ଉଦଳା, ୬ା୪(ଡି.ଏନ.ଏ.): ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟ ମଧ୍ୟରେ ଦୀର୍ଘଦିନ ହେବ ବସବାସ କରୁଥିବା ଲୋଧା ସମ୍ପ୍ରଦାୟ ପରିବାରଗୁଡ଼ିକୁ ଉଚ୍ଛେଦ ଦାବି ନେଇ ଉତ୍ତେଜନା ଲାଗି ରହିଥିଲା। ବୁଧବାର ଅଖଣ୍ଡ ଶିକାର ରୋକିବା ଲାଗି ସଚେତନତା କାର୍ଯ୍ୟକ୍ରମରେ ବନବିଭାଗ ଅଧିକାରୀ ଏବଂ କର୍ମଚାରୀ ଉଦଳା ଥାନା ଅଧୀନ ଅମ୍ବିକାଦେଇପୁର ଗ୍ରାମକୁ ଯାଇଥିବା ବେଳେ ଏହି ଉତ୍ତେଜନା ଉଗ୍ରରୂପ ଧାରଣ କରିଥିଲା। ଉତ୍ତ୍ୟକ୍ତ ଗ୍ରାମବାସୀ ବନବିଭାଗ ଅଧିକାରୀ ଏବଂ କର୍ମଚାରୀଙ୍କୁ ୭ ଘଣ୍ଟାରୁ ଅଧିକ ସମୟ ଅଟକ ରଖିଥିଲେ। ପରେ ବନବିଭାଗ ପକ୍ଷରୁ ୨୮ ଲୋଧା ପରିବାରର ଝୁମ୍ପୁଡ଼ି ଘର ଭାଙ୍ଗି ଉଚ୍ଛେଦ କରାଯିବାରୁ ପରିସ୍ଥିତି ଶାନ୍ତ ପଡ଼ିଥିଲା।
ସୂଚନା ଅନୁଯାୟୀ, ଶିମିଳିପାଳ ଆଭ୍ୟନ୍ତରୀଣ ଅଞ୍ଚଳ ଅମ୍ବିକାଦେଇପୁର ଗ୍ରାମ ନିକଟରେ ଲୋଧା ସମ୍ପ୍ରଦାୟର ୩୦ରୁ ଅଧିକ ପରିବାର ବସବାସ କରନ୍ତି। ଏହି ପରିବାରର ସଦସ୍ୟ ଅଭୟାରଣ୍ୟ ମଧ୍ୟରେ ବ୍ୟାପକ ଭାବେ ଶିକାର ଏବଂ ଗଛକାଟି ନଷ୍ଟ କରୁଛନ୍ତି। ଦୀର୍ଘଦିନ ଧରି ଏଭଳି ଚାଲିଥିବା ବେଳେ ଏହାକୁ ନେଇ ଅମ୍ବିକାଦେଇପୁର ଗ୍ରାମବାସୀ ବାରମ୍ବାର ବନବିଭାଗ ନିକଟରେ ଅଭିଯୋଗ କରି ଆସୁଥିଲେ। ହେଲେ ଅଭିଯୋଗ ପ୍ରତି କେହି କର୍ଣ୍ଣପାତ କରୁ ନ ଥିଲେ। ବୁଧବାର ଜନସଚେତନତା କାର୍ଯ୍ୟକ୍ରମ ସକାଶେ ଗଁାକୁ ଆସିଥିବା ଉଦଳା, ଦେବକୁଣ୍ଡ ଏବଂ ଡୁକୁରା ବନବିଭାଗ ଅଧିକାରୀ ଓ କର୍ମଚାରୀଙ୍କୁ ଗ୍ରାମବାସୀ ଅଟକ ରଖିଥିଲେ। ତୁରନ୍ତ ଲୋଧା ସମ୍ପ୍ରଦାୟ ପରିବାରଙ୍କୁ ଶିମିଳିପାଳରୁ ଉଚ୍ଛେଦ କରିବା ଜିଦ୍ରେ ଅଡ଼ି ବସିଥିଲେ। ଖବରପାଇ ଶିମିଳିପାଳ ଏସ୍ଟିଆରର ସାଉଥ୍ ଡିଭିଜନ୍ ଏସିଏଫ୍ ବିଦ୍ୟା ସାଗର ଏବଂ ବ୍ୟାଘ୍ର ସଂରକ୍ଷଣ ପ୍ରକଳ୍ପରେ କାର୍ଯ୍ୟରତ ସମସ୍ତ ଅଧିକାରୀଙ୍କ ସମେତ ଉଦଳା ପୋଲିସ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କ ସହିତ ଆଲୋଚନା କରିଥିଲେ। ପରେ ଲୋଧା ସମ୍ପ୍ରଦାୟର ୨୮ ପରିବାରକୁ ବନବିଭାଗ ଉଚ୍ଛେଦ କରିବାରୁ ୭ ଘଣ୍ଟାରୁ ଅଧିକ ସମୟ ଧରି ଅଟକ ଥିବା ବନ କର୍ମଚାରୀଙ୍କୁ ଗ୍ରାମବାସୀ ଛାଡ଼ି ଦେଇଥିଲେ। ଉଚ୍ଛେଦ ହୋଇଥିବା ଲୋଧା ପରିବାରଗୁଡ଼ିକ ବଣିଆବସା ଅଞ୍ଚଳକୁ ଚାଲିଯାଇଛନ୍ତି। ଆଗାମୀ ଦିନରେ ସେମାନେ ତହସିଲଦାରଙ୍କୁ ଭେଟିବା ସହିତ ସରକାରୀସ୍ତରରେ ସେମାନଙ୍କୁ ଜାଗା ପ୍ରଦାନ କରାଯିବ ବୋଲି ବନବିଭାଗ ଅଧିକାରୀ ପ୍ରତିଶ୍ରୁତି ଦେଇଥିବା ସୂଚନା ମିଳିଛି।