କେନ୍ଦୁଝର,୧।୨(ସ୍ବ.ପ୍ର.) କେନ୍ଦୁଝର ଜିଲାର ବିଭିନ୍ନ ନଦୀ/ନାଳରୁ ବାଲି ଚୋରି ଯୋଗୁ ସରକାରଙ୍କ ବ୍ୟାପକ ରାଜସ୍ବ ହାନୀ ଘଟୁଥିଲେ ହେଁ ଏହାକୁ ରୋକିବା ପାଇଁ ଦୃଢ ପଦକ୍ଷେପ ନିଆଯାଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ଏଥିରେ କେତେକ ଦୁର୍ନୀତିଗ୍ରସ୍ତ ରାଜସ୍ବ ବିଭାଗ କର୍ମଚାରୀ ସାମିଲ ହୋଇଥିବାରୁ ଧରପଗଡ ହେଉନାହିଁ ଏବଂ ଅଭିଯୋଗ କଲେ କାଁ ଭାଁ ଧରି ଫାଇନ ଆଦାୟ କରି ଛାଡିଦିଆଯାଉଥିବା ଅଭିଯୋଗ ହେଉଛି।
ପାଟଣା ତହସିଲ ଅନ୍ତର୍ଗତ ବୈତରଣୀର ରାଜନଗର ରାଜସ୍ବ ନିରୀକ୍ଷକ ସେକସନ ଅଧୀନ କିଆପଡା, ତେନ୍ତଳା ନିକଟରୁ ବେଆଇନ ଭାବେ ବାଲି ଉତ୍ତୋଳନ କରି ଷ୍ଟକ ରଖି ହାଇଓ୍ବାରେ ଚୋରା ଚାଲାଣ ହେଉଥିବା ଅଭିଯୋଗ ହୋଇଛି। ଏବେ ମଧ୍ୟ ଉକ୍ତ ଅଞ୍ଚଳରେ ବହୁ ବାଲି ଉତ୍ତୋଳନ କରି ଷ୍ଟକ ରଖାଯାଇଛି। ଫଳରେ ବ୍ୟାପକ ପରିବେଶ ହାନୀ ଘଟିବା ସହ ବୈତରଣୀ ନଦୀ ପାଇଁ ବିପଦ ସୃଷ୍ଟି ହେବା ଆଶଙ୍କା ରହୁଛି। ବିଭିନ୍ନ ସ୍ଥାନରେ ବେଆଇନ ଭାବରେ ବାଲି ଷ୍ଟକ ୟାର୍ଡ ନିର୍ମାଣ ହୋଇଥିବା ଏବଂ ଅନୁମତି ନେଇଥିଲେ ନିୟମିତ ଷ୍ଟକ ଯାଞ୍ଚ ହେଉନଥିବାରୁ ବ୍ୟାପକ ରାଜସ୍ବ ଫାଙ୍କି ହେଉଛି ବୋଲି ମତ ପ୍ରକାଶ ପାଉଛି। ଏହାକୁ ନେଇ ଜାତୀୟ ଗ୍ରୀନ ଟ୍ରିବ୍ୟୁନାଲ ହସ୍ତକ୍ଷେପ କରିବାକୁ ପରିବେଶବିତ ମାନେ ନିବେଦନ କରିଛନ୍ତି। ଏସମ୍ପର୍କରେ ଉପଜିଲାପାଳ ରାମଚନ୍ଦ୍ର କିସ୍କୁ କହିଛନ୍ତି, ଲିଜ ଦିଆଯାଇନଥିବା ସ୍ଥାନରୁ ବାଲି ଚୋରି ରୋକିବା ପାଇଁ ପଦକ୍ଷେପ ନିଆଯାଉଛି। ତୁରନ୍ତ ଧରପଗଡ କରାଯିବ।