ବ୍ରିସ୍ବେନ୍, ୨୦ା୧ (ପି.ଟି.)- ଅନଭିଜ୍ଞ ତଥା ଇଞ୍ଜୁରିଗ୍ରସ୍ତ ଭାରତଠାରୁ ତାଙ୍କ ଦଳର ପରାଜୟ ଅଷ୍ଟ୍ରେଲିଆ କ୍ରିକେଟ ଦଳର ମୁଖ୍ୟ କୋଚ୍ ଜଷ୍ଟିନ ଲାଙ୍ଗରଙ୍କୁ ଖୁବ୍ ବାଧିଛି। ସେ କହିଛନ୍ତି, ଏଥିରୁ ସେ ଗୋଟିଏ ଶିକ୍ଷା ମିଳିଛି ଯେ, ଭାରତକୁ କେବେ ହେୟଜ୍ଞାନ ମନେ କରିବ ନାହିଁ। କାରଣ ଏହି ଦେଶରେ ବହୁ ପ୍ରତିଭାସମ୍ପନ୍ନ ଖେଳାଳି ରହିଛନ୍ତି। ଏହା ଏକ ଅବିଶ୍ୱସନୀୟ ଟେଷ୍ଟ ସିରିଜ ଥିଲା। ସିରିଜରେ ହାର୍ ଜିତ୍ ରହିଛି। ହେଲେ ମଙ୍ଗଳବାରର ପରାଜୟଜନିତ ଗ୍ଲାନି ବହୁଦିନ ଧରି ରହିବ। ମ୍ୟାଚରେ ସମସ୍ତ ଶ୍ରେୟ ଭାରତକୁ ଯିବ। ଏହି ସିରିଜରୁ ଆମକୁ ନୀତି ଶିକ୍ଷା ମିଳିଛି। ପ୍ରଥମତଃ କୌଣସି କଥାକୁ ହାଲୁକା ଭାବେ ନେବ ନାହିଁ। ଦ୍ୱିତୀୟ ଭାରତୀୟଙ୍କୁ କେବେ ହେୟଜ୍ଞାନ କରିବ ନାହିଁ। ୧.୫ ବିଲିୟନ ଭାରତୀୟଙ୍କ ପ୍ରଥମ ଏକାଦଶ ସହ ଖେଳିବା ସହଜ କଥା ନୁହେଁ, ବାସ୍ତବିକ କଷ୍ଟସାଧ୍ୟ। ଲାଙ୍ଗର କହିଛନ୍ତି, ଆଡେଲିଡ୍ ବିପର୍ଯ୍ୟୟ ପରେ ଯଶପ୍ରୀତ ବୁମ୍ରା ଓ ରବୀନ୍ଦ୍ର ଜାଡେଜାଙ୍କ ଭଳି ଖେଳାଳିଙ୍କ ଅନୁପସ୍ଥିତି ସତ୍ତ୍ୱେ ଭାରତର ଲଢୁଆ ପ୍ରତ୍ୟାବର୍ତ୍ତନ ନେଇ ସେତେଟା ଆଶ୍ଚର୍ଯ୍ୟାନ୍ବିତ ହେବା କଥା ନୁହେଁ। ଭାରତର ଶୁବମନ ଗିଲ୍, ଓ୍ବାଶିଂଟନ ସୁନ୍ଦର, ଶାର୍ଦ୍ଦୁଳ ଠାକୁର ଓ ମହମ୍ମଦ ସିରାଜଙ୍କ ସମେତ ଅନ୍ୟ କେତେଜଣ ନୂଆ ଷ୍ଟାର ଖେଳାଳିଙ୍କ ଆବିର୍ଭାବ ଘଟିଛି। ସେମାନେ ପରାଜୟ ସ୍ବୀକାର କରିବାକୁ ଚାହାନ୍ତି ନାହିଁ ବୋଲି ପ୍ରମାଣ କରିଦେଖାଇଦେବା ଅଷ୍ଟ୍ରେଲୀୟଙ୍କୁ ଆଶ୍ଚର୍ଯ୍ୟଚକିତ କରିଛି। ରିଷଭ ପନ୍ତଙ୍କ ଇନିଂସ ଦେଖିଲେ ମୋର ହେଡିଂଲେରେ ବେନ୍ ଷ୍ଟୋକ୍ସଙ୍କ ଇନିଂସ ମନେପଡ଼ିଯାଉଛି। ପନ୍ତ ବ୍ୟାଟିଂ କରୁଥିବାବେଳେ ତାଙ୍କ ନିକଟରେ ଭୟ ଅବା ଚାପର କୌଣସି ଲକ୍ଷଣ ଦେଖାଯାଇ ନ ଥିଲା। ସେ ଏକ ଅବିଶ୍ୱସନୀୟ ଇନିଂସ ଖେଳିଥିଲେ। ଯୁବ ବ୍ୟାଟ୍ସମ୍ୟାନ ଶୁବମନ ଗିଲ୍ (୯୧)ମଧ୍ୟ ଭଲ ବ୍ୟାଟିଂ କରିଥିଲେ। ଅନ୍ୟପକ୍ଷରେ ଭାରତର ଯୁବ ବୋଲିଂ ଆକ୍ରମଣ ଆମକୁ ମ୍ୟାଚ ସାରା ଚାପରେ ରଖିଥିଲା। ତେଣୁ ଭାରତକୁ ପୂରା ଶ୍ରେୟ ଯିବ ବୋଲି ମୁଁ କହିବି।