ତିହିଡ଼ି, ୧୬ା୯(ସ୍ବ.ପ୍ର.)- ତିହିଡ଼ି ବ୍ଲକରେ ଚଳିତ ବନ୍ୟା ଯୋଗୁ ୧୧ ପଞ୍ଚାୟତର ୫୦ ପ୍ରତିଶତ ଧାନ ଚାଷ କ୍ଷତିଗ୍ରସ୍ତ ହୋଇଥିବା ନେଇ ବ୍ଲକ କୃଷି ବିଭାଗ ପକ୍ଷରୁ ଜିଲାପାଳଙ୍କୁ ରିପୋର୍ଟ ପ୍ରଦାନ କରାଯାଇଛି। ନିକଟରେ ଲଘୁଚାପ ଜନିତ ଲଗାଣ ବର୍ଷା ଯୋଗୁ ତିହିଡ଼ି ବ୍ଳକର ବିଭିନ୍ନ ତଳିଆ ପଞ୍ଚାୟତର ଗାଁ ଗଣ୍ଡାରେ ବନ୍ୟା ପାଣି ପ୍ରବେଶ କରିବା ସହିତ ଧାନ ଜମିରେ ଜମି ରହିଥିଲା। ପୂର୍ଣ୍ଣମୀ ତିଥି ଥିବାରୁ ବନ୍ୟା ପାଣି ତଳକୁ ଗଡ଼ି ନପାରି ପ୍ରାୟ ସପ୍ତାହେ ଧରି ଚାଷ ଜମିରେ ଜମି ରହିଥିଲା। ଅନ୍ୟପକ୍ଷରେ ପାଣି ନିଷ୍କାସନର ଅନ୍ୟ କୌଣସି ବିକଳ୍ପ ନଥିବାରୁ ଖାଲୁଆ ଜମି ଗୁଡ଼ିକରେ ପାଣି ଜମି ରହି ଧାନ ଫସଲକୁ ନଷ୍ଟ କରି ଦେଇଥିଲା। ଚଳିତ ବର୍ଷ ବ୍ଲକର ୩୧ ପଞ୍ଚାୟତରେ ମୋଟ ୨୦ ହଜାର ୬ଶହ ୨୩ ହେକ୍ଟର ଜମିରେ ଧାନ ଚାଷ ହୋଇଥିବା ବେଳେ ବିଲଣା, ବାରୋ, ବୋଡ଼କ, ବାରସର, ଗୋବିନ୍ଦପୁର, କାଁପଡ଼ା, ଶ୍ୟାମସୁନ୍ଦରପୁର, ସିନ୍ଦୋଳ, କୋହ୍ଲ, ଦୌଲତପୁର ଓ ହରିସିଂପୁର ପଞ୍ଚାୟତର ୫ହଜାର ୪୩୩ ହେକ୍ଟର ଜମିରେ ଧାନ ଚାଷ ନଷ୍ଟ ହୋଇଥିବା ବ୍ଲକ କୃଷି ବିଭାଗ ପକ୍ଷରୁ ତଦନ୍ତ କରାଯାଇଛି। ଅନ୍ୟ ୨୦ଟି ପଞ୍ଚାୟତରେ ଧାନ ଚାଷରେ ୫୦ ପ୍ରତିଶତରୁ କମ କ୍ଷୟ କ୍ଷତି ହୋଇଥିବାର ରିପୋର୍ଟ ମଧ୍ୟ ପ୍ରଦାନ କରାଯାଇଛି। ଏଠାରେ ସୂଚନାଯୋଗ୍ୟ ଯେ ଚଳିତ ବର୍ଷ କରୋନା କଟକଣା ସହିତ ପ୍ରତିକୂଳ ପାଗ ଯୋଗୁ ଚାଷୀମାନେ ବହୁ କଷ୍ଟ ସ୍ବୀକାର କରି ଧାନ ଚାଷ କରିଥିଲେ। ସେହିପରି ବିଭିନ୍ନ ବ୍ୟାଙ୍କ, ସମବାୟ ସମିତି ତଥା ହାତଉଦ୍ଧାରି ଋଣକରଜ କରି ଚାଷରେ ବିନିଯୋଗ କରିଥିଲେ। ମାତ୍ର ବନ୍ୟା ଜନିତ ଦୈବ ଦୁର୍ବିପାକ ଏଥିରେ ପ୍ରତିବନ୍ଧକ ସୃଷ୍ଟି କରିଛି। ଯାହା ଫଳରେ ସେମାନଙ୍କର ବର୍ଷକର ସମ୍ବଳ ଉଜୁଡ଼ି ଯାଇଛି। ବର୍ଷକର ଦାନା ଉଜୁଡ଼ି ଯାଇଥିବାରୁ ପରିବାର ପ୍ରତିପୋଷଣ ନେଇ ଚାଷୀ ମୁଣ୍ଡରେ ଚଡ଼କ ପଡିଯାଇଛି। ସରକାରଙ୍କ ପକ୍ଷରୁ ଏହାର ତଦନ୍ତ କରାଯାଇ ସେମାନଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରାଯିବାକୁ ଚାଷୀମାନେ ଦାବି କରିଛନ୍ତି।