ଢେଙ୍କାନାଳ ଅଫିସ, ୧।୧ ଢେଙ୍କାନାଳ ଜିଲା ହିନ୍ଦୋଳ ତହସିଲ୍ ଅଞ୍ଚଳରେ କୋଭିଡ୍ ସଂକ୍ରମଣରେ ମୃତ୍ୟୁ ଘଟିଥିବା ୮ ଜଣଙ୍କ ପୂର୍ଣ୍ଣାଙ୍ଗ ଠିକଣା ମିଳୁନାହିଁ। ଫଳରେ ସମ୍ପୃକ୍ତ ମୃତକଙ୍କ ପରିବାରକୁ ଅନୁକମ୍ପାମୂଳକ ସହାୟତା ରାଶି ବଣ୍ଟନ କରାଯାଇପାରୁନାହିଁ। ଅନ୍ୟପଟେ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁଯାୟୀ ଅଡିଟେଡ୍ କୋଭିଡ୍ ଡେଥ୍ ଲିଷ୍ଟରେ ଉଲ୍ଲେଖ ନାମ ଆଧାରରେ ସମ୍ପୃକ୍ତ ୮ମୃତକଙ୍କ ଉତ୍ତରାଧିକାରୀକୁ ଅନୁକମ୍ପାମୂଳକ ସହାୟତା ରାଶି ପ୍ରଦାନ କରିବା ପାଇଁ ଜିଲାପାଳ ସରୋଜ କୁମାର ସେଠୀ ନିର୍ଦ୍ଦେଶ ଦେଇଛନ୍ତି। ଅଡିଟେଡ୍ କୋଭିଡ୍ ଡେଥ୍ଲିଷ୍ଟରେ ତାଲିକାଭୁକ୍ତ ଉକ୍ତ ୮ ମୃତକ ହେଲେ ହିନ୍ଦୋଳ ତହସିଲ ନୂଆପାଣିସାହି ନିଜିଗଡ ଅଞ୍ଚଳର ମନୋଜ ବରାଳ (୪୯), ବାଲିମୀ ଅଞ୍ଚଳର ସୁବାସ ଚନ୍ଦ୍ର ପଟ୍ଟନାୟକ (୫୦), ଡଲି ବିଶ୍ୱାଳ (୩୦), ପୂର୍ଣ୍ଣଚନ୍ଦ୍ର ସାହୁ (୭୧), ହିନ୍ଦୋଳ ଅଞ୍ଚଳର ସଜନି ନାୟକ (୪୦), ପଡ଼ିଆବେଡ଼ା ଅଞ୍ଚଳର ବିଦ୍ୟାଧର ଟୁଡୁ (୫୪), ଗମୁଆ ଅଞ୍ଚଳର ବବ୍ରୁବାହାନ ସାମଲ (୫୬), ଚାନ୍ଦୋଳ ଅଞ୍ଚଳର ମହେଶ୍ୱର ଦାସ (୪୮)। ଏ ନେଇ ହିନ୍ଦୋଳ ତହସିଲ କାର୍ଯ୍ୟାଳୟ ପକ୍ଷରୁ ନୋଟିସ୍ ଜାରି କରାଯାଇଛି। ବିଡିଓ, ପିଇଓ, ଉପଖଣ୍ଡର ସମସ୍ତ ଥାନାଧିକାରୀ, ରାଜସ୍ବ ନିରୀକ୍ଷକଙ୍କୁ ନୋଟିସର ନକଲ କାର୍ଯ୍ୟାଳୟରେ ଲଗାଇବା ସହିତ ମୃତବ୍ୟକ୍ତିଙ୍କ ଠିକଣା ଖୋଜିବା ଲାଗି ପଦକ୍ଷେପ ନେବାକୁ କୁହାଯାଇଛି।