ଛେଣ୍ଡିପଦା, ୩୦ା୧(ସ୍ବ.ପ୍ର.) ସାହି ସାହି ବୁଲୁଛି ମିଲ୍କ ଭ୍ୟାନ୍। ଏଟିଏମ୍ରୁ ଟଙ୍କା ବାହାରିବା ଭଳି ସେଥିରୁ ବାହାରୁଛି ଉନ୍ନତମାନର କ୍ଷୀର। ଅନୁଗୋଳ ଜିଲାରେ ପ୍ରଥମ ଥର ଏଭଳି ଦୁଗ୍ଧ ଏଟିଏମ୍ ଆରମ୍ଭ କରି ଚର୍ଚ୍ଚିତ ଚେହେରା ପାଲଟିଛନ୍ତି ଛେଣ୍ଡିପଦା ବ୍ଲକ ବରସାହି ପଞ୍ଚାୟତ ଖମାର ଗ୍ରାମର ଚିନ୍ମୟ ସାହୁ। ଏମ୍ସିଏ ପଢୁଆ ଏହି ଉଚ୍ଚଶିକ୍ଷିତ ଯୁବକଙ୍କ ବ୍ୟବସାୟ ଦିନକୁ ଦିନ ବୃଦ୍ଧି ପାଉଥିବାବେଳେ କ୍ଷୀର ବିକ୍ରିର ଏଭଳି ଅଭିନବ କୌଶଳ ବାହାର କରି ସେ ପାଲଟିଛନ୍ତି ଯୁବପିଢ଼ିଙ୍କ ପାଇଁ ପ୍ରେରଣା।
୨୦୧୩ରେ ଏମ୍ସିଏ ଶିକ୍ଷା ଶେଷ ପରେ ଅନ୍ୟମାନଙ୍କ ଭଳି ପ୍ରଥମେ ଚାକିରି ପଛରେ ଦୌଡ଼ିଥିଲେ ଚିନ୍ମୟ। ହେଲେ ମନ ମୁତାବକ ଚାକିରି ମିଳି ନ ଥିଲା। ସେ ଘରେ ବେରୋଜଗାର ହୋଇ ବସିରହିଥିଲେ। ଘରର ଦାୟିତ୍ୱ ମୁଣ୍ଡାଇବା ଏବଂ ଆତ୍ମନିର୍ଭରଶୀଳ ହେବା ପାଇଁ ରୋଜଗାର ଚିନ୍ତାରେ ଥିବାବେଳେ ସୋସିଆଲ ମିଡିଆରୁ ଦୁଗ୍ଧ ଏଟିଏମ ସମ୍ପର୍କରେ ଜାଣିଥିଲେ। ଏହାପରେ ଦୁଗ୍ଧ ଶିତଳୀକରଣ ଟାଙ୍କି ତିଆରି କରି ସେଥିରେ ଅନ୍ଲାଇନ୍ରୁ ଏଟିଏମ୍ ମେଶିନ କିଣି ଲଗାଇଥିଲେ। ଏହାକୁ ଏକ ଅଟୋରିକ୍ସାରେ ସଂଯୋଗ କରି ଚାଷୀଙ୍କ ଠାରୁ ଦୁଗ୍ଧ ସଂଗ୍ରହ ଆରମ୍ଭ କଲେ। ପ୍ରଥମେ ସ୍ଥାନୀୟ ଅଞ୍ଚଳର ବ୍ୟବସାୟିକ ପେଣ୍ଠସ୍ଥଳରେ ଗାଡ଼ି ରଖି ଦୁଗ୍ଧ ବିକ୍ରି ଆରମ୍ଭ କରିଥିଲେ। ଜିଲା ସଦରରେ ଦୁଗ୍ଧର ଅଧିକ ଚାହିଦା ଥିବା ଜାଣିବା ପରେ ସେ ଏବେ ଘରଠାରୁ ୫୦ କି.ମି. ଦୂର ଅନୁଗୋଳ ସହରରେ କ୍ଷୀର ବିକ୍ରି ଆରମ୍ଭ କରିଛନ୍ତି। ଅନୁଗୋଳରେ ପ୍ରଥମ ଦିନ ମାତ୍ର ୧୩ ଲିଟର ଦୁଗ୍ଧ ବିକ୍ରି କରିଥିବାବେଳେ ଏହା ଏବେ ବୃଦ୍ଧି ପାଇ ୮୦ ଲିଟରରେ ପହଞ୍ଚତ୍ଛି। ଅନୁଗୋଳ ବାଳିକା ଉଚ୍ଚ ବିଦ୍ୟାଳୟ ନିକଟ ପାଲଟିଛି ଚିନ୍ମୟଙ୍କ ବ୍ୟବସାୟର ଠିକଣା।
ଏ ସଂକ୍ରାନ୍ତରେ ସେ କୁହନ୍ତି, ଘର ପାଖକୁ ଆସି କ୍ଷୀର କିଣି ନେଉଥିବାରୁ ଚାଷୀମାନେ ଉପକୃତ ହେଉଛନ୍ତି। ଆଗାମୀ ଦିନରେ ବ୍ୟବସାୟ ଆହୁରି ବଢ଼ିବ। ଏଭଳି ଦୁଗ୍ଧ ଏଟିଏମ୍ ଜରିଆରେ ଅଞ୍ଚଳର ଶିକ୍ଷିତ ଯୁବତୀଯୁବକ ଆତ୍ମନିର୍ଭରଶୀଳ ହୋଇପାରିବେ। ଅନ୍ୟପଟେ ଚିନ୍ମୟଙ୍କ ଏଭଳି ପ୍ରୟାସକୁ ଅଞ୍ଚଳର ଦୁଗ୍ଧ ଚାଷୀ ପ୍ରଶଂସା କରିଛନ୍ତି।