ବନ୍ତଳା, ୧୯ା୭ (ଦିନେଶ ଦେହୁରୀ): ସାଧାରଣତଃ କ୍ଷୀର ପାଇଁ ଅନେକେ ଗୋପାଳନ କରୁଛନ୍ତି। ସେମାନେ ଜାଣିନାହାନ୍ତି ଗୋ ସମ୍ପଦର ଅଧିକ ବ୍ୟବହାର କି ଉପକାର। ସେଥିପାଇଁ ଗୋମୂତ୍ର ଓ ଗୋବରକୁ ବର୍ଜ୍ୟ ଦୃଷ୍ଟିରେ ଦେଖାଯାଉଛି। କିନ୍ତୁ ଏହି ବର୍ଜ୍ୟ ଯେ ନୀରୋଗ ଜୀବନର ଏକ ବଡ଼ ସୂତ୍ର ସେ ସମ୍ପର୍କରେ ଉଚିତ ଜ୍ଞାନ ଲୋକଙ୍କୁ ଦିଆଯାଉନାହିଁ। ହେଲେ ଏ କ୍ଷେତ୍ରରେ ଆଗକୁ ବଢ଼ୁଛନ୍ତି ଅନୁଗୋଳ ଜିଲା ବନ୍ତଳା ଥାନା ଶଙ୍ଖପୁର ଗ୍ରାମର ଅଶୋକ ଦାସ(୫୦)। ଦୀର୍ଘବର୍ଷ ହେଲା ନିଜେ ୩୦ରୁ ଅଧିକ ଗୋ ପାଳନ କରିବା ସହ ଊର୍ଦ୍ଧ୍ୱପାତନ ପ୍ରଣାଳୀରେ ଗୋମୂତ୍ରରୁ ଔଷଧ ପ୍ରସ୍ତୁତ କରୁଛନ୍ତି। ଗୋବରରୁ ମଶା ଧୂପ, ଦନ୍ତ ମଞ୍ଜନ, ବାସନମଜା ପାଉଡର ତିଆରି କରୁଛନ୍ତି। ତାଙ୍କ ଦ୍ୱାରା ଆଦୃତ ପୁରାତନ ପଦ୍ଧତି କିପରି ଅଧିକରୁ ଅଧିକ ଲୋକଙ୍କ ନିକଟରେ ପହଞ୍ଚିବ ସେଥିପାଇଁ ଗଁା ଗଁା ବୁଲି ଲୋକଙ୍କୁ ପ୍ରଶିକ୍ଷଣ ଦେଉଛନ୍ତି।
ଅଶୋକଙ୍କ କହିବା ଅନୁଯାୟୀ, ଜୀବଜଗତର ସୁରକ୍ଷା ପାଇଁ ସେ ପିଲା ଦିନରୁ ଲକ୍ଷ୍ୟ ରଖିଛନ୍ତି। ୧୯୯୨ରେ ନରସିଂହପୁର କଲେଜରୁ ବିଏ ପାସ୍ କରିବା ପରେ ଓଡ଼ିଆରେ ଏମ୍ଏ କରିଛନ୍ତି। ହିନ୍ଦୀରେ ରତ୍ନ, ବୃନ୍ଦାବନରେ ସଂସ୍କୃତ ଭାଗବତ ଶିକ୍ଷା କରିଛନ୍ତି। କାଞ୍ଚିପୁରମ ପଞ୍ଚଗବ୍ୟ ବିଶ୍ୱବିଦ୍ୟାଳୟରେ ମାଷ୍ଟର ଡିପ୍ଲୋମା କରିଛନ୍ତି। ଗୋ ସମ୍ପଦ ଦ୍ୱାରା ବହୁ ସମସ୍ୟାର ସମାଧାନ ହେବ ବୋଲି ଶିକ୍ଷାଲାଭ କରିବା ପରଠାରୁ କାର୍ଯ୍ୟାରମ୍ଭ କରିଛନ୍ତି। ବନ୍ତଳା ନାରଣପୁର ଅଞ୍ଚଳରେ ୧ ଏକର ଜାଗା କିଣି ଗୋପାଳନ କରୁଛନ୍ତି। ଏବେ ତାଙ୍କ ନିକଟରେ ୩୦ରୁ ଅଧିକ ଗାଈ ରହିଛନ୍ତି। ଦୈନିକ କ୍ଷୀର, ଘିଅ ବିକ୍ରି କରିବା ସହ ପୁରାତନ ଊର୍ଦ୍ଧ୍ୱପାତନ ପ୍ରଣାଳୀରେ ଗୋମୂତ୍ରରୁ ଅର୍କ ପ୍ରସ୍ତୁତି