ଭୁବନେଶ୍ୱର, ୧୧।୨(ବ୍ୟୁରୋ):ରାଜ୍ୟ ବନ ବିଭାଗ ଏବେ ଏକପ୍ରକାର ମୁରବୀ ଶୂନ୍ୟ ହେଇପଡ଼ିଛି। ପିସିସିଏଫ୍ (ଜେନେରାଲ) ଏବଂ ପିସିସିଏଫ୍ (ବନ୍ୟପ୍ରାଣୀ) ଭଳି ଦୁଇଟି ମୁଖ୍ୟ ପଦବୀ ଖାଲିପଡ଼ିଛି। ଗତ ଜାନୁୟାରୀ ୩୧ରେ ପିସିସିଏଫ୍ ଜେନେରାଲ ତଥା ହେଡ୍ ଅଫ୍ ଫରେଷ୍ଟ ଫୋର୍ସ ସନ୍ଦୀପ ତ୍ରିପାଠୀ ଅବସର ଗ୍ରହଣ କରିଛନ୍ତି। ସେହିଦିନ ପିସିସିଏଫ୍ ବନ୍ୟପ୍ରାଣୀ ହରିଶଙ୍କର ଉପାଧ୍ୟାୟ ମଧ୍ୟ ଅବସର ଗ୍ରହଣ କରିଛନ୍ତି। କିନ୍ତୁ କାମ ଚଳେଇବା ପାଇଁ ଆଡିଶନାଲ ପିସିସିଏଫ୍ (ବନ୍ୟପ୍ରାଣୀ) ଶଶୀ ପଲଙ୍କୁ ପିସିସିଏଫ୍ (ବନ୍ୟପ୍ରାଣୀ) ଓ ପିସିସିଏଫ୍ ଜିତେନ୍ଦ୍ର କୁମାରଙ୍କୁ ପିସିସିଏଫ୍ ଜେନେରାଲ ଇନ୍ଚାର୍ଜ ଭାବେ ଦାୟିତ୍ୱ ଦିଆଯାଇଛି। ବର୍ତ୍ତମାନ ବିଭାଗରେ କାର୍ଯ୍ୟରତ ସବୁଠାରୁ ବରିଷ୍ଠ ପିସିସିଏଫ୍ ହେଲେ ପ୍ରଭାକର ବେହେରା, ସୁଦର୍ଶନ ପଣ୍ଡା ଓ ମାଲୋତ ମୋହନ। ଏମାନେ ଆଉ ଅଳ୍ପକିଛି ମାସ ଭିତରେ ଅବସର ନେଉଥିବାରୁ ଉପରୋକ୍ତ ଦୁଇ ପଦବୀରେ ବସିବା ଆଶା କ୍ଷୀଣ। ତେଣୁ ବରିଷ୍ଠତା ଭିତ୍ତିରେ ଏମାନଙ୍କ ତଳକୁ ଥିବା ରାଜୀବ କୁମାର ଏବେ ଓଏଫ୍ଡିସିର ଏମ୍ଡି ଅଛନ୍ତି। ରାଜୀବଙ୍କ ସହ କେନ୍ଦ୍ରରୁ ଆଉଜଣେ ଅଧିକାରୀ ଶିଶିର ରଥୋଙ୍କ ନାମ ମଧ୍ୟ ଚର୍ଚ୍ଚା ହେଉଛି।
ରାଜ୍ୟରେ ୩ କ୍ୟାଡର ପିସିସିଏଫ୍ ଥିବାବେଳେ ୩ ଏକ୍ସ-କ୍ୟାଡର ପିସିସିଏଫ୍ ପଦବୀ ରହିଛି। ତନ୍ମଧ୍ୟରୁ ରାଜ୍ୟ ମାତ୍ର ଗୋଟିଏ କ୍ୟାଡରରେ ନିଜ ମନମୁତାବକ ଅଧିକାରୀ ନିଯୁକ୍ତ କରିପାରିବେ। ଏବେ ପିସିସିଏଫ୍ କେନ୍ଦୁପତ୍ର ପଦବୀରେ ଜଣେ ହିଁ ଅଧିକାରୀ ଅଛନ୍ତି। ଆଉ ୨ଟି ସବୁଠୁ ଗୁରୁତ୍ୱପୂର୍ଣ୍ଣ ପିସିସିଏଫ୍ ପଦବୀ ହେଲା ପିସିସିଏଫ୍ ଜେନେରାଲ ଏବଂ ପିସିସିଏଫ୍ ବନ୍ୟପ୍ରାଣୀ। ଏହି ପଦବୀ ଖାଲି ପଡ଼ିବା ପୂର୍ବରୁ ନୂଆ ନିଯୁକ୍ତିର ତୁରନ୍ତ ଆବଶ୍ୟକତା ଥିଲା। ସବୁଠାରୁ ବଡ଼ କଥା ହେଲା ଉକ୍ତ ୨ ପଦବୀ ପୂରଣ ପାଇଁ ଏକ କମିଟି ବସି ପ୍ରାର୍ଥୀ ଚୟନ କରିବ। କମିଟିରେ ରାଜ୍ୟ ମୁଖ୍ୟ ଶାସନ ସଚିବ, ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ଜଣେ ବାହାର ରାଜ୍ୟର ପିସିସିଏଫ୍ ଏବଂ ଫରେଷ୍ଟ ଡିଜିଙ୍କ ପ୍ରତିନିଧି ସଦସ୍ୟ ରହିବେ। ଏଯାବତ୍ ସେହି କମିଟି ବସି ନ ଥିବାରୁ ନୂଆ ନିଯୁକ୍ତି ଶୀଘ୍ର ହେବାର ସମ୍ଭାବନା ନାହିଁ। ଏବେ ମଣିଷ ଓ ବନ୍ୟପ୍ରାଣୀ ଦ୍ବନ୍ଦ୍ୱ ଦିନକୁ ଦିନ ବଢୁଛି। ହଠାତ୍ କିଛି ବଡ଼ ଘଟଣା ଘଟିଲେ ପିସିସିଏଫ୍ ବନ୍ୟପ୍ରାଣୀ ଏ ଦିଗରେ ନିର୍ଣ୍ଣାୟକ ଭୂମିକା ନେଇଥାନ୍ତି। ସେହିପରି ପିସିସିଏଫ୍ ଜେନେରାଲ ତଥା ହେଡ୍ ଅଫ୍ ଫରେଷ୍ଟ ଫୋର୍ସ ପୂରା ବନ ବିଭାଗର ଦାୟିତ୍ୱ ନେଇଥାନ୍ତି। ଆଉକିଛି ଦିନ ୨ ପ୍ରମୁଖ ପଦବୀ ଖାଲି ପଡ଼ିଲେ ବିଭିନ୍ନ ସମସ୍ୟା ଉପୁଜିବ। କର୍ମଚାରୀଙ୍କ ମନୋବଳ ଭାଙ୍ଗିବା ସହ ବିଭାଗୀୟ ପ୍ରଶାସନିକ ସ୍ଥାଣୁତା ଦେଖାଦେବ ବୋଲି ଆଶଙ୍କା ପ୍ରକାଶ ପାଇଛି। ତେବେ ଏ ନେଇ ରାଜ୍ୟ ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ସଚିବ ମୋନା ଶର୍ମାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ମିଳିପାରି ନାହିଁ।