ଜବଲପୁର,୬ା୧୧:ମଧ୍ୟପ୍ରଦେଶର ଜବଲପୁର ଜିଲା ଚରଗାଓଁସ୍ଥିତ ଦେଓରି ତାପରିଆ ଗ୍ରାମରେ ମାଛି ଦ୍ୱାରା ଏକ ହତ୍ୟା ମାମଲାର ସମାଧାନ ହୋଇପାରିଛି। ମାଛି ଯୋଗୁ ପୋଲିସ ହତ୍ୟାକାରୀଙ୍କୁ ଧରିବାରେ ସଫଳ ହୋଇଥିବା ନେଇ ମଙ୍ଗଳବାର ଜବଲପୁର ଅତିରିକ୍ତ ଆରକ୍ଷୀ ଅଧୀକ୍ଷକ(ଗ୍ରାମୀଣ) ସୋନାଲି ଦୁବେ ସୂଚନା ଦେଇଛନ୍ତି। ସେ କହିଛନ୍ତି, ଗତ ୧ ତାରିଖରେ ମନୋଜ ଠାକୁର(୨୬) ନାମକ ଜଣେ ବ୍ୟକ୍ତି ଚାଷକାର୍ଯ୍ୟ ପାଇଁ ଜମିକୁ ଯାଇଥିବାବେଳେ ସାରେ ଆଉ ଫେରି ନ ଥିଲେ। ୨ ତାରିଖ ସକାଳେ ଦେଓରି ତାପରିଆ ଗ୍ରାମର ଏକ ଚାଷଜମିରୁ ତାଙ୍କ ମୃତଦେହ ରକ୍ତାକ୍ତ ଅବସ୍ଥାରେ ପଡ଼ିଥିବାର ଦେଖିବାକୁ ମିଳିଥିଲା। ମୃତଦେହ ନିକଟରେ ରକ୍ତଛିଟା ଲାଗିଥିବା ଏକ ଠେଙ୍ଗା ମଧ୍ୟ ପଡ଼ିଥିଲା। ଚରଗାଓଁ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। କେହି ଜଣେ ଠେଙ୍ଗାରେ ପିଟି ପିଟି ମନୋଜଙ୍କୁ ହତ୍ୟା କରିଥିବା ନେଇ ପୋଲିସ ସନ୍ଦେହ କରିଥିଲା। ଚରଗାଓଁ ଥାନା ଇନ୍ସ୍ପେକ୍ଟର ଅଭିଷେକ ପ୍ୟାସି କହିଛନ୍ତି, ହତ୍ୟାର ଗୋଟିଏ ଦିନ ପୂର୍ବରୁ ମନୋଜଙ୍କୁ ଶେଷଥର ପାଇଁ ତାଙ୍କ ପୁତୁରା ଧରମ ଠାକୁରଙ୍କ ସହ ଚରଗାଓଁର ଏକ ବଜାରରେ ଦେଖିବାକୁ ମିଳିଥିଲା। ସେତେବେଳେ ଉଭୟ ମଦ ଏବଂ ଚିକେନ କିଣୁଥିବା ନେଇ ସିସିଟିଭି ଫୁଟେଜରୁ ଜଣାପଡ଼ିଥିଲା ବୋଲି ଅଭିଷେକ କହିଛନ୍ତି। ସିସିଟିଭି ଫୁଟେଜ୍ ଆଧାରରେ ଧରମଙ୍କ ଉପରେ ପୋଲିସର ସନ୍ଦେହ ବଢ଼ିଥିଲା। ସୋମବାର ପୋଲିସ ଧରମଙ୍କୁ ଏହି ହତ୍ୟା ମାମଲାରେ ଜେରା କରିଥିଲା। ଜେରା ସମୟରେ ହତ୍ୟା ଦିନ ଦାଦା ମନୋଜଙ୍କ ସହ ମିଶି ଦେଓରି ତାପରିଆ ଗ୍ରାମର ଚାଷଜମିରେ ମଦ ଓ ଚିକେନର ପାର୍ଟି କରିଥିବା ନେଇ ଧରମ ସ୍ବୀକାର କରିଥିଲା। ହେଲେ ସେ ଉକ୍ତ ପାର୍ଟିରେ କୌଣସି ବିବାଦ କିମ୍ବା ମାରପିଟ ହୋଇଥିଲା ବୋଲି ମାନି ନ ଥିଲା। ପଚରାଉଚରାବେଳେ ଧରମ ପିନ୍ଧିଥିବା ଶାର୍ଟରେ ବାରମ୍ବାର ମାଛି ଆସି ବସୁଥିବା ନେଇ ପୋଲିସ ଦେଖିବାକୁ ପାଇଥିଲା। ଫଳରେ ତାଙ୍କ ଶାର୍ଟରେ ରକ୍ତଛିଟା ଲାଗିଥିବାର ପୋଲିସ ସନ୍ଦେହ କରିଥିଲା। ତେଣୁ ପୋଲିସ ଧରମଙ୍କ ଶାର୍ଟ କାଢ଼ି ଏହାର ଫରେନ୍ସିକ୍ ଯାଞ୍ଚ କରାଇଥିଲା। ଫରେନ୍ସିକ ରିପୋର୍ଟରେ ଧରମଙ୍କ ଶାର୍ଟରେ ଥିବା ରକ୍ତଛିଟାର ଦାଗ ହତ୍ୟାକାଣ୍ଡ ଘଟାଇଥିବା ଠେଙ୍ଗାର ରକ୍ତଦାଗ ସହ ମେଳ ଖାଇଥିଲା। ଏହି ପ୍ରମାଣକୁ ଆଧାର କରି ପୋଲିସ ମଙ୍ଗଳବାର ଧରମକୁ ଗିରଫ କରି କୋର୍ଟ ଚାଲାଣ କରିଛି। ମଦ ଏବଂ ଚିକେନ ପାର୍ଟି ସମୟରେ ମନୋଜ ନିଜ ପୁତୁରା ଧରମଙ୍କୁ କିଛି ଅର୍ଥ ଉଧାରରେ ମାଗିଥିଲେ। ଫଳରେ ଉଭୟଙ୍କ ମଧ୍ୟରେ ଟଙ୍କା ଦେଣନେଣକୁ ନେଇ ବିବାଦ ଦେଖାଦେଇଥିଲା ଓ ଧରମ କ୍ରୋଧାନ୍ବିତ ହୋଇ ଦାଦା ମନୋଜଙ୍କୁ ଠେଙ୍ଗାରେ ପିଟି ପିଟି ହତ୍ୟା କରିଥିଲେ ଏବଂ ଘଟଣାସ୍ଥଳରୁ ଖସି ପଳାଇଥିଲେ ବୋଲି ଜବଲପୁର ଗ୍ରାମୀଣ ଏଏସ୍ପି ସୋନାଲି ଦୁବେ କହିଛନ୍ତି।