ନୂଆଦିଲ୍ଲୀ,୧୪।୭(ପି.ଟି.): ଆଗାମୀ ଟୋକିଓ ଅଲିମ୍ପିକ୍ସରେ ଦୀପକ କାବ୍ରା ପ୍ରଥମ ଭାରତୀୟ ଜିମ୍ନାଷ୍ଟିକ୍ ଜଜ୍ ଭାବେ ଦାୟିତ୍ୱ ତୁଲାଇବେ। ଜଣେ ଜିମ୍ନାଷ୍ଟ ଭାବେ ଅଲିମ୍ପିକ୍ସରେ ଅଂଶଗ୍ରହଣ କରି ନ ଥିଲେ ମଧ୍ୟ ଜଜ୍ ଭାବେ ଦାୟିତ୍ୱ ତୁଲାଇବାକୁ ଯାଉଥିବାରୁ ଦୀପକଙ୍କ ସ୍ବପ୍ନ ସାକାର ହୋଇଛି।
ଅଲିମ୍ପିକ୍ସରେ କାବ୍ରା ପୁରୁଷ ଆର୍ଟିଷ୍ଟିକ ଜିମ୍ନାଷ୍ଟ ଇଭେଣ୍ଟରେ ଜଜ୍ ରହିବେ। ଗତବର୍ଷ ମାର୍ଚ୍ଚରେ ଏ ନେଇ ଆମନ୍ତ୍ରଣ ପାଇଥିଲି। ତେବେ କେଭିଡ୍-୧୯ କାରଣରୁ ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚି ଯାଇଥିଲା। ଫଳରେ ଗୋଟିଏ ବର୍ଷ ମୋତେ ଉତ୍କଣ୍ଠାର ସହ ଅପେକ୍ଷ କରିବାକୁ ପଡିଥିଲା। ଗତ ଏପ୍ରିଲରେ ପୁଣିଥରେ ମୋତେ ଏ ସଂକ୍ରାନ୍ତରେ ସୂଚନା ମିଳିଥିଲା। ତେବେ ମହାମାରୀର ପ୍ରକୋପ ଜାରି ରହିଥିବାରୁ ଅଲିମ୍ପିକ୍ସ ଆୟୋଜନ ନେଇ ଅନିଶ୍ଚିତତା ଜାରି ରହିଥିଲା। ତେବେ ଶେଷରେ ମୋର ସ୍ପପ୍ନ ପୁରଣ ହେବାକୁ ଯାଉଛି ୩୩ ବର୍ଷୀୟ ଦୀପକ କହିଛନ୍ତି। ଜଣେ ଆଥଲେଟ ହେବା ପାଇଁ ମୋର ସେଭଳି ମୌଳିକ ଦକ୍ଷତା ନ ଥିଲା। ଫଳରେ ଜିମ୍ନାଷ୍ଟ ହେବାର ଅଭିଳାଷକୁ ତ୍ୟାଗ କରିଥିଲି। ମୋ କୋଚ୍ କୌଶିକ ବେଡିଓ୍ବାଲା ମଧ୍ୟ ଜଣେ ଜଜ୍। ତାଙ୍କଠାରୁ ପ୍ରେରଣ ପାଇ କୋର୍ସ କରିଥିଲି ଓ ୨୦୦୯ରେ ଶୀର୍ଷରେ ରହିଥିଲି ବୋଲି ସେ କହିଛନ୍ତି।
ଭାରତରେ ଅନୁଷ୍ଠିତ ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ାରେ ସେ ପ୍ରଥମଥର ପାଇଁ କୌଣସି ଅନ୍ତର୍ଜାତୀୟ ଇଭେଣ୍ଟରେ ଦାୟିତ୍ୱରେ ରହିଥିଲେ। ସେହିପରି ସେ ପ୍ରଥମ ଭାରତୀୟ ଭାବେ ୨୦୧୪ ଏସିଆନ ଗେମ୍ସ ଓ ୟୁଥ ଗେମ୍ସରେ ଇଭେଣ୍ଟ ପରିଚାଳନା କରିଥିଲେ। ୨୦୧୮ରେ ମଧ୍ୟ ସେ ଏସିଆନ ଗେମ୍ସ ଓ ରାଜ୍ୟଗୋଷ୍ଠୀ କ୍ରୀଡ଼ାରେ ମଧ୍ୟ ସମାନ ଦାୟିତ୍ୱ ପାଇଥିଲେ। ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ାରେ ସେ ସର୍ବକନିଷ୍ଠ ଜଜ୍ ଭାବେ କାର୍ଯ୍ୟ କରିଥିଲେ। ଏପର୍ଯ୍ୟନ୍ତ ସେ ୨୦ଟି ମେଜର ଇଭେଣ୍ଟ ପରିଚାଳନା କରିଛନ୍ତି। ଅଲିମ୍ପିକ୍ସରେ ପ୍ରଣତି ନାୟକ ଜିମ୍ନାଷ୍ଟିକ୍ରେ ଅଂଶଗ୍ରହଣ କରିବେ। ସେ ୨୦୧୯ ଏସିଆନ ଆର୍ଟିଷ୍ଟିକ ଜିମ୍ନାଷ୍ଟିକ୍ରେ ବ୍ରୋଞ୍ଜ୍ ପଦକ ଜିତିଥିଲେ।
