କେନ୍ଦୁଝର, ୮।୭(ସ୍ବ.ପ୍ର.) କେନ୍ଦୁଝର (ନରଣପୁର)ରୁ ଡୁବୁରୀ ପର୍ଯ୍ୟନ୍ତ ରାସ୍ତା ଚାରି ଥାକିଆ ହେବ। ଏଥିପାଇଁ ଜମି ଅଧିଗ୍ରହଣ କମିଟି ଅନୁମୋଦନ ପାଇଁ ଭାରତୀୟ ଜାତୀୟ ରାଜପଥ ପ୍ରାଧିକରଣ ନିକଟକୁ ସବିଶେଷ ରିପୋର୍ଟ ପଠାଯାଇଛି। ଏହି ରାସ୍ତା ହେଲେ ଦୁଇଟି ସ୍ଥାନରେ ଟୋଲ ପ୍ଲାଜା ପ୍ରତିଷ୍ଠା ହୋଇ ଟୋଲ ଆଦାୟ ହେବ ବୋଲି ଜଣାପଡିଛି। ନିକଟରେ ପ୍ରଶାସନ ପକ୍ଷରୁ ଅନୁଷ୍ଠିତ ଜିଲା ଉନ୍ନୟନ ସମନ୍ବୟ ଓ ତଦାରଖ କମିଟି ବୈଠକ (ଦିଶା)ରେ ଆଲୋଚନା ହୋଇଛି। ଏହି ରାସ୍ତା ନିର୍ମାଣ କେବେ ଆରମ୍ଭ ହେବ ଏବଂ କେତେ ଟଙ୍କା ଖର୍ଚ୍ଚ ହେବ ସୂଚନା ମିଳି ନ ଥିବା ବେଳେ ଏହି ରାସ୍ତା ନିର୍ମାଣ ହେଲେ ଯୋଡ଼ା, ବଡ଼ବିଲ, ଶୁଆକାଟି ଖଣି ଅଞ୍ଚଳରୁ ସିଧାସଳଖ ପାରାଦୀପ ବନ୍ଦରକୁ ଲୁହାପଥର ପରିବହନ ସୁରୁଖରେ ହୋଇପାରିବ ବୋଲି ମତପ୍ରକାଶ ପାଉଛି।
ଦୀର୍ଘ ପ୍ରାୟ ୮୮ କି.ମି.ରାସ୍ତା ଏନ୍ଏଚ୍ ୭୨୦ରେ ନାମିତ ହେବ। ଏହି ରାସ୍ତାରେ ଯାତାୟାତ ସୁବିଧା ପାଇଁ ୨ଟି ସ୍ଥାନରେ ଫ୍ଲାଇ ଓଭର ହେବା ସହ ୨ ଟି ସ୍ଥାନରେ ଗାଡି ଯାତାୟାତ ପାଇଁ ଅଣ୍ଡରପାସ ନିର୍ମାଣ ହେବ। ସେହିପରି ୨ଟି ସ୍ଥାନରେ ଗୋଟିଏ ପାର୍ଶ୍ୱରୁ ଅପରପାର୍ଶ୍ୱକୁ ହାଲୁକା ଯାନ ଚଳାଚଳ ପାଇଁ ଅଣ୍ଡରପାସ ଏବଂ ୧୮ ଟି ସ୍ଥାନରେ ଛୋଟ ଯାନ ଯାତାୟାତକୁ ମିଶାଇ ସମୁଦାୟ ୨୮ଟି ସ୍ଥାନରେ ଅଣ୍ଡରପାସ ନିର୍ମାଣ ହେବ। ସେହିପରି ଏହି ରାସ୍ତାରେ ୪ଟି ବଡ ପୋଲ, ୮ଟି ଛୋଟ ପୋଲ ନୂଆ ଭାବେ ନିର୍ମାଣ ହେବ। ସେହିପରି ୨ ଛୋଟ ପୋଲକୁ ପ୍ରଶସ୍ତିିକରଣ କରାଯିବ। ଏହା ଛଡା ୧୪୫ ନୂଆ କଲଭର୍ଟ ନିର୍ମାଣ ହେବ। ଏହାଛଡ଼ା ୫ଟି କଲଭର୍ଟର ପ୍ରଶସ୍ତିିକରଣ କରାଯିବ ବୋଲି ଏକ ରିପୋର୍ଟରୁ ଜଣାପଡିଛି ା
ଏହି ରାସ୍ତା ଏନ୍ଏଚ୍ ୨୦ (ପାଣିକୋଇଲି-ରିମୁଳି)ର ଶିରିଶପାଳ (ବାଇପାସ୍) ଗ୍ରାମରୁ ହରିଚନ୍ଦନପୁର, ବ୍ରାହ୍ମଣୀପାଳ ଦେଇ ଡୁବୁରି – ଚଣ୍ଡିଖୋଲ ରାସ୍ତାର କଳିଙ୍ଗନଗର ସ୍ଥିତ ଟାଟା ଷ୍ଟିଲ କାରଖାନା ସୀମା ପର୍ଯ୍ୟନ୍ତ ୮୮ କି.ମି.୨୦୦ ମିଟର ଦୀର୍ଘ ନିର୍ମାଣ ହେବ ବୋଲି ଜଣାପଡିଛି। ତେବେ କେନ୍ଦୁଝର ଜିଲାରେ ପୂର୍ବରୁ ଏନ୍ଏଚ୍ ୨୦, ଏନ୍ଏଚ୍ ୪୯ ଆଦି ନିର୍ମାଣରେ ବ୍ୟାପକ ଜଙ୍ଗଲ ନଷ୍ଟ ହୋଇଥିଲେ ହେଁ ଅଦ୍ୟାବଧି ସେସବୁର ଭରଣା ପାଇଁ ବନୀକରଣ ହୋଇ ନ ଥିବା ବେଳେ ଏହି ରାସ୍ତା ନିର୍ମାଣ ହେଲେ ବହୁ ଅଧିକ ଜଙ୍ଗଲ ନଷ୍ଟ ହେବାକୁ ଥିବାରୁ ପରିବେଶବିତ୍ମାନେ ଚିନ୍ତା ପ୍ରକଟ କରୁଛନ୍ତି। ଉକ୍ତ ରାସ୍ତା ପାଇଁ ବହୁ ପୁରୁଣା ବଡ଼ ବଡ଼ ମୂଲ୍ୟବାନ ଗଛ କଟିବା ଫଳରେ ଜିଲାରେ ଜଳବାୟୁରେ ବ୍ୟାପକ ପରିବର୍ତ୍ତନ ଘଟିଛି ା ଯାହାର ପରିଣାମ ଜିଲାବାସୀ ଭୋଗୁଛନ୍ତି। ସେହିପରି ସମଗ୍ର ରାସ୍ତାପାର୍ଶ୍ୱରେ ବନୀକରଣ କରାଯିବା ବ୍ୟବସ୍ଥା ଥିବାବେଳେ ହେଉ ନ ଥିବାରୁ ଅସନ୍ତୋଷ ବଢୁଛି ା