ଭୁବନେଶ୍ୱର, ୧୩।୧(ବ୍ୟୁରୋ): ଭୁବନେଶ୍ୱରସ୍ଥିତ ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଏମ୍ସ) କେବଳ ଦେଶର ସର୍ବୋତ୍ତମ ଚିକିତ୍ସା ପ୍ରତିଷ୍ଠାନ ନୁହେଁ, ସ୍ବଚ୍ଛତା ଓ ରୋଗୀ ପାଇଁ ନିରାପଦ ପରିବେଶ ଯୋଗାଇବାରେ ମଧ୍ୟ ନିଜକୁ ପ୍ରମାଣିତ କରିପାରିଛି। ଏମ୍ସକୁ ସ୍ବଚ୍ଛତା ପାଇଁ ପ୍ରଥମ କାୟାକଳ୍ପ ପୁରସ୍କାର ମିଳିଛି। ୨୦୧୯-୨୦ ବର୍ଷ ପାଇଁ କାୟାକଳ୍ପର ବର୍ଗ-‘ବି’ରେ ଏହି ପୁରସ୍କାର ମିଳିଛି। ପୁରସ୍କାର ବାବଦରେ ୨କୋଟି ଟଙ୍କା ଅର୍ଥରାଶି ପ୍ରଦାନ କରାଯାଇଛି।ମଙ୍ଗଳବାର ନୂଆଦିଲ୍ଲୀଠାରେ ଭର୍ଚୁଆଲ୍ ମୋଡ୍ରେ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ ଭୁବନେଶ୍ୱର ଏମ୍ସକୁ ପ୍ରଥମ କାୟାକଳ୍ପ ପୁରସ୍କାର ପ୍ରଦାନ କରିଛନ୍ତି। ହସ୍ପିଟାଲ୍ରେ ରକ୍ଷଣାବେକ୍ଷଣ, ପରିମଳ ଓ ସ୍ବଚ୍ଛତା, ବର୍ଜ୍ୟବସ୍ତୁ ପରିଚାଳନା, ସଂକ୍ରମଣ ନିୟନ୍ତ୍ରଣ, ସହାୟତା ସେବା ଏବଂ ସ୍ବଚ୍ଛତା ପ୍ରୋତ୍ସାହନ ଆଦି କ୍ଷେତ୍ରରେ ମୂଲ୍ୟାଙ୍କନ କରାଯାଇ ଏହି କାୟାକଳ୍ପ ପୁରସ୍କାର ପ୍ରଦାନ କରାଯାଇଥାଏ। ଉଲ୍ଲେଖଯୋଗ୍ୟ, ଭୁବନେଶ୍ୱର ଏମ୍ସ ଗତ ତିନିବର୍ଷ ହେବ କାୟାକଳ୍ପ ପୁରସ୍କାର ପାଇବାରେ ସକ୍ଷମ ହୋଇପାରିଛି। ୨୦୧୭-୧୮ ଓ ୨୦୧୮-୧୯ରେ ବର୍ଗ-ବିରେ ଦ୍ୱିତୀୟ ସ୍ଥାନ ଅଧିକାର କରିଥିବାବେଳେ ୨୦୧୯-୨୦ରେ ପ୍ରଥମ ସ୍ଥାନ ଅଧିକାର କରିବା ସହିତ ଏକ କୋଟି ଟଙ୍କା ଅର୍ଥରାଶି ପାଇଛି। ଏଥିପାଇଁ ଏମ୍ସ ନିର୍ଦ୍ଦେଶିକା ଡା. ଗୀତାଞ୍ଜଳି ବାଟମେନବେନ, ମେଡିକାଲ ସୁପରିଣ୍ଟେଣ୍ଡେଣ୍ଟ ଡା. ସଚ୍ଚିଦାନନ୍ଦ ମହାନ୍ତି, ଡିଡିଏ ପି. କେ. ରାୟଙ୍କ ନେତୃତ୍ୱରେ ଏକ ବହୁମୁଖୀ ଦଳ ଗଠନ କରାଯାଇଥିଲା। ଯୁଗ୍ମ ମେଡିକାଲ ଅଧିକାରୀ ତଥା ହସ୍ପିଟାଲ ପ୍ରଶାସନର ଏଚ୍ଓଡି ଡା. ଜବାହାର ଏସ୍. କେ. ପଲ୍ଲାଇ ଏହି କାୟାକଳ୍ପ ପାଇଁ ଭୁବନେଶ୍ୱର ଏମ୍ସର ନୋଡାଲ ଅଧିକାରୀ ଦାୟିତ୍ୱରେ ରହିଥିଲେ।
