ମୁମ୍ବାଇ, ୧୯।୭: ଚଳିତ ମାସ ବର୍ତ୍ତମାନ ପର୍ଯ୍ୟନ୍ତ ବିଦେଶୀ ପୋର୍ଟଫୋଲିଓ ନିବେଶକ(ଏଫ୍ପିଆଇ) ମାନେ ଦେଶର ପୁଞ୍ଜି ବଜାର ଇକ୍ୱିଟି ସେଗ୍ମେଣ୍ଟରୁ ୪୫୧୫ କୋଟି ଟଙ୍କା ଉଠାଇ ନେଇଛନ୍ତି। ଭାରତୀୟ ବଜାରକୁ ନେଇ ନିବେଶକମାନେ ସତର୍କତା ଅବଲମ୍ବନ କରୁଥିବା ଦେଖାଯାଇଛି। ବର୍ତ୍ତମାନ ବଜାର ସର୍ବକାଳୀନ ରେକର୍ଡ ସ୍ତରରେ ରହିଛି। ଫଳରେ ଏଫ୍ପିଆଇ ପ୍ରଫିଟ ବୁକିଂ କରିବାକୁ ପସନ୍ଦ କରୁଛନ୍ତି। ସେହିଭଳି ତୃତୀୟ ଲହରକୁ ମଧ୍ୟ ନିବେଶକମାନେ ନଜରରେ ରଖିଥିବା ମର୍ନିଂ ଷ୍ଟାର ଇଣ୍ଡିଆର ଆସୋସିଏଟ ଡାଇରେକ୍ଟର ହିମାଂଶୁ ଶ୍ରୀବାସ୍ତବ କହିଛନ୍ତି। ବର୍ତ୍ତମାନ ଡଲାର ଶକ୍ତିଶାଳୀ ରହିଛି। ଏଭଳି ସ୍ଥିତିରେ ଆମେରିକା ବଣ୍ଡ ବଜାର ଭଲ ରିଟର୍ନ ପ୍ରଦାନ କରିବାର ସମ୍ଭାବନା ରହିଛି। ଏହା ଭାରତ ବଜାରରେ ପୁଞ୍ଜି ପ୍ରବାହକୁ ପ୍ରଭାବିତ କରିବାର ଆଶଙ୍କା ନାହିଁ। ବର୍ତ୍ତମାନ ଏ ନେଇ ଚିନ୍ତା ପ୍ରକଟ କରିବାର କୌଣସି କାରଣ ନାହିଁ ବୋଲି ସେ ମତ ପ୍ରକାଶ କରିଛନ୍ତି।
ସେହିଭଳି ନିବେଶକଙ୍କ ଦ୍ୱାରା ହୋଇଥିବା ପୁଞ୍ଜି ପ୍ରତ୍ୟାହାର ବିଶେଷ ବଡ଼ ନୁହେଁ ବୋଲି ସେ ମତ ଦେଇଛନ୍ତି। ମାତ୍ର ଭାରତୀୟ ବଜାରକୁ ନେଇ ନିବେଶକ ସତର୍କତା ଅବଲମ୍ବନ କରୁଛନ୍ତି। ଡିପୋଜିଟୋରୀ ଡାଟା ମୁତାବକ ନିବେଶକମାନେ ୧-୧୬ ମଧ୍ୟରେ ୪୫୧୫ କୋଟି ଟଙ୍କା ଭାରତୀୟ ପୁଞ୍ଜି ବଜାରରୁ ଉଠାଇ ନେଇଛନ୍ତି। ଏହି ସମୟରେ ସେମାନେ ଡେଟ୍ ସେଗ୍ମେଣ୍ଟରେ ୩,୦୩୩ କୋଟି ଟଙ୍କା ନିବେଶ କରିଛନ୍ତି। ଏହି ଅବଧିରେ ନେଟ୍ ପୁଞ୍ଜି ପ୍ରତ୍ୟାହାର ୧୪୮୨ କୋଟି ଟଙ୍କା ରହିଛି। ଜୁନ୍ରେ ବିଦେଶୀ ନିବେଶକମାନେ ଭାରତୀୟ ପୁଞ୍ଜି ବଜାରରେ ୧୩,୨୬୯ କୋଟି ଟଙ୍କା ନିବେଶ କରିଥିଲେ।
ବଜାର ବର୍ତ୍ତମାନ କିଛିଟା ପ୍ରଭାବିତ ରହିଛି ବୋଲି ଜିଓଜିତ ଫାଇନାନ୍ସିଆଲ ସର୍ଭିସେସ୍ର ଚିଫ୍ ଇନ୍ଭେଷ୍ଟମେଣ୍ଟ ଷ୍ଟ୍ରାଟେଜିଷ୍ଟ ଭି. କେ. ବିଜୟ କୁମାର କହିଛନ୍ତି। ଏହି ବର୍ଗର ନିବେଶକମାନେ ଚଳିତବର୍ଷ ଜାନୁୟାରୀ, ଫେବୃୟାରୀ ଏବଂ ମାର୍ଚ୍ଚରେ ଲଗାତର ନିବେଶ କରିଥିଲେ। ଏପ୍ରିଲ ଏବଂ ମେ ମାସରେ ସେମାନେ ପୁଞ୍ଜି ପ୍ରତ୍ୟାହାର କରିଥିଲେ। ଜୁନ୍ରେ ପୁଣି ଥରେ ଏମାନେ ନିବେଶ ଜାରି ରଖିଥିଲେ। ଜୁଲାଇରେ ପୁଣି ଥରେ ଶେୟାର ବିକିଥିବା ଦେଖାଯାଉଛି। ଇଣ୍ଡୋନେସିଆକୁ ଛାଡ଼ିଦେଲେ ବିଶ୍ୱର ଅନ୍ୟ ପ୍ରମୁଖ ବଜାରରେ ବିଦେଶୀ ନିବେଶକମାନେ ପୁଞ୍ଜି ଉଠାଇ ନେଉଥିବା କୋଟାକ ସିକ୍ୟୁରିଟିଜର ଉପସଭାପତି ଶ୍ରୀକାନ୍ତ ଚୌହାନ କହିଛନ୍ତି। ଫିଲିପାଇନ୍ସ, ଦକ୍ଷିଣ କୋରିଆ, ଥାଇଲାଣ୍ଡ ଭଳି ଦେଶଗୁଡ଼ିକରେ ବିଦେଶୀ ନିବେଶକମାନେ ପୁଞ୍ଜି ପ୍ରତ୍ୟାହାର କରିଛନ୍ତି। ଅଶୋଧିତ ତେଲ ଦର ବୃଦ୍ଧି ଏବଂ ଆମେରିକା ଫେଡେରାଲ ରିଜର୍ଭର ନୀତି ଆଧାରରେ ସ୍ବଳ୍ପ ମିଆଦୀ ଭିତ୍ତିରେ ଭାରତର ପୁଞ୍ଜି ବଜାର ପ୍ରଭାବିତ ହୋଇ ରହିବ ବୋଲି ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।