ଅମ୍ବାଭୋନା,୧୭।୮(ଡି.ଏନ.ଏ): କ୍ରମାଗତ ଲଘୁଚାପ ଜନିତ ଲଗାଣ ବର୍ଷା ସାଙ୍ଗକୁ ଛତିଶଗଡ଼ କଲ୍ମା, ସାରାଡ଼ିହି, ସରଗୁଜା ବ୍ୟାରେଜ ଏବଂ ରାୟପୁର ସ୍ଥିତ ଗାଁଗରେଲ ଡ୍ୟାମ୍ରୁ ମହାନଦୀକୁ ଅଧିକ ବନ୍ୟାଜଳ ଛଡ଼ାଯିବା ଯୋଗୁ ମହାନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଫଳରେ ହୀରାକୁଦ ଜଳଭଣ୍ଡାରର ପଛୁଆ ପାଣି ୫ଦିନ ହେଲା ବରଗଡ଼ ଜିଲା ଅମ୍ବାଭୋନା ବ୍ଲକର ଚିଖିଲି, ଅନ୍ତରାଡ଼ି, ଘୁଘୁରାପାଲି, ବେନିଆପାଲି, ବରଙ୍ଗାକୋଟ୍ ଆଦି ଗ୍ରାମର ତଳିଆ ଅଞ୍ଚଳରେ ଥିବା ଚାଷଜମି ଉପରେ ୫ ଫୁଟ୍ର ବନ୍ୟାଜଳ ପ୍ରବାହିତ ହୋଇଛି। ଏଥିଯୋଗୁ ଧାନ, ପରିବା ଚାଷ ଉଜୁଡ଼ି ଯାଇଛି। ତିନିଦିନ ଧରି ବନ୍ୟାଜଳ ଚିଖିଲି ଗ୍ରାମକୁ ଜଳବନ୍ଦୀ କରି ରଖିଛି। ଅନ୍ତରାଡ଼ି, ଘୁଘୁରାପାଲି ଆଦି ଗ୍ରାମର ହରିଜନ ବସ୍ତିରେ ପାଣି ମାଡ଼ି ଯାଇ ବହୁ କଚ୍ଚା ଘର, ଗୁହାଳ ଭାଙ୍ଗି ଯାଇଛି। ଗାଈଗୋରୁଙ୍କ ପାଇଁ ସଂରକ୍ଷିତ ପାଳଗଦା ବନ୍ୟାରେ ଭାସି ଯାଇଛି। ବନ୍ୟା ବିପନ୍ନଙ୍କୁ ଆଶ୍ରୟସ୍ଥଳୀରେ ରନ୍ଧାଖାଦ୍ୟ ଯୋଗାଇ ଦିଆଯାଉଛି। ଏହି କ୍ରମରେ ବରଗଡ଼ ଜିଲାପାଳ ମୋନିଷା ବାନାର୍ଜୀ, ଏସ୍ପି ସ୍ମିତ୍ ପି. ପରମାର୍, ବିଧାୟକ ସୁଶାନ୍ତ ସିଂ ବନ୍ୟାଞ୍ଚଳ ପରିଦର୍ଶନ କରି ବନ୍ୟା ବିପନ୍ନଙ୍କ ଦୁଃଖ ଦୁର୍ଦ୍ଦଶା ବୁଝିଛନ୍ତି। ବନ୍ୟା କ୍ଷତିଗ୍ରସ୍ତଙ୍କୁ ପ୍ରାକୃତିକ ବିପର୍ଯ୍ୟୟ ପ୍ରଶମନ ପାଣ୍ଠିରୁ କ୍ଷତିପୂରଣ ରାଶି ଯୋଗାଇ ଦିଆଯିବ ବୋଲି ଜିଲାପାଳ ବାନାର୍ଜୀ ସୂଚନା ଦେଇଛନ୍ତି।
ଲୋକମାନଙ୍କ ଜୀବନ, ଜୀବିକା ଏବଂ ବଞ୍ଚତ୍ବାର ରାହାକୁ ବନ୍ୟା ଉଜାଡ଼ି ଦେଇଛି। ମତ୍ସ୍ୟଜୀବୀଙ୍କ ମାଛମରା ଜାଲ, ଡଙ୍ଗା ଭସି ଯାଇଛି। ଧାନ, ଚାଉଳ, ଗହମ, ମୁଗ, ବିରି ଆଦି ଓଦା ହୋଇ ନଷ୍ଟ ହୋଛି। ଚିଖିଲି, ଅନ୍ତରାଡି, ବେନିଆପାଲି ଗ୍ରାମରେ ବନ୍ଧ, କଟା, ଗାଡ଼ିଆ ଆଦି ସ୍ଥାନରେ ମାଛଚାଷ କରିଥିବା ଚାଷୀମାନେ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛନ୍ତି। ଜାଳେଣି କାଠ, ଗୋବର ଜାଳେଣି ଆଦି ବନ୍ୟାରେ ଭାସି ଯାଇଛି। ପରିବାରର ଜଣେ ଲେଖାଏଁ ଘର ଜଗି ରହିଥିବାବେଳେ ଅନ୍ୟମାନେ ବନ୍ୟା ଆଶ୍ରୟସ୍ଥଳୀରେ ରହିଛନ୍ତି। ଗ୍ରାମରୁ ବନ୍ୟାଜଳ କମିଥିଲେ ସୁଦ୍ଧା ଏବେ ମଧ୍ୟ ଗ୍ରାମ ଜଳବନ୍ଦୀ ହୋଇ ରହିଛି। ଆଗକୁ ପୁଣି ଲଘୁଚାପ ଜନିତ ବର୍ଷା ଆଶଙ୍କା ଥିବାରୁ ଉକ୍ତ ଗ୍ରାମବାସୀ ଚିନ୍ତିତ ହୋଇପଡ଼ିଛନ୍ତି।