ଟୋକିଓ, ୨୪ା୭ (ଏପି)-ସୂର୍ଯ୍ୟଙ୍କ ଦ୍ୱାରା ଅନୁପ୍ରାଣିତ ହୋଇ ଏଥର ଅଲିମ୍ପିକ କଲ୍ଡ୍ରନକୁ ସ୍ବତନ୍ତ୍ର ଭାବେ ଡିଜାଇନ୍ କରାଯାଇଛି। ଅଲିମ୍ପିକ ଅଗ୍ନିଶିଖାର ପ୍ରଜ୍ୱଳନ ପାଇଁ ଜାଳେଣି ରୂପେ ପ୍ରଥମ ଥର ହାଇଡ୍ରୋଜେନକୁ ବ୍ୟବହାର କରାଯାଇଛି। ଟୋକିଓ ଗେମ୍ସ ପାଇଁ ଏଥର ଦୁଇଟି କଲ୍ଡ୍ରନ ପ୍ରସ୍ତୁତ କରାଯାଇଛି। ତନ୍ମଧ୍ୟରୁ ଗୋଟିଏ ଟୋକିଓସ୍ଥିତ ନ୍ୟାଶନାଲ ଷ୍ଟାଡିୟମ ଏବଂ ଅନ୍ୟଟି ଟୋକିଓ ସମୁଦ୍ର ଉପକୂଳବର୍ତ୍ତୀ ଓ୍ବାଟରଫ୍ରଣ୍ଟରେ ଶୋଭାପାଉଛି। ପୂର୍ବରୁ ସାଧାରଣତଃ ଅଲିମ୍ପିକ କଲଡ୍ରନ ପ୍ରଜ୍ଜ୍ୱଳନରେ ପ୍ରୋପେନ୍, ମାଗ୍ନେସିୟମ, ଗନ୍ପାଉଡର, ରେସିନ ଏବଂ ୧୯୨୮ ଆମଷ୍ଟରଡାମ୍ ଗେମ୍ସରେ ବ୍ୟବହୃତ ପ୍ରଥମ ଆଧୁନିକ କଲଡ୍ରନ୍ରେ ଅଲିଭ ତେଲ ବ୍ୟବହାର କରାଯାଇ ଆସୁଥିଲା। ଏହାର ୮ବର୍ଷ ପରେ ବର୍ଲିନଠାରେ ଟର୍ଚ୍ଚ ରିଲେ ପ୍ରଚଳନ ହୋଇଥିଲା। ପ୍ରୋପେନ୍ ଭଳି ହାଇଡ୍ରୋଜେନ୍ରୁ କାର୍ବନ ଡାଇଅକ୍ସାଇଡ୍ ନିର୍ଗତ ହୋଇ ନ ଥାଏ। ଟୋକିଓ କଲ୍ଡ୍ରନ ପାଇଁ ଫୁକୁଶିମାସ୍ଥିତ ଏକ କାରଖାନା ହାଇଡ୍ରୋଜେନ୍ ଯୋଗାଇ ଦେଉଛି। ଟର୍ଚ୍ଚ ରିଲେ ସମୟରେ କିନ୍ତୁ ଉଭୟ ପ୍ରୋପେନ୍ ଓ ହାଇଡ୍ରୋଜେନ ବ୍ୟବହାର କରାଯାଇଥିଲା। ସ୍ବଳ୍ପ ପରିମାଣ କାର୍ବନ ନିର୍ଗତ ହୋଇପାରୁଥିବା ଭଳି ଟର୍ଚ୍ଚ ବ୍ୟବହାର ପାଇଁ ୨୦୧୨ରେ ଲଣ୍ଡନ ଗେମ୍ସର ଆୟୋଜକଙ୍କ ପକ୍ଷରୁ ଏକ ଯୋଜନା ଚାଲିଥିଲା, ମାତ୍ର ଠିକଣା ସମୟରେ ଏହାର ଡିଜାଇନ୍ ପ୍ରସ୍ତୁତ ହୋଇ ପାରି ନ ଥିଲା। ଶେଷରେ ସେମାନେ ପ୍ରୋପେନ୍ ଓ ବୁଟାନେର ମିଶ୍ରଣକୁ ବ୍ୟବହାର କରିଥିଲେ। ରିଓରେ ୨୦୧୬ରେ ବ୍ରାଜିଲ ଅଫିସିଆଲମାନେ ଜାଳେଣିର ଆବଶ୍ୟକତାକୁ ହ୍ରାସ କରିବାକୁ ଯାଇ କଲ୍ଡ୍ରନର ଆକାରକୁ ଛୋଟ କରିଥିଲେ। କାନାଡାର ଓକି ସାଟୋ ନାମକ ସ୍ଥପତି ଟୋକିଓ କଲ୍ଡ୍ରନର ଡିଜାଇନ କରିଛନ୍ତି।