ଛତ୍ରପୁର,୨୧।୪(ଡି.ଏନ୍.ଏ.): ରାଜ୍ୟ ସରକାରଙ୍କ ପକ୍ଷରୁ ଗତ ଆର୍ଥିକ ବର୍ଷରେ ଗଞ୍ଜାମ-କନ୍ଧମାଳ ଜିଲା ବ୍ଲକ ସଂଯୋଗ ଯୋଜନା ଆରମ୍ଭ ହୋଇଥିଲା। ଏହି ପରିପ୍ରେକ୍ଷୀରେ କେରୁବାଡି-ଆଡିପଙ୍ଗା ଭାୟା ବେଡେପଙ୍ଗା ରାସ୍ତା ନିର୍ମାଣ ପରିକଳ୍ପନା କରାଯାଇଥିଲା। ତେବେ ଉକ୍ତ ରାସ୍ତା ପାଇଁ ଆବଶ୍ୟକ ଜମି ଡିମାରକେଶନରେ ବିଳମ୍ବ ହେଉଥିବାରୁ କାମ ଆରମ୍ଭ ହୋଇ ପାରୁନାହିଁ। ଏହି ରାସ୍ତା ନିର୍ମାଣ ହେଲେ ଗଞ୍ଜାମ ଓ କନ୍ଧମାଳ ଜିଲାର ବ୍ଲକଗୁଡିକ ମଧ୍ୟରେ ସଂଯୋଗ ହୋଇପାରିବ ଏବଂ ଆଦିବାସୀ ବହୁଳ ଗାଁର ଲୋକେ ଉପକୃତ ହୋଇପାରିବେ।
ମିଳିଥିବା ସୂଚନା ଅନୁସାରେ, ଉକ୍ତ ରାସ୍ତା ନିର୍ମାଣ ପାଇଁ ମାର୍ଚ୍ଚ ୧୭ ତାରିଖରେ ଏଗ୍ରିମେଣ୍ଟ ହୋଇସାରିଛି। ତେବେ ଉକ୍ତ ରାସ୍ତାରେ ଜଙ୍ଗଲ ଜମି ଓ ସରକାରୀ ଜମି ରହିଥିବା ଏବଂ ଡିମାରକେଶନ ହୋଇ ନ ଥିବାରୁ ରାସ୍ତା କାମ ଆରମ୍ଭରେ ବିଳମ୍ବ ହେଉଛି ା କନ୍ଧମାଳ ଜିଲା ବାଲିଗୁଡା ଗ୍ରାମ୍ୟ କାର୍ଯ୍ୟ ଡିଭିଜନର ସୁପରିଡେଣ୍ଟ ଇଂଜିନିୟରଙ୍କ ପକ୍ଷରୁ ଗଞ୍ଜାମ ଜିଲା ସୋରଡା ତହସିଲଦାର ଓ କନ୍ଧମାଳ ଜିଲା ଦାରିଙ୍ଗବାଡି ତହସିଲଦାରଙ୍କୁ ୧୮ ତାରିଖରେ ଚିଠି ଲେଖାଯାଇଛି। ସେହିପରି ସୁପରିଡେଣ୍ଟ ଇଂଜିନିୟରଙ୍କ ପକ୍ଷରୁ ଏ ସମ୍ପର୍କରେ ପଦକ୍ଷେପ ନେବା ପାଇଁ ଆଉ ଏକ ଚିଠି ଗଞ୍ଜାମ ଜିଲା ଭଞ୍ଜନଗର ଡିଭିଜନାଲ ଫରେଷ୍ଟ ଅଫିସର ଓ କନ୍ଧମାଳ ଜିଲା ବାଲିଗୁଡା ଡିଭିଜନାଲ ଫରେଷ୍ଟ ଅଫିସରଙ୍କୁ ଚିଠି କରାଯାଇଛି। ଏଥିସହ ଏ ସମ୍ପର୍କରେ ଗଞ୍ଜାମ ଓ କନ୍ଧମାଳ ଜିଲାପାଳଙ୍କୁ ଅବଗତ କରାଯିବା ସହ ଏହା ଉପରେ ପଦକ୍ଷେପ ନେବାକୁ ଅନୁରୋଧ କରାଯାଇଛି। ଉକ୍ତ ରାସ୍ତା ପାଇଁ ଆବଶ୍ୟକ ଜମି ନିମନ୍ତେ ସୋରଡା ଓ ଦାରିଙ୍ଗବାଡି ତହସିଲ ଅନ୍ତର୍ଗତ ରାଜସ୍ବ ନିରୀକ୍ଷକମାନଙ୍କ ଯୁଗ୍ମ ତଦନ୍ତ ଆବଶ୍ୟକ ପଡୁଛି। ଯୁଗ୍ମ ତଦନ୍ତ କରି ସରକାରୀ ଜମି ଓ ଜଙ୍ଗଲ ଜମିର ଡିମାରକେଶନ କରିବାକୁ ଉକ୍ତ ଚିଠିରେ ଅନୁରୋଧ କରାଯାଇଛି।