ଭୁବନେଶ୍ୱର,୧୫।୧(ବ୍ୟୁରୋ): ରାଜଧାନୀରେ ଦୁର୍ଘଟଣା ରୋକିବାକୁ ଟ୍ରାଫିକ କଟକଣାକୁ ଗୁରୁତ୍ୱ ଦିଆଯାଉଛି। ହେଲେ ସହରର ବିଭିନ୍ନ ରାସ୍ତାରେ ଗର୍ତ୍ତ ସୃଷ୍ଟି ହୋଇ ଅନେକ ଦୁର୍ଘଟଣା ଘଟୁଥିଲେ ମଧ୍ୟ ଏହାକୁ ମରାମତି କରିବାକୁ ବିଭାଗୀୟ ଅଧିକାରୀଙ୍କ ତତ୍ପରତା ଦେଖିବାକୁ ମିଳୁନାହିଁ। ଏସ୍ପ୍ଲାନେଡ ମଲ୍ ପାର୍ଶ୍ୱ ରସୁଲ୍ଗଡ଼ ଶିଳ୍ପାଞ୍ଚଳ ଯିବା ରାସ୍ତାକୁ ଏହାର ଜ୍ୱଳନ୍ତ ଉଦାହରଣ ଭାବେ ନିଆଯାଇପାରେ। ଗତ ୧୫ ଦିନ ହେବ ଉକ୍ତ ରାସ୍ତାରେ ଗର୍ତ୍ତ ସୃଷ୍ଟି ହୋଇ ପାଣି ଜମି ରହୁଥିଲେ ହେଁ ଏହାକୁ ମରାମତି କରାଯାଉ ନାହିଁ। ଫଳରେ ଏହି ବାଟ ଦେଇ ଯାଉଥିବା ଲୋକମାନେ ଦୁର୍ଘଟଣାର ଶିକାର ହେଉଛନ୍ତି। ପ୍ରତିଦିନ ଶତାଧିକ କାର୍ ଓ ବାଇକ କ୍ଷତିଗ୍ରସ୍ତ ହେଉଥିବାବେଳେ ଇତିମଧ୍ୟରେ ୩୦ରୁ ଊର୍ଦ୍ଧ୍ୱ ଆହତ ହେଲେଣି। ଏନେଇ ସ୍ଥାନୀୟ ଲୋକ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ମାୟାଧର ବେହେରାଙ୍କୁ ବାରମ୍ବାର ଅବଗତ କରିବା ପରେ ମଧ୍ୟ ମରାମତି କରା ନ ଯିବା ଲୋକଙ୍କ ଜୀବନ ସହ ଖେଳ ଖେଳିବା ସଦୃଶ ବୋଲି ସାଧାରଣରେ ଅଭିଯୋଗ ହେଉଛି।
ଏନେଇ ସ୍ଥାନୀୟ ବାସିନ୍ଦା ଜମ୍ବେଶ୍ୱର ପରିଡ଼ାଙ୍କ କହିବା ହେଲା, ଉକ୍ତ ଗର୍ତ୍ତରେ ସପ୍ଲାଇ ପାଣି ଜମି ରହିଥିବାରୁ ତାହାର ଗଭୀରତା ସହଜରେ ଜଣାପଡ଼ୁନି। ଫଳରେ ପ୍ରତିଦିନ ଶତାଧିକ ବାଇକ ଓ କାର୍ ଚାଳକ ଜାଣି ନ ପାରି ଉକ୍ତ ଗର୍ତ୍ତରେ ପଡୁଛନ୍ତି। ଅନେକ ଦୁର୍ଘଟଣାର ଶିକାର ହେଉଥିବାବେଳେ ଟ୍ରାଫିକ୍ ସମସ୍ୟା ମଧ୍ୟ ସୃଷ୍ଟି ହେଉଛି। ବାଇକ ଚାଳକ ନିୟନ୍ତ୍ରଣ ହରାଇ ତଳକୁ ପଡ଼ି ଗୁରୁତର ହେଉଛନ୍ତି। ସେହିପରି ସ୍ଥାନୀୟ ଦୋକାନୀ ପୌଲସ୍ତି ପ୍ରଧାନଙ୍କ କହିବା ହେଲା, ଗତ ସୋମବାର ରାତିରେ ରସୁଲଗଡ଼ ଅଞ୍ଚଳର ଜଣେ ବାଇକ ଚାଳକ ଉକ୍ତ ଖାଲରେ ପଡ଼ି ନିୟନ୍ତ୍ରଣ ହରାଇବା ସହ ନିକଟରେ ଥିବା ଡ୍ରେନ୍ରେ ବାଇକ୍ ସହ ଖସି ପଡ଼ିଥିଲେ। ଏଥିରେ ତାଙ୍କ ମୁହଁ ଓ ନାକରେ ଗଭୀର କ୍ଷତ ସୃଷ୍ଟି ହେବାରୁ ତାଙ୍କୁ ହସ୍ପିଟାଲ ପଠାଯାଇଥିଲା। କେବଳ ସେ ନୁହନ୍ତି ବାଇକ୍ରେ ଯାଉଥିବା ଅନେକ ମହିଳା ମଧ୍ୟ ନିୟନ୍ତ୍ରଣ ହରାଇ ତଳେ ପଡ଼ି ଖଣ୍ଡିଆ ଖାବର ହେଉଛନ୍ତି। ଏ ନେଇ ବିଭାଗୀୟ ନିର୍ବାହୀ ଯନ୍ତ୍ରୀଙ୍କୁ ଅବଗତ କରାଗଲେ ମଧ୍ୟ ରାସ୍ତା ମରାମତି କରାଯାଉନାହିଁ। ୧୫ ଦିନ ଭିତରେ ପ୍ରାୟ ୩୦ରୁ ଅଧିକ ବାଇକ ଚଳାକ ହସ୍ପିଟାଲରେ ଭର୍ତ୍ତି ହେଲେଣି। ଅକାରଣରେ କାହାର ଜୀବନ ଯିବା ପରେ ବିଭାଗର ଚେତା ପଶିବ ବୋଲି ପୌଲସ୍ତି କହିଛନ୍ତି। ଏନେଇ ବିଭଗୀୟ ନିର୍ବାହୀ ଯନ୍ତ୍ରୀ ବେହେରାଙ୍କୁ ପଚାରିବାରେ ଉକ୍ତ ରାସ୍ତା ମରାମତି ପାଇଁ ବିଲ୍ ପାସ୍ ହୋଇସାରିଛି। ଦିନରେ ଗହଳି ପାଇଁ କାମ କରିବା ସମ୍ଭବ ହେଉନାହିଁ। ତେବେ ଆସନ୍ତା ୨ ଦିନ ଭିତରେ ଉକ୍ତ ରାସ୍ତାର ମରାମତି କାର୍ଯ୍ୟ ଶେଷ କରାଯିବ ବୋଲି ବେହେରା କହିଛନ୍ତି।