ନୂଆଗାଁ,୨୯।୯ (ଡି.ଏନ.ଏ.)-ନୟାଗଡ଼ ବନଖଣ୍ଡ ମହିପୁର ବନାଞ୍ଚଳ ଅଧିନରେ ଥିବା ଜଙ୍ଗଲରୁ ବାରମ୍ବାର ଶାଳ କାଠ ଚୋରି ହେଉଥିଲେ ମଧ୍ୟ ବନ ବିଭାଗ ନୀରବଦ୍ରଷ୍ଟା ସାଜିଛି । ଜାତୀୟ ରାଜପଥ ପାର୍ଶ୍ୱ ପଞ୍ଚୁପାଣ୍ଡବ ଜଙ୍ଗଲରୁ ମଙ୍ଗଳବାର ୨ଟି ଶାଳ ଗଛକୁ କାଟି କାଠ ମାଫିଆମାନେ ନେଇ ଯାଇଥିବା ଅଭିଯୋଗ ହୋଇଛି ।
ମହିପୁର ବନାଞ୍ଚଳ ବନ କର୍ମଚାରୀ ଓ ବନାଞ୍ଚଳ ଅଧିକାରୀଙ୍କ ନିଷ୍କ୍ରିୟତାର ଫାଇଦା ଉଠାଉଛନ୍ତି କାଠ ମାଫିଆ । ସେମାନେ କାହାରିକୁ ଭୟ ନ କରି ଜଙ୍ଗଲ ଲୁଟିବାରେ ଲାଗି ପଡିଛନ୍ତି । ତେଣୁ ମହିପୁର ବନାଞ୍ଚଳ ଅଧିନସ୍ଥ ବିଭିନ୍ନ ଜଙ୍ଗଲରୁ କାଠ ଚୋରି ଏକ ନିୟମିତ ଘଟଣା ହୋଇଛି। କାଠ ମାଫିଆ ନିର୍ଭୟରେ ଦିନ ଦ୍ୱିପ୍ରହରେ ଜଙ୍ଗଲରେ ପଶି ବିଶାଳ ଶାଳ ଗଛ ଦେଖି କାଟି ନେଉଛନ୍ତି । ଏପରିକି ଗାଡ଼ି ଜଙ୍ଗଲ ଭିତରକୁ ନେଇ ସେଥିରେ କାଠ ଲଦି ନେଇ ଯାଉଥିଲେ ମଧ୍ୟ ବନ ବିଭାଗ କର୍ମଚାରୀ ତାହାର ସୁରାକ୍ ପାଉନାହାନ୍ତି । ଯାହା ଫଳରେ ମହିପୁର ବନାଞ୍ଚଳର ବିସ୍ତୃତ ଜଙ୍ଗଲ ଉଜୁଡିବାକୁ ବସିଛି । କାଠ ଚୋରି ବାବଦରେ ମହିପୁର ବନାଞ୍ଚଳ ଅଧିକାରୀ ଅମ୍ରିତ କୁମାର ସାହୁଙ୍କୁ ପଚାରିବାରେ ମୁଁ ଷ୍ଟାଫ୍ ପଠାଇ ତଦନ୍ତ କରୁଛି ବୋଲି କହିଛନ୍ତି ।