ଭୁବନେଶ୍ୱର,୧୨।୬(ବ୍ୟୁରୋ): ସମାଜର ବିଭିନ୍ନ ସ୍ରୋତରେ ନିଜକୁ ସାମିଲ କରି କୁସଂସ୍କାର ଦୂର କରିଥିଲେ ପ୍ରଫେସର ରାଧାମୋହନ। ସମାନତା ଆଣିବା ଦିଗରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା। କେତେବେଳେ ଅଧ୍ୟାପକ ସାଜି ଛାତ୍ରୀଛାତ୍ରଙ୍କ ଭିତରେ ନୈତିକତା ଆଣିଛନ୍ତି ତ ଆଉ କେତେବେଳେ ପରିବେଶ ସୁରକ୍ଷା ଦିଗରେ ପ୍ରେରଣା ଦେଇଛନ୍ତି। ବିଶେଷକରି ଜୈବିକ ଚାଷ ପଦ୍ଧତି ମଣିଷ ସମାଜ ପାଇଁ ବରଦାନ ଥିଲା, ଯାହା ତାଙ୍କୁ ପରିଚିତ କରାଇଥିଲା। ଏହି ପ୍ରଚେଷ୍ଟା ତାଙ୍କୁ ପଦ୍ମଶ୍ରୀ ସମ୍ମାନ ଆଣି ଦେଇଥିଲା ବୋଲି ଆନ୍ଧ୍ରପ୍ରଦେଶ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ କହିଛନ୍ତି। ସମ୍ଭବ ଅନୁଷ୍ଠାନ ପକ୍ଷରୁ ଶନିବାର ସୂଚନାଭବନଠାରେ ପଦ୍ମଶ୍ରୀ ପ୍ରଫେସର ରାଧାମୋହନଙ୍କ ପ୍ରଥମ ଶ୍ରାଦ୍ଧବାର୍ଷିକୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ବିଶ୍ୱଭୂଷଣ କହିଲେ, ବର୍ତ୍ତମାନ ସମୟରେ ରାସାୟନିକ ସାର ପ୍ରୟୋଗଜନିତ ଖାଦ୍ୟ ମଣିଷକୁ ରୁଗ୍ଣ କରୁଛି। ଜୈବିକ ଚାଷକୁ ଆପଣେଇଲେ ଏହା ମଣିଷ ସମାଜ ପାଇଁ ବରଦାନ ସଦୃଶ କାମ କରିବ। ପ୍ରଫେସର ରାଧାମୋହନ ହେଉଛନ୍ତି ଜୈବିକ ଚାଷର ଆଦର୍ଶ ଓ ପ୍ରେରଣାଦାତା। ଏକ ସୁନ୍ଦର ଓ ସୁସ୍ଥ ସମାଜ ଗଠନ ଦିଗରେ ତାଙ୍କ ଦିଗ୍ଦର୍ଶନ ସହାୟକ ହେବ ବୋଲି ରାଜ୍ୟପାଳ କହିଛନ୍ତି।
କାର୍ଯ୍ୟକ୍ରମରେ ସମ୍ଭବର ସଭାପତି ଡ. ଭଗବାନ ପ୍ରକାଶ ଓ ଭାରତ ସରକାରଙ୍କ ନିର୍ବାଚନ କମିଶନ ପରାମର୍ଶଦାତା ଡ. ଏ.କେ. ଯାଦବ ଉପସ୍ଥିତ ଥିଲେ। ଏହି ଅବସରରେ ନିଆଳି ନିକଟ ନରିଶସ୍ଥିତ ରାଜେନ୍ଦ୍ର ଦେଶୀ ଚାଷ ଗବେଷଣା କେନ୍ଦ୍ରର ପ୍ରମୁଖ ନଟବର ଷଡ଼ଙ୍ଗୀଙ୍କୁ ‘ପ୍ରଥମ ପ୍ରଫେସର ରାଧାମୋହନ ସ୍ମାରକୀ ସମ୍ମାନ’ରେ ସମ୍ମାନିତ କରାଯାଇଥିଲା। ସେହିପରି ଜୈବିକ କୃଷି ଓ ପରିବେଶ ସୁରକ୍ଷା କ୍ଷେତ୍ରରେ ଜୀବନବ୍ୟାପୀ ଅବଦାନ ପାଇଁ ପ୍ରଫେସର ରାଧାମୋହନଙ୍କ ସ୍ତ୍ରୀ ବିଜୟଲକ୍ଷ୍ମୀ ଗଡ଼ନାୟକଙ୍କୁ ସମ୍ବର୍ଦ୍ଧିତ କରାଯାଇଥିଲା। ଉତ୍ସବରେ ପ୍ରଫେସର ରାଧାମୋହନଙ୍କ ଜୀବନୀ ଉପରେ ଏକ ସଂକ୍ଷିପ୍ତ ବୃତ୍ତଚିତ୍ର ‘ମୋହନିରୁ ରାଧାମୋହନ : ଏକ ବିସ୍ମୟକର ରୂପାନ୍ତରଣ’, ସ୍ମରଣିକା ‘ଲକ୍ଷେ ବର୍ଷର ଆୟୁଷ’ ଓ ରାଧାମୋହନଙ୍କ କଲମ ନିସୃତ ଲେଖାର ସଂକଳନ ‘କିଏ କହିବ, କ’ଣ ହେବ’ ଏବଂ ‘ତ୍ରୁଟି କେଉଁଠି’କୁ ଅତିଥିମାନେ ଉନ୍ମୋଚନ କରିଥିଲେ।
