୫ ବର୍ଷ ଧରି ଫିଲିପାଇନ୍ସର ଜଣେ ମହିଳାଙ୍କୁ ଏକ ପଞ୍ଜୁରୀରେ ରଖାଯାଇଛି। ଯଦିଓ ତାଙ୍କ ପରିବାର ଲୋକେ ଦାବି କରିଛନ୍ତି ଯେ, ଏହା ତାଙ୍କ ସୁରକ୍ଷା ପାଇଁ । କାରଣ ଏହି ମହିଳା ଜଣକ ଗମ୍ଭୀର ମାନସିକ ସମସ୍ୟାରେ ଜଡ଼ିତ। ୨୯ ବର୍ଷୀୟା ବେବେ ତାଙ୍କ ପରିବାର ସହିତ ଫିଲିପାଇନ୍ସରେ ରହୁଥିଲେ। ସେ ଏକ ସ୍ଥାନୀୟ ଦୋକାନରେ କାମ କରୁଥିଲେ। ଏହା ବ୍ୟତୀତ, ସେ ପେସାରେ ମଡେଲ ହେବାର ସ୍ବପ୍ନ ଦେଖିଥିଲେ। ତେବେ, ୨୦୧୪ ମସିହାରେ, ଏହା ଜଣାପଡିଲା ବେବେ ସାଇକୋଟିକ ଡିପ୍ରେସନରେ ପୀଡିତ ଅଛନ୍ତି। ଏହି ଅବସ୍ଥାର ଅର୍ଥ ହେଲା ବେବେଙ୍କର ହାଲୁସିନାସନ (ମତିଭ୍ରମ) ହୋଇଗଲା। ତାଙ୍କ ମନୋବଳ ଦ୍ରୁତ ଗତିରେ ବଦଳିବାକୁ ଲାଗିଲା। ସେ ଉଦାସ ହୋଇଗଲେ। ଅବସ୍ଥା ଦେଖି ତାଙ୍କୁ ଡାକ୍ତରଖାନାର ମାନସିକ କେନ୍ଦ୍ରରେ ଭର୍ତ୍ତି କରାଯାଇଥିଲା ଏବଂ ଏକ ବର୍ଷ ଚିକିତ୍ସା ପରେ ଏହା ଭଲ ହେବାରେ ଲାଗିଲା।ପରେ ତାଙ୍କୁ ଘରକୁ ପଠାଯାଇଥିଲା, କିନ୍ତୁ ୨୦୧୫ରେ ତାଙ୍କ ପିତାଙ୍କ ସ୍ବାସ୍ଥ୍ୟ ଅବସ୍ଥା ଖରାପ ହୋଇଯାଇଥିଲ। ଏହି କାରଣରୁ ତାଙ୍କ ପରିବାରକୁ ଅନେକ ଆର୍ଥିକ ସମସ୍ୟାର ସମ୍ମୁଖୀନ ହେବାକୁ ପଡିଲା। ପରେ ବେବେଙ୍କ ଔଷଧ ମଧ୍ୟ ବନ୍ଦ ହୋଇଗଲାରୁ ପରିସ୍ଥିତି ଜଟିଳ ହୋଇପଡ଼ିଥିଲା। ପୁଣି ଥରେ ସେ ଡିପ୍ରେସନକୁ ଚାଲିଗଲେ। ବେଳେବେଳେ ବେବେ ଏତେ ମାତ୍ରାରେ ହିଂସ୍ର ହୋଇପଡ଼ୁଥିଲେ ଯେ, ତାଙ୍କ ସୁରକ୍ଷା ପାଇଁ ପରିବାର ଲୋକେ ତାଙ୍କୁ ପଞ୍ଜୁରୀରେ ରଖିବାକୁ ଏକପ୍ରକାର ବାଧ୍ୟ ହେଲେ।
