ପାରାଦୀପ, ୩୦।୧୦(ସ୍ବ.ପ୍ର.): ଝିଅ ପୁଅ ଜନ୍ମ ହେବା ପାଇଁ ଏବେବି ମହିଳାଙ୍କୁ ଦୋଷ ଦିଆଯାଉଛି। ଜଣେ ମହିଳାଙ୍କ ପୂର୍ବରୁ ୨ଟି ଝିଅ ଥିଲା। ପୁନର୍ବାର ସେ ଗର୍ଭବତୀ ହୋଇଥିଲା। ମାତ୍ର ପ୍ରସବର ଗୋଟିଏ ଦିନ ପୂର୍ବରୁ ପୁନର୍ବାର ଝିଅ ଜନ୍ମ ହେବା ଭୟରେ ସ୍ବାମୀ ତାଙ୍କୁ ଘରୁ ରାତିରେ ବାହାର କରିଦେଇଥିଲେ। ପୋଲିସ ତାଙ୍କୁ ନେଇ ଜରାଶ୍ରମରେ ରଖିବା ପରେ ପୁତ୍ର ସନ୍ତାନ ଜନ୍ମ ହୋଇଥିଲା। ଖବରପାଇ ସ୍ବାମୀ ଆସି ମା’ ଓ ଶିଶୁ ପୁତ୍ରକୁ ଘରକୁ ନେଇଛନ୍ତି। ଏଭଳି ଘଟଣା ଘଟିଛି ଜଗତ୍ସିଂହପୁର ଜିଲା ପାରାଦୀପସ୍ଥିତ ଲକ୍ ଥାନା ଅଞ୍ଚଳରେ।
ସମ୍ପୃକ୍ତ ଦମ୍ପତି ହେଲେ ସୁନ୍ଦରଗଡ ଜିଲା ଯଶୀପୁର ଥାନା ଅନ୍ତର୍ଗତ ଜଙ୍କେଶ୍ୱର ଗ୍ରାମର ହରିଆ ପର୍ତ୍ତୀ ଓ ତାଙ୍କ ସ୍ତ୍ରୀ ସଙ୍ଗୀତା(୨୭)। ଏହି ଦମ୍ପତି ପ୍ରାୟ ଦୁଇବର୍ଷ ହେବ ଲକ୍ଥାନା ଅନ୍ତର୍ଗତ ମୁଣ୍ଡାସାହିରେ ରହୁଛନ୍ତି। ସଙ୍ଗୀତା ଗର୍ଭବତୀ ଥିବାବେଳେ ଶୁକ୍ରବାର ରାତିରେ ଦମ୍ପତିଙ୍କ ମଧ୍ୟରେ ଝଗଡା ହୋଇଥିଲା। ସେତେବେଳକୁ ସଙ୍ଗୀତାଙ୍କ ପ୍ରସବଜନିତ ଯନ୍ତ୍ରଣା ଆରମ୍ଭ ହୋଇଯାଇଥିଲା। କୌଣସି ସୂତ୍ରରୁ ପୁନର୍ବାର ଝିଅ ହେବ ବୋଲି ଆଶଙ୍କା କରି ହରିଆ ତାଙ୍କୁ ଘରୁ ବାହାର କରିଦେଇଥିଲେ। ସଙ୍ଗୀତା ବହୁ କଷ୍ଟରେ ପାରାଦୀପ ଲକ୍ ଥାନାରେ ପହଞ୍ଚତ୍ ସ୍ବାମୀଙ୍କ ବିରୋଧରେ ଅଭିଯୋଗ କରିଥିଲେ। ପୋଲିସ ତୁରନ୍ତ ତାଙ୍କୁ ନେଇ ଥାନା ଅନ୍ତର୍ଗତ ଗଡ ଗ୍ରାମସ୍ଥିତ ରତ୍ନମାଳି ଜେମା ଜରାଶ୍ରମରେ ରଖିଥିଲା। ଶନିବାର ସକାଳୁ ସଙ୍ଗୀତାଙ୍କ ଏକ ପୁତ୍ର ସନ୍ତାନ ଜନ୍ମ ହୋଇଛି। ଏହି ଖବର ଜରାଶ୍ରମର ସଭାପତି ସନ୍ତୋଷ ବେହେରା ଲକ୍ ଥାନାଧିକାରୀ ସବ୍ୟସାଚୀ ରାଉତଙ୍କୁ ସୂଚନା ଦେଇଥିଲେ। ପୋଲିସ ସ୍ବାମୀ ହରିଆଙ୍କୁ ଥାନାକୁ ଆଣି ସବୁକଥା କହିଥିଲା। ଏହାପରେ ହରିଆ ପୋଲିସ ଓ ଜରାଶ୍ରମର କର୍ମକର୍ତ୍ତାଙ୍କୁ ଅନୁରୋଧ କରି ସ୍ତ୍ରୀ ଓ ଶିଶୁପୁତ୍ରକୁ ନେଇ ଘରକୁ ଫେରିଛନ୍ତି। ଏହି ଘଟଣାରେ ପୋଲିସ ପକ୍ଷରୁ ଷ୍ଟେଶନଡାଏରି (ଜି ଡି/୧୪) କରାଯାଇଛି।
