କୋକସରା,୨୦।୧: (ଦୁଷ୍ମନ୍ତ କୁମାର ପାଟ୍ଟଯୋଷୀ): ଦୀର୍ଘଦିନ ଧରି କଳାହାଣ୍ଡି ଜିଲା କୋକସରା ବ୍ଲକ ବରାଡ଼ଙ୍ଗା ପଞ୍ଚାୟତ ଶିଉନି ଗ୍ରାମ ଅଞ୍ଚଳରେ ଏକ ଗୋଠ ଛଡା ଭାଲୁ ଦିନ ଦ୍ବିପ୍ରହରରେ ଗାଁର ବିଭିନ୍ନ ସ୍ଥାନରେ ବୁଲୁଥିଲା। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଏକ ପ୍ରକାର ଭୟର ବାତାବରଣ ସୃଷ୍ଟି ହୋଇଯାଇଥିଲା। ଏନେଇ ବିଭିନ୍ନ ଗଣମାଧ୍ୟମ ସମେତ ଧରିତ୍ରୀ ଖବରକାଗଜରେ ଲଗାତାର ଖବର ପ୍ରକାଶିତ ହୋଇଥିଲା। ଏ ସମ୍ପର୍କିତ ଘଟଣାଟି କଳାହାଣ୍ଡି ଦକ୍ଷିଣ ବନଖଣ୍ଡ ଅଧିକାରୀ ଆର. କାଳାଇ ଭେନନଙ୍କ ଦୃଷ୍ଟି ଗୋଚର ହେବାପରେ ସୋମବାର ଦକ୍ଷିଣ ବନଖଣ୍ଡ ଜୀବଜନ୍ତୁ ଉଦ୍ଧାରକାରୀ ଦଳର ଏକ ଟିମ ସାରେ ଶିଉନି ଗ୍ରାମରେ ପହଞ୍ଚି ନିକଟସ୍ଥ ଏକ ପରିତ୍ୟକ୍ତ ରାଇସ ମିଲ୍ ମଧ୍ୟରୁ ଭାଲୁକୁ ଟ୍ରାଙ୍କୁଲାଇଜ୍ କରି ଜନ୍ତାରେ ନେଇ ଯାଇଛନ୍ତି। ଏହି ସମୟରେ ଧର୍ମଗଡ଼ ରେଞ୍ଜ ଅଫିସର ଭବାନୀ ଶଙ୍କର କାଉର୍, ଆମପାଣି ଫରେଷ୍ଟର ଚିତ୍ତରଞ୍ଜନ ବେହେରା, କୋକସରା ପ୍ରାଣୀ ଚିକିତ୍ସା ଅଧିକାରୀ ସୁଜିତ କୁମାର ଶତପଥୀ, ଖରିଆର ସଂଗ୍ରାମ କେଶରୀ, ସମେତ ରେପିଡ଼ ଆକ୍ସନ ଫୋର୍ସ କଳାହାଣ୍ଡି ଦକ୍ଷିଣ ବନଖଣ୍ଡ ଟିମ ଉପସ୍ଥିତ ଥିଲେ। ତେବେ ଦୀର୍ଘଦିନ ପରେ ଆତଙ୍କ ସୃଷ୍ଟି କରିଥିବା ଭାଲକୁ ଉଦ୍ଧାର ପରେ ସ୍ଥାନୀୟ ଗ୍ରାମବାସୀମାନେ ଆଶ୍ୱସ୍ତ ହୋଇଛନ୍ତି।
