୁ ଇଲିଶି ସମେତ ବିଭିନ୍ନ ପ୍ରଜାତିର ସାମୁଦ୍ରିକ ମାଛ ଧରି ପରିବାର ପ୍ରତିପୋଷଣ କରନ୍ତି।