ଏଥିପାଇଁ ଏକ ତାରିଖ ନିର୍ଦ୍ଧାରିତ କରିବା ସହ ଏ ସମ୍ପର୍କରେ ପୂର୍ବରୁ ଜଣାଇବାକୁ କୁହାଯାଇଛି। ସେହିପରି ସମ୍ପୃକ୍ତ ଅଞ୍ଚଳର ଫରେଷ୍ଟ ରେଞ୍ଜର ଓ ଇଂଜିନିୟରଙ୍କ ସହ ସମନ୍ବୟ ରଖି ଏହାକୁ ତ୍ୱରାନ୍ବିତ କରିବାକୁ ଅନୁରୋଧ କରାଯାଇଛି। ଭଞ୍ଜନଗର ଓ ବାଲିଗୁଡା ଫରେଷ୍ଟ ଡିଭିଜନ ଅନ୍ତର୍ଗତ ଫରେଷ୍ଟ ରେଞ୍ଜରମାନେ ଜଙ୍ଗଲ ଜମିର ଡିମାରକେଶନ କରିବେ। ଏଥିରେ ସମ୍ପୃକ୍ତ ଅଞ୍ଚଳର ୨ ତହସିଲରଦାର ଓ ସ୍ଥାନୀୟ ଇଞ୍ଜିନିୟରମାନଙ୍କ ସହ ସମନ୍ବୟ ରଖି ଏହାକୁ ଅତିଶୀଘ୍ର ତ୍ୱରାନ୍ବିତ କରିବାକୁ ଚିଠିରେ କୁହାଯାଇଛି ା ଡିମାରକେସନ ଯେଭଳି ଶୀଘ୍ର ହେଲେ କାମ ଆରମ୍ଭ ହେବ ଏବଂ ଏହି କାର୍ଯ୍ୟ ନିର୍ଦ୍ଧାରିତ ସମୟରେ ସରିବ ବୋଲି ଉକ୍ତ ଚିଠିରେ ଉଲ୍ଳେଖ ରହିଛି ା ସୂଚନାଯୋଗ୍ୟ, ଉକ୍ତ ରାସ୍ତାରେ ଗମନାଗମନ ସୁବିଧା ନ ଥିବା ଯୋଗୁଁ ଆଦିବାସୀ ବହୁଳ ଗାଁର ଲୋକେ ଶିକ୍ଷା, ସ୍ବାସ୍ଥ୍ୟରୁ ବଞ୍ଚିତ ରହିଆସୁଛନ୍ତି। ଅନ୍ୟପକ୍ଷରେ ସରକାରୀ ଅଫିସର ଓ କର୍ମଚାରୀ ଚାହିଁଲେ ମଧ୍ୟ ଉକ୍ତ ଅଂଚଳକୁ ଯାଇପାରୁନାହାନ୍ତି ା ଆଦିବାସୀ ଲୋକେ ଜଙ୍ଗଲ ରାସ୍ତା ଦେଇ ଗଞ୍ଜାମ ଓ କନ୍ଧମାଳ ଜିଲାକୁ ଯିବାକୁ ବାଧ୍ୟ ହେଉଛନ୍ତି। ଆଡିପଙ୍ଗା ଓ ଆଖପାଖ ଆଦିବାସୀ ଗାଁର ଲୋକେ ସୋରଡା ବ୍ଲକ ଗାଜଲବାଡି ପଞ୍ଚାୟତ ଅଫିସକୁ ଆସିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଏଥିସହ ଉଭୟ ଆଡିପଙ୍ଗା ଓ କେରୁବାଡି ଅଞ୍ଚଳ ସମେତ ମହୁଲପଲ୍ଳୀ, ବାଙ୍ଗରା, ରମନାବାଡି, ଗୋବାଙ୍ଗି, ମାଙ୍କଡଖାରି, ଆଡିଗୁଡ ଅଞ୍ଚଳର ଆଦିବାସୀମାନେ ଗାଜଲବାଡି ଉପରେ ବଜାର ଓ ଅନ୍ୟାନ୍ୟ କାର୍ଯ୍ୟ ପାଇଁ ନିର୍ଭର କରୁଛନ୍ତି।
