ଭୁବନେଶ୍ୱର,୩।୬(ବ୍ୟୁରୋ): ଦାଦାବଟି ପାଇଁ ଗଢ଼ିଥିଲେ ଗ୍ୟାଙ୍ଗ। ଯିଏ ଦାଦାବଟି ଦେଉ ନ ଥିଲେ ତାଙ୍କୁ ମାରଣାସ୍ତ୍ରରେ ଆକ୍ରମଣ କରୁଥିଲେ। ଏପରିକି ଖଣ୍ଡା ଭୁଜାଲି ଧରି ଏହାର ଭିଡ଼ିଓ ପ୍ରସ୍ତୁତ କରୁଥିଲେ। ଲୋକଙ୍କ ମନରେ ଭୟ ସୃଷ୍ଟି କରିବାକୁ ସେସବୁକୁ ସୋସିଆଲ ମିଡିଆରେ ଭାଇରାଲ କରୁଥିଲେ। ରାଜଧାନୀରେ ଏଭଳି ଆତଙ୍କ ସୃଷ୍ଟି କରୁଥିବା ଏକ ଗ୍ୟାଙ୍ଗ କମିଶନରେଟ ପୋଲିସ ହାତରେ ଧରାପଡ଼ିଛି। ଗ୍ୟାଙ୍ଗର ୭ ଜଣଙ୍କୁ ଏୟାରଫିଲ୍ଡ ଥାନା ପୋଲିସ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ସୁନ୍ଦରପଦା ଖଣ୍ଡୁଆଳ ସାହିର ରାଜେଶ ବେହେରା ଓରଫ ରାଜା, ବିରେନ୍ ରାଉତ ଓରଫ ବରୁ, ସୁନ୍ଦରପଦା ଢିପସାହିର ବୀରେନ୍ଦ୍ର ଭୋଇ ଓରଫ ପିଣ୍ଟୁନା, ପୋଖରୀପୁଟ ଦେବୀସାହିର ସୁନିଲ ସାମଲ ଓରଫ ସୋନୁ, ଅମର ସାମଲ ଓରଫ ବାବୁ, କପିଳପ୍ରସାଦ ଉପରସାହିର ମନୋଜ ଭୋଇ ଓରଫ ମନୁଆ ଓ ସୁନ୍ଦରପଦା ପାଟଣାସାହିର ଦେବରାଜ ବେହେରା ଓରଫ ଦେବ। ଏମାନଙ୍କଠାରୁ ଦୁଇଟି ଭୁଜାଲି ଜବତ କରାଯାଇଛି। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତରୁ ପଠାଇ ଦିଆଯାଇଛି। ଏମାନେ ଅନ୍ୟ କେଉଁ ଅପରାଧରେ ସମ୍ପୃକ୍ତ ଅଛନ୍ତି, କେତେଜଣଙ୍କଠାରୁ ଦାଦାବଟି ଆଣିଛନ୍ତି, ଗ୍ୟାଙ୍ଗରେ ଆଉ କେତେଜଣ ସଦସ୍ୟ ଅଛନ୍ତି, ସେସମ୍ପର୍କରେ ପୋଲିସ ଖୋଳତାଡ଼ କରୁଥିବାବେଳେ ଅଧିକ ତଥ୍ୟ ହାସଲ ପାଇଁ ଅଭିଯୁକ୍ତଙ୍କୁ ରିମାଣ୍ଡରେ ଆଣିବାକୁ ପ୍ରକ୍ରିୟା ଆରମ୍ଭ କରିଛି।
ସୂଚନା ଅନୁଯାୟୀ, ଅଭିଯୁକ୍ତମାନେ ଏକ ଗ୍ୟାଙ୍ଗ୍ ଗଢ଼ି ସ୍ଥାନୀୟ ଅଞ୍ଚଳର ବ୍ୟବସାୟୀ ଓ ଦୋକାନୀଙ୍କ ଠାରୁ ଦାଦାବଟି ଆଦାୟ କରୁଥିଲେ। ସୁନ୍ଦରପଦା ବୋତଣ୍ଡା ଛକରେ ଚା’ ଦୋକାନୀ ସିପୁ ବେହେରାଙ୍କୁ ଅଭିଯୁକ୍ତମାନେ ଦାଦାବଟି ମାଗିଥିଲେ। ମେ’ ୨୭ ରାତିରେ ସିପୁ ଦୋକାନ ବନ୍ଦ କରିବାକୁ ଯାଉଥିବାବେଳେ ଗ୍ୟାଙ୍ଗର ସଦସ୍ୟମାନେ ମୁହଁରେ ମୁଖା ଦେଇ ସ୍କୁଟି ଓ ଗୋଟିଏ ବାଇକ୍ରେ ଆସି ସେଠାରେ ପହଞ୍ଚତ୍ଥିଲେ। ହାତରେ ଧରିଥିଲେ ଦୁଇଟି ଭୁଜାଲି। ଅଭିଯୁକ୍ତମାନେ ତାଙ୍କୁ ଗାଳିଗୁଲଜ ସହ ଜାଣିଆଣ ଆକ୍ଷପ କରିବା ସହ ପୁଣିଥରେ ଦାଦାବଟି ମାଗିଥିଲେ। ହେଲେ ପୂର୍ବଭଳି ଦାଦାବଟି ଦେବାକୁ ସିପୁ ମନା କରିବାରୁ ଅଭିଯୁକ୍ତମାନେ ତାଙ୍କୁ ଭୁଜାଲିରେ ଗୋଡ଼ାଇ ଆକ୍ରମଣ କରିଥିଲେ। ସେମାନେ ସିପୁଙ୍କ ଦୁଇଟି ହାତକୁ କହୁଣିଠାରୁ ହାଣିଦେଇଥିଲେ। ସ୍ଥାନୀୟ ଲୋକେ ପହଞ୍ଚତ୍ୟିବାରୁ ସେମାନେ ଫେରାର ହୋଇଯାଇଥିଲେ। ସିପୁଙ୍କୁ ଗୁରୁତର ଅବସ୍ଥାରେ ଏମ୍ସରେ ଭର୍ତ୍ତି କରାଯାଇଥିଲା। ସିପୁଙ୍କ ଭାଇ ଶ୍ରୀକାନ୍ତ ଥାନାରେ ଅଭିଯୋଗ କରିବା ପରେ ପୋଲିସ ଗତ ୨୮ ତାରିଖରେ ମାମଲା (ନଂ.୧୩୩/୨୨) ରୁଜୁକରି ତଦନ୍ତ ଆରମ୍ଭ କରିଥିଲା। ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତମାନଙ୍କୁ କାବୁ କରିଥିଲା।