ଝାରସୁଗୁଡା ଅଫିସ୍,୧୨।୧୨: ଝାରସୁଗୁଡା ଜିଲା ବେଲପାହାଡ ରେଞ୍ଜ ଅଧିନ ବାଘମୁଣ୍ଡା ବନ ବିଭାଗ ତରଫରୁ ଉଦ୍ଧାର କରାଯାଇଥିବା ହିମାଲୟନ ଗ୍ରୀଫୋନ ଭୁଲ୍ଟୁରେ ପକ୍ଷୀ (ବିରଳ ଶାଗୁଣା)କୁ ଶନିବାର ଭୁବନେଶ୍ୱରସ୍ଥିତ ନନ୍ଦନକାନନରେ ଛଡା ଯାଇଥିବା ଜଣାପଡିଛି। ସୂଚନାଯୋଗ୍ୟ, ଗତ ୫ତାରିଖରେ ଝାରସୁଗୁଡା ଜିଲା ଲଖନପୁର ବ୍ଲକ୍ ସୁନାରୀ ପଞ୍ଚାୟତ ବିଶିପାଲି ଗ୍ରାମରେ ଏହି ବିରଳ ଶାଗୁଣାକୁ ଦେଖିବାକୁ ମିଳିଥିଲା। ଏନେଇ ଗ୍ରାମବାସୀ ବନବିଭାଗକୁ ଜଣାଇଥିଲେ। ଖବରପାଇ ନିକଟସ୍ଥ ବାଘମୁଣ୍ଡା ଫରେଷ୍ଟର ସୁରେଶ ତରାଇ, ଫରେଷ୍ଟଗାର୍ଡ ପି. ଖମାରୀ ପ୍ରମୁଖ ବନ କର୍ମଚାରୀ ସଦଳବଳେ ପହଞ୍ଚତ୍ି ଶାଗୁଣାକୁ ଉଦ୍ଧାର କରିଥିଲେ। ବନବିଭାଗ ଉଦ୍ଧାରବେଳେ ଶାଗୁଣା ଅସୁସ୍ଥ ରହିଥିଲା। ଏନେଇ ଡିଏଫ୍ଓ ଲଳିତ ପାତ୍ର ବନ୍ୟପ୍ରାଣୀ ବିଶେଷଙ୍କ ତତ୍ତ୍ୱାବଧାନରେ ପ୍ରାଣୀଚିକିତ୍ସକଙ୍କ ଜରିଆରେ ଅସୁସ୍ଥ ଶାଗୁଣାର ଚିକିତ୍ସା କରାଇଥିଲେ। ଚିକିତ୍ସା ପରେ ଧିରେଧିରେ ସେ ସୁସ୍ଥ ହୋଇଯାଇଥିଲା ା ସୁସ୍ଥପରେ ବନ ବିଭାଗ ଉଦ୍ଧାର ଶାଗୁଣାକୁ ଜଙ୍ଗଲରେ ଛାଡିବା ପାଇଁ ଯୋଜନା କରିଥିଲା। ହେଲେ ଶାଗୁଣାଟି ଠିକ୍ରେ ଉଡିପାରୁ ନ ଥିଲା। ସୁରକ୍ଷା ଦୃଷ୍ଟିରୁ ଏଭଳି ଅବସ୍ଥାରେ ଶାଗୁଣାକୁ ଜଙ୍ଗଲରେ ଛାଡିବା ବନ ବିଭାଗ ଉଚିତ ମନେ ନ କରି ଡିଏଫ୍ଓ ପାତ୍ର ଭୁବନେଶ୍ୱରସ୍ଥିତ ନନ୍ଦନକାନନ କର୍ତ୍ତୃପକ୍ଷଙ୍କ ସହିତ ଯୋଗାଯୋଗ କରିଥିଲେ। ନନ୍ଦନକାନନ କର୍ତ୍ତୃପକ୍ଷଙ୍କ ସହମତି ପରେ ଡିଏଫ୍ଓ ପାତ୍ରଙ୍କ ନିର୍ଦ୍ଦେଶକ୍ରମେ ବନଅଧିକାରୀ ଓ କର୍ମଚାରୀମାନେ ସ୍ବତନ୍ତ୍ର ଗାଡିରେ ଉଦ୍ଧାର ଶାଗୁଣାକୁ ନେଇ ନନ୍ଦନକାନନରେ ଛାଡି ଥିବା ଜଣାପଡିଛି। ଏହା ପୂର୍ବରୁ ଏହି ଜାତିରେ ଆଉ ଏକ ଶାଗୁଣା ଯାଜପୁର ଅଞ୍ଚଳରୁ ଅଣାଯାଇ ନନ୍ଦନକାନନରେ ରଖାଯାଇଥିବାବେଳେ ଏବେ ବନବିଭାଗ ତରଫରୁ ଉଦ୍ଧାର କରାଯାଇଥିବା ଶାଗୁଣାକୁ ଛଡାଯାଇଛି। ଏହି ପ୍ରଜାତିର ଶାଗୁଣା ପକ୍ଷୀ ଧିରେଧିରେ ବିଲୁପ୍ତ ହେବା ପାଇଁ ବସିଥିବାବେଳେ ଏହାର ବଂଶ ବୃଦ୍ଧି ହେବା ପରିବେଶ ପାଇଁ ଜରୁରୀ ହୋଇପଡିଛି। ଉଭୟ ଶାଗୁଣା ନନ୍ଦନକାନନରେ ରହିଥିବାବେଳେ ଏହାର ବଂଶ ବୃଦ୍ଧି ପାଇଁ ନନ୍ଦନକାନନ କର୍ତ୍ତୃପକ୍ଷ ଧ୍ୟାନ ରଖିଛନ୍ତି।