ମାଲକାନଗିରି/କାଲିମେଳା,୬ା୫: ମାଲକାନଗିରି ଜିଲା କାଲିମେଳା ବ୍ଲକରେ ହୋଇଥିବା ଜମି ଦୁର୍ନୀତିରେ ସମ୍ପୃକ୍ତ ଥିବା ଅଭିଯୋଗରେ ପୂର୍ବତନ ତହସିଲଦାର ଆଲୋକ କୁମାର ଅନୁଗୁଳିଆଙ୍କୁ ଗୁରୁବାର ଚାକିରିରୁ ନିଲମ୍ବନ କରାଯାଇଛି। ବିଭାଗୀୟ ସଚିବ ଚିଠି ନଂ. ୧୩୬୩୫/୨୧ରେ ତାଙ୍କୁ ନିଲମ୍ବନ କରାଯାଇଛି। ଘଟଣାର ଅଧିକ ତଦନ୍ତ ଲାଗି ଆର୍ଡିସିଙ୍କ ନିର୍ଦ୍ଦେଶରେ ଏଡିଏମ୍ ଉପଜିଲାପାଳଙ୍କୁ ଏକ କମିଟି ଗଠନ ପାଇଁ ନିର୍ଦ୍ଦେଶ ଦେଇଥିଲେ। ସେହି ଅନୁସାରେ ଦୁର୍ନୀତିର ଅଧିକ ଖୋଳତାଡ ପାଇଁ ଏକ ୫ ଜଣିଆ କମିଟି ଗଠନ ହୋଇଛି। ଅନୁଗୁଳିଆ ଦୁର୍ନୀତିରେ ଜଡିତ ଥିବା ପ୍ରମାଣ ମିଳିବା ପରେ ଏହାର ତଦନ୍ତ ଜାରି ରହିଥିଲା। ତଦନ୍ତଠାରୁ ଦୂରେଇ ରଖିବା ଲାଗି ତାଙ୍କୁ ଡେପୁଟି କଲେକ୍ଟର ରୂପେ ସେତେବେଳେ କୋରାପୁଟକୁ ବଦଳି କରାଯାଇଥିଲା। ସୂଚନାଯୋଗ୍ୟ, ପୂର୍ବରୁ ଏହି ଘଟଣାରେ ତହସିଲର କର୍ମଚାରୀ ଦିବ୍ୟସିଂହ ପାଇକରାୟ ଓ ଆର୍ଆଇ ସୁରେଶ ପୂଜାରୀଙ୍କୁ ନିଲମ୍ବନ କରାଯାଇଥିଲା।