ବଇଣ୍ଡା,୧୭।୪(ଡି.ଏନ.ଏ): ଅନୁଗୋଳ ଜିଲା କିଶୋରନଗର ବ୍ଲକ ବାମୁରଠାରେ ନିର୍ମାଣାଧୀନ ୫୫ନଂ. ଜାତୀୟ ରାଜପଥ ଫ୍ଲାଏଓଭର କାମ ନିମ୍ନମାନର ହେଉଥିବା ଅଭିଯୋଗ ହୋଇଛି। ଏ ନେଇ ସରପଞ୍ଚ ସଞ୍ଜୀବ କୁମାର ପ୍ରଧାନ ଶୁକ୍ରବାର ଅନୁଗୋଳ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି।
ଅଭିଯୋଗପତ୍ରରେ ଦର୍ଶାଯାଇଛି, କଟକ-ସମ୍ବଲପୁର ୫୫ନଂ. ଜାତୀୟ ରାଜପଥ ସମ୍ପ୍ରସାରଣରେ ବହୁ କୋଟି ଟଙ୍କା ଖର୍ଚ୍ଚ ହେଉଛି। ଠିକାସଂସ୍ଥା ମାଧ୍ୟମରେ ରାସ୍ତାକାମ କରାଯାଉଛି। ତେବେ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ)ର ଅଧିକାରୀମାନେ ରାସ୍ତାକାମ ତଦାରଖ କରୁ ନ ଥିବାରୁ ଠିକାସଂସ୍ଥା ମନଇଚ୍ଛା କାମ କରୁଛି। ବିଶେଷ କରି ଫ୍ଲାଏଓଭର ବ୍ରିଜ୍ରେ ଲାଗିବାକୁ ଥିବା ଗ୍ଲାଡ୍ ନିର୍ମାଣ ଅତି ନିମ୍ନମାନର ହେଉଛି। କେତେକ ଗ୍ଲାଡ୍ରୁ ସିମେଣ୍ଟ ଖସିଯାଇଛି। ବାହାରକୁ ଲୁହା ରଡ୍ ଦେଖାଯାଉଛି। କାମରେ ଆବଶ୍ୟକତା ଅନୁଯାୟୀ ପାଣି ସିଞ୍ଚନ କରାଯାଉନାହିଁ। ଭାଗମାପ ଅନୁଯାୟୀ ସିମେଣ୍ଟ ବ୍ୟବହାର ହେଉନାହିଁ। କାମ ସମୟରେ କୌଣସି ଅଧିକାରୀ ଯାଞ୍ଚ କରୁନାହାନ୍ତି। ଏ ସଂକ୍ରାନ୍ତରେ ଠିକାସଂସ୍ଥାକୁ ବାରମ୍ବାର ଅବଗତ କରାଯିବା ସତ୍ତ୍ୱେ କୌଣସି ସୁଫଳ ମିଳୁନାହିଁ। ତେଣୁ ଏ ଦିଗରେ ଜିଲା ପ୍ରଶାସନ ଦୃଷ୍ଟି ଦେବାକୁ ସରପଞ୍ଚ ଦାବି କରିଛନ୍ତି।
ଅଭିଯୋଗ ସମ୍ପର୍କରେ ଠିକାସଂସ୍ଥା ପରିଚାଳକ ଆର. ନାୟକଙ୍କ ଦୃଷ୍ଟି ଆକର୍ଷଣ କରିବାରେ ସେ କାମ ଠିକ୍ କରାଯାଉଛି ବୋଲି କହି ପ୍ରସଙ୍ଗକୁ ଏଡ଼ାଇ ଯାଇଥିଲେ।