ଖୋର୍ଦ୍ଧା ଅଫିସ,୧୫।୧୨: ସ୍ବଚ୍ଛ ସର୍ବେକ୍ଷଣ ତାଲିକାରେ ଖୋର୍ଦ୍ଧା ସହରକୁ ଶୀର୍ଷତା ସ୍ଥାନରେ ରଖିବା ଲାଗି ପୌର ପରିଷଦ ପକ୍ଷରୁ ‘ସ୍ବଚ୍ଛ ଭାରତ ସୁସ୍ଥ ଭାରତ’ ଅଭିଯାନ ଆରମ୍ଭ ହୋଇଛି। ଖୋର୍ଦ୍ଧା ସହରରେ ୨୨ଟି ଓ୍ବାର୍ଡ ରହିଛି। ତନ୍ମଧ୍ୟରୁ ୨୦ ଓ୍ବାର୍ଡର ଅଳିଆ ଉଠାଇବା ଏବଂ ଡ୍ରେନ ସଫା ଲାଗି ଠିକା ସଂସ୍ଥାକୁ ଦିଆଯାଇଛି। ଦୈନିକ ଠିକା ସଂସ୍ଥା ଦ୍ୱାରା ଅଳିଆ ଉଠୁଥିବା ପ୍ରଶାସନ ପକ୍ଷରୁ କୁହାଯାଉଛି। ଏଥିଲାଗି ପ୍ରଶାସନ ପକ୍ଷରୁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। ତେବେ ବାସ୍ତବ ଚିତ୍ର ସମ୍ପର୍ଣ୍ଣ ଭିନ୍ନ। ସହରର ବିଭିନ୍ନ ସ୍ଥାନରେ ଅଳିଆ ପଡ଼ି ରହୁଛି। ଡ୍ରେନ ସଫା ନ ହେବା ଫଳରେ ପରିବେଶ ପ୍ରଦୂଷିତ ହେବା ସହ ଦୁଗର୍ନ୍ଧରେ ନାକ ଫାଟିି ପଡୁଛି ବୋଲି ନଗର କଂଗ୍ରେସ ଅଭିଯୋଗ କରିଛି। ସୋମବାର ଖୋର୍ଦ୍ଧା ପୌରାଞ୍ଚଳରେ ବିଭିନ୍ନ ସମସ୍ୟା ନେଇ କଂଗ୍ରେସ କର୍ମୀମାନେ ଗୀତାଭବନ ଠାରୁ ଏକ ଶୋଭାଯାତ୍ରାରେ ବାହାରି ପୌରପରିଷଦ କାର୍ଯ୍ୟାଳୟଠାରେ ପହଞ୍ଚି ଘେରାଉ କରିବା ସହ ଫାଟକ ଆଗରେ ଧାରଣା ଦେଇଥିଲେ। ବିଭିନ୍ନ ଓ୍ବାର୍ଡରେ ପିଏଚଡି ପକ୍ଷରୁ ଜଳଯୋଗାଣ ନିମେନ୍ତ ପାଇପ ଲାଇନ ମରାମତି ପାଇଁ ରାସ୍ତା ଖୋଳା ଯାଇଛି। ମରାମତି ନ ହେବାରୁ ଦୈନିକ ଦୁର୍ଘଟଣା ଘଟୁଛି। ଅଚଳ ନଳକୂପ ଓ ପାଇପ ମରାମତି କରାଯାଉନାହିଁ। ପୌରାଞ୍ଚଳରେ ଅନେକ ଗରିବ ପରିବାରଙ୍କୁ ରାଶନ କାର୍ଡ ଅଦ୍ୟାବଧି ଦିଆଯାଇନାହିଁ। ଭୂମିହୀନଙ୍କୁ ଚିହ୍ନଟ କରାଯାଇ ସ୍ଥାୟୀ ପ୍ରମାଣପତ୍ର ପ୍ରଦାନ କରାଯାଉ। ମୃତକଙ୍କ ପରିବାରକୁ ହରିଶ୍ଚନ୍ଦ୍ର ଯୋଜନାରେ ସରକାରଙ୍କ ପକ୍ଷରୁ ୨ହଜାର ଟଙ୍କା ପ୍ରଦାନ ଲାଗି ଯୋଜନା ସତ୍ତ୍ୱେ ଗତ ୨ବର୍ଷ ହେବ କୌଣସି ସହାୟତା ଦିଆଯାଉନାହିଁ। ଖୋର୍ଦ୍ଧା ଶିଳ୍ପାଞ୍ଚଳରୁ ନିର୍ଗତ ଧୂଅଁା, ବର୍ଜ୍ୟବସ୍ତୁ ଓ ରାସାୟନିକ ଦୂଷିତ ଜଳ ତଳିଆ ଅଞ୍ଚଳରେ ଥିବା ଓ୍ବାର୍ଡରେ ପ୍ରବେଶ କରି ପରିବେଶକୁ ଦୂଷିତ କରୁଛି। ଫନୀ ବାତ୍ୟାରେ କ୍ଷତିଗ୍ରସ୍ତ ଉଠାଦୋକାନୀଙ୍କୁ ସହାୟତା ରାଶି ଦିଆଯାଇନାହିଁ। ଏହି ସମସ୍ତ ସମସ୍ୟା ସମାଧାନ ନ ହେଲେ ଆଗାମୀ ଦିନରେ ପୌର କାର୍ଯ୍ୟାଳୟକୁ ଅଚଳ କରିଦିଆଯିବ ବୋଲି କଂଗ୍ରେସ ଚେତାବନୀ ଦେଇଛି। ଉପଜିଲାପାଳ ଅଶୋକ ବେହେୁରିଆ, କାର୍ଯ୍ୟନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀ, ଏସ୍ଡିପିଓ ସୁଶିଲ ମିଶ୍ର, ଟାଉନ ଥାନାଧିକାରୀ ଉମାଶଙ୍କର ସିଂ ପ୍ରମୁଖ ପହଞ୍ଚି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏହି ଧାରଣାରେ ନଗର କଂଗ୍ରେସ ସଭାପତି ରଞ୍ଜିତ୍ ମହାପାତ୍ରଙ୍କ ନେତୃତ୍ୱରେ ପିସିସି ସଭ୍ୟ ଶିଶିର ପରିଡା, ପିସିସି ମୁଖପାତ୍ର ଅମିୟ ମହାନ୍ତି, ବିଭାସ ମହାପାତ୍ର ପ୍ରମୁଖଙ୍କ ସମେତ ବହୁ କର୍ମୀ ଉପସ୍ଥିତ ଥିଲେ।