ହିଞ୍ଜିଳିକାଟୁ,୪ା୧୨(ଦ୍ୱିତୀକୃଷ୍ଣ ପଣ୍ଡା): ଗଞ୍ଜାମ ଜିଲା ହିଞ୍ଜିଳି ଥାନା ରାଳବ ଗ୍ରାମରେ ଗତ ମାସରେ ଅନୁଷ୍ଠିତ କାଞ୍ଜିଅଁଳା ଯାତ୍ରା ଷ୍ଟେଜ୍ରେ ବିଷଧର ସାପକୁ ଖେଳାଇବା ଘଟଣାରେ ଜଣେ କଳାକାରଙ୍କୁ ବ୍ରହ୍ମପୁର ବନ ବିଭାଗ ବୁଧବାର ଗିରଫ କରିଛି। ଗିରଫ ଜଣକ ହେଲେ ମିଥୁନ ସେଠୀ । ସେ ନାଟକ ମଞ୍ଚରେ ବାଳୀ ସୁଗ୍ରୀବ ବେଶରେ ସାପ ଖେଳାଇଥିଲେ।
ପ୍ରକାଶ ଯେ, ରାଳବ ଗ୍ରାମ କାଞ୍ଜିଅଁଳା ଯାତ୍ରାରେ ଚିକିଲି ରାମାୟଣ ନାଟକ ବେଳେ ଦର୍ଶକଙ୍କୁ ମଞ୍ଚ ପାଖକୁ ଟାଣିବା ପାଇଁ ଭିନ୍ନ କୌଶଳ ଆପଣାଇଥିଲେ ନାଟକ ମ୍ୟାନେଜମେଣ୍ଟ ଓ କଳାକାର। ମଞ୍ଚରେ ବିଷଧର ସାପ ଖେଳାଇବା, ଅଶ୍ଲୀଳ ନୃତ୍ୟ ସହ ଜିଅନ୍ତା ଘୁଷୁରି ମାରି ମାଂସ ଖାଇବା କଳଙ୍କିତ ଘଟଣା ସାମାଜିକ ଗଣମାଧ୍ୟମରେ ଭାଇରାଲ ହୋଇଥିଲା। ଏହା ସମଗ୍ର ରାଜ୍ୟକୁ ଆନ୍ଦୋଳିତ କରିଥିଲା ଓ ତୀବ୍ର ପ୍ରତିବାଦ ଓ ପ୍ରତିକ୍ରିୟା ପ୍ରକାଶ ପାଇଲା। ଫଳରେ ଯାତ୍ରାରେ ସୁରକ୍ଷା ଦାୟିତ୍ୱରେ ଥାଇ ଘଟଣାକୁ ନଜର ଅନ୍ଦାଜ କରିଥିବା ପୋଲିସ ଓ ବନ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଥିଲା। ପୂର୍ବରୁ ରାକ୍ଷସ ଭୂମିକାରେ ଅଭିନୟ କରୁଥିବା ଜଣେ କଳାକାର ବିମ୍ବାଧର ଗୌଡ଼ଙ୍କୁ ହିଞ୍ଜିଳି ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଓ ବ୍ରହ୍ମପୁର ବନ ବିଭାଗ ପକ୍ଷରୁ ନାଟ୍ୟ ପରିଚାଳକ ଖଲ୍ଲିକୋଟ ଥାନା ଚିକିଲି ଗ୍ରାମର ନାରାୟଣ ସ୍ବାଇଁଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା।