କରି ଲିଟର ପିଛା ୩୫୦ ଟଙ୍କାରେ ବିକ୍ରି କରୁଛନ୍ତି। ଏଥିପାଇଁ ସେ ବୃନ୍ଦାବନ, ପୁରୀ, ଅଯୋଧ୍ୟାରୁ ତାଲିମ ନେଇଛନ୍ତି। ଗୋମୂତ୍ରରେ ପ୍ରଚୁର ପରିମାଣର ରୋଗ ପ୍ରତିରୋଧ ଶକ୍ତି ଥିବାରୁ ଏହା ମଣିଷ ଶରୀରକୁ ନୀରୋଗ ରଖିପାରିବ। ଏଥିରେ ଥିବା ଔଷଧୀୟ ଗୁଣ ଅନେକ ରୋଗ ଭଲ କରିପାରିବ। ତେଣୁ ଗୋ ମୂତ୍ର ସଂଗ୍ରହ କରି ସେ ୧୬ ପ୍ରକାର ଔଷଧ ତିଆରି କରି ଗୋ ସୁରକ୍ଷା ସମିତି, ଗଁା ବୈଦ୍ୟମାନଙ୍କୁ ଯୋଗାଇ ଦେଉଛନ୍ତି। ସେହିପରି ଗୋବରରୁ ସାର ଓ ଗ୍ୟାସ୍ ଉତ୍ପାଦନ କରୁଛନ୍ତି। ଧୂପକାଠି, ମଶା ଧୂପ, ଦନ୍ତ ମଞ୍ଜନ, ବାସନମଜା ପାଉଡର ପ୍ରସ୍ତୁତ କରୁଛନ୍ତି। ବୃଦ୍ଧି ପାଉଥିବା ପ୍ରଦୂଷଣ ଓ ଫସଲରେ ମାତ୍ରାଧିକ ସାର, କୀଟନାଶକ ପ୍ରୟୋଗ ଯୋଗୁ ଖାଦ୍ୟ ଆଉ ସ୍ବାସ୍ଥ୍ୟ ଉପଯୋଗୀ ହୋଇନାହିଁ। ଏଥିପାଇଁ ମଣିଷ ଅଳ୍ପଦିନରେ ରୋଗଗ୍ରସ୍ତ ହୋଇପଡ଼ୁଛି। ତେଣୁ ଗୋ ବର୍ଜ୍ୟ ଦ୍ୱାରା କିପରି ପରିବେଶକୁ ସୁରକ୍ଷା ଦେବା ସହିତ ମଣିଷକୁ ନୀରୋଗ ରଖାଯାଇପାରିବ ସେଥିପାଇଁ ଗୋବର ଓ ଗୋମୂତ୍ର ବ୍ୟବହାର କରି ସେ ଫସଲ ଉତ୍ପାଦନ କରୁଛନ୍ତି। ଗୋ ସମ୍ପଦର ଏହି ବ୍ୟବହାର ସମ୍ପର୍କରେ ଗୁଳାଗଡ଼ିଆ, ତୁମୁଣି, ଟାଇଁସି, ତଳଗଡ଼, ଗୋପାଳପୁର, ଗଡ଼ତଇଳା, କୋରଡା ଆଦି ଗ୍ରାମର ଚାଷୀମାନଙ୍କୁ ଏକ ବର୍ଷ ହେଲା ପ୍ରଶିକ୍ଷଣ ଦେଉଥିବା ଅଶୋକ ପ୍ରକାଶ କରିଛନ୍ତି।
ଅଶୋକଙ୍କ ଏହି ଉଦ୍ୟମ ସମ୍ପର୍କରେ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା ଜଗନ୍ନାଥପୁର ସ୍ବାସ୍ଥ୍ୟକେନ୍ଦ୍ର ନୂତନର ଆୟୁଷ ଡାକ୍ତର ବିଜୟ କୁମାର ପ୍ରଧାନ କହିଛନ୍ତି, ଗୋମୂତ୍ର ଅର୍କ ଦ୍ୱାରା ମଣିଷର ରୋଗ ପ୍ରତିରୋଧ ଶକ୍ତି ବୃଦ୍ଧି ପାଇଥାଏ। ଏଥିରେ ବିଭିନ୍ନ ଚେରମୂଳିର ମିଶ୍ରଣ କରାଯାଇ ଆୟୁର୍ବେଦିକ ଉପଚାରରେ ଲଗାଯାଇଥାଏ।