ଟେନସା,୧୭ା୭(ସମୀର କୁମାର ପାଢୀ): ସୁନ୍ଦରଗଡ଼ ଜିଲା କୋଇଡା ବ୍ଲକ କାଲଟା ଗ୍ରାମ ପଞ୍ଚାୟତ ଅନ୍ତର୍ଗତ ତୋଡା ଗୀର୍ଜା ଟୋଲା ରେ ଥିବା ଅଙ୍ଗନବାଡି କେନ୍ଦ୍ର ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଜରାଜୀର୍ଣ୍ଣ ହୋଇପଡିଛି । ଏହି ଅଙ୍ଗନବାଡି କେନ୍ଦ୍ର ଏବେ ଅସୁରକ୍ଷିତ ହୋଇପଡିଛି। ଛାତ ଭାଙ୍ଗିରୁଜି ଗଲାଣି। ଅସରାଏ ବର୍ଷା ହେଲେ ଅତଡା ଖସିବା ସହ ଛାତରୁ ଗଳୁଛି ପାଣି। ଫଳରେ ବର୍ଷାଦିନେ ଶିଶୁମାନେ ବସିବା ସମ୍ଭବ ହେଉନାହିଁ। ଏହାଛଡା ଛାତରୁ ପଲସ୍ତରା ଖସି କେତେବେଳେ ଯେ ଅଘଟଣ ଘଟିବ କହି ହେଉନାହିଁ। ଏ ସମ୍ପର୍କରେ ଅଙ୍ଗନବାଡି କର୍ମୀ ମାଇନି ଟପ୍ନୋଙ୍କୁ ପଚାରିବାରେ ବାରମ୍ବାର ଏ ବିଷୟରେ ସୁପରଭାଇଜର ଓ ସିଡିପିଓଙ୍କୁ ଅବଗତ କରାଯାଇ ଆସୁଛି। ହେଲେ କୌଣସି ସୁଫଳ ମିଳିନାହିଁ। ଶିଶୁଙ୍କ ଜୀବନ ପ୍ରତି କାହାରି ନିଘା ଥିବା ପରି ମନେ ହେଉନାହିଁ। ଏନେଇ କୋଇଡା ବ୍ଲକ ଚେୟାରମ୍ୟାନ ସୁରେଶ ନାଏକଙ୍କୁ ପଚାରିବାରେ ସେଠାରେ ଜାଗା ନ ଥିବାରୁ ଘର ହୋଇ ପାରୁନାହିଁ। ଖୁବଶୀଘ୍ର ନୂଆ ଘର ତିଆରି ହେବ। ହେଲେ ଖଣି ଅଞ୍ଚଳରେ ଜିଲା ଖଣିଜ ପାଣ୍ଠି ଥାଇ ଅସୁରକ୍ଷିତ ଛାତ ତଳେ ଦେଶର ଭବିଷ୍ୟତ ଅସୁରକ୍ଷିତ ରହିବା ବିଡମ୍ବନାର ବିଷୟ। ଏଥିପ୍ରତି ଜିଲା ପ୍ରଶାସନ ତୁରନ୍ତ ଦୃଷ୍ଟି ଦେବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି। ସୂଚନାଯୋଗ୍ୟ, ୫-ଟି ଅଧୀନରେ ଚାଲିଥିବା ରୂପାନ୍ତରିତ କାର୍ଯ୍ୟ ହେଉ ଅବା ବିଶ୍ୱସ୍ତରୀୟ ଷ୍ଟାଡିୟମ ଅସରାଏ ବର୍ଷା ସମସ୍ତ କାମର ମାନ କିପରି ତାହା ପଦାରେ ପକାଇ ଦେଉଛି। ବିଭିନ୍ନ ସରକାରୀ କାମରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି, ହେଲେ ନିମ୍ନମାନର କାର୍ଯ୍ୟ ସାଙ୍ଗକୁ ଦୁର୍ନୀତିର ଗନ୍ଧ ସବୁଠି ବାରି ହୋଇପଡୁଛି।