ରସୁଲପୁର,୧୯ା୬(ରଂଜିତ ରାଉତ): ରସୁଲପୁର ବ୍ଲକ ଭୋଟକା ପଞ୍ଚାୟତରେ ମାଙ୍କଡ଼ ଆତଙ୍କ ଦେଖାଦେଇଛି। ପଞ୍ଚାୟତ ଅଞ୍ଚଳରେ ଘୁରିବୁଲୁ ଥିବା ମାଙ୍କଡ଼ପଲଙ୍କ ମଧ୍ୟରେ ଗୋଟିଏ ପାଗଳା ମାଙ୍କଡ଼ ରହିଛି। ଉକ୍ତ ମାଙ୍କଡ଼ ଆକ୍ରମଣରେ ପଞ୍ଚାୟତର ୭ଜଣ ଆହତ ହେଲେଣି। ପାଗଳ ମାଙ୍କଡ଼କୁ କାବୁ କରିବା ପାଇଁ ବନ ବିଭାଗ ପକ୍ଷରୁ ୨ଦିନ ହେଲା ଅପରେସନ ଜାରି ରହିଛି। ହେଲେ ଏଯାଏ ମାଙ୍କଡ଼କୁ କାବୁ କରିବାରେ ବିଭାଗ ବିଫଳ ହୋଇଛି। ରବିବାର ଅପରାହ୍ନରେ ବନ ବିଭାଗ ଓ ମାଙ୍କଡ଼ ଧରାଳି ଉଭୟଙ୍କ ପକ୍ଷରୁ ଏକ ମାଙ୍କଡ଼କୁ କାବୁ କରାଯାଇଥିଲା। ଉକ୍ତ ମାଙ୍କଡ଼କୁ ପାଗଳା ମାଙ୍କଡ଼ ଦର୍ଶାଇ ବିଭାଗ ଖସିଯିବାକୁ ଚେଷ୍ଟା କରୁଥିଲା। ହେଲେ ଏହାକୁ ଲୋକେ ବିରୋଧ କରିବା ସହ ପାଗଳା ମାଙ୍କଡ଼କୁ କାବୁ କରିବାକୁ ଜିଦ୍ ଧରିଥିଲେ। ବିଭାଗୀୟ ଅଧିକାରୀ ମହମ୍ମଦ ଜାକିର ହୁସେନଙ୍କ ନେତୃତ୍ୱରେ ଆସିଥିବା ମାଙ୍କଡ଼ ଧରାଳି ପଞ୍ଚାୟତରେ ରାତ୍ରୀ ଯାପନ କରିଛନ୍ତି। ସୋମବାର ସକାଳୁ ପୁଣି ମାଙ୍କଡ଼ ଧରାଯିବାକୁ ପ୍ରୟାସ କରାଯିବା। ଏ ଦିଗରେ ବିଭାଗ ବିଫଳ ହେଲେ ଅନ୍ୟ ପଦକ୍ଷେପ ନିଆଯିବା ଉପରେ ଗୁରୁତ୍ୱ ଦିଆଯିବ। ନଚେତ ଗାଁ ଗଣ୍ଡାରେ ଘୁରି ବୁଲୁଥିବା ମାଙ୍କଡ଼ଙ୍କୁ ଅନ୍ୟତ୍ର ଘଉଡ଼ାଇ ଦିଆଯିବା ନେଇ ପଦକ୍ଷେପ ନିଆଯିବ ବୋଲି ସୂଚନା ମିଳିଛି।
ପାଗଳା ମାଙ୍କଡ଼କୁ ଧରିବା ପାଇଁ ବସାଯାଇଥିବା ଫାସରେ ପଡ଼ିଥିବା ଏକ ମାଙ୍କଡ଼କୁ ଶାରଳା ଛକ ନିକଟରେ ଥିବା ଏକ କୋଠଘରେ ରଖାଯାଇଛି। ତା’କୁ ଦେଖିବା ପାଇଁ ଲୋକଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଛି। ଏବେ ବି ପାଗଳା ମାଙ୍କଡ଼ର ଭୟ ଜନସାଧାରଣଙ୍କୁ ଘାରିଛି। ଏକ ନିର୍ଦ୍ଦିଷ୍ଟ ମାଙ୍କଡ଼ ଆକ୍ରମଣ କରୁଛି ନାଁ ଏକାଧିକ ମାଙ୍କଡ଼ ସାମିଲ ଅଛନ୍ତି ସେ ଦ୍ୱନ୍ଦ୍ୱ ଏଯାଏଁ ଦୂର ହୋଇପାରୁନାହିଁ। ଆକ୍ରମଣ କରୁଥିବା ମାଙ୍କଡ଼କୁ ଚିହ୍ନଟ କରିବା ସହଜ ହେଉ ନ ଥିବାରୁ ତା’କୁ କାବୁ କରାଯାଇ ପାରୁନାହିଁ ବୋଲି ବିଭାଗୀୟ ଅଧିକାରୀଙ୍କଠାରୁ ସୂଚନା ମିଳିଛି।