ତିଗିରିଆ,୧୫।୨(ଡି.ଏନ୍.ଏ.): ଯାଜପୁର ଜିଲା ନଗଡ଼ାରେ ଶିଶୁ ଅପପୁଷ୍ଟିର ଶିକାର ଘଟଣା ଦିନେ ଗଣମାଧ୍ୟମର ଚର୍ଚ୍ଚାର ବିଷୟ ପାଲଟିଥିଲା। ଏବେ କଟକ ଜିଲାର ତିଗିରିଆ ବ୍ଲକରେ ମଧ୍ୟ ସେଭଳି ଅବସ୍ଥା ଦେଖିବାକୁ ମିଳୁଛି। ଏହି ବ୍ଲକ ଅନ୍ତର୍ଗତ ନୂଆପାଟଣା, ମଝିସାହିର ଶ୍ୱେତବସନ୍ତ ପାତ୍ର ଓ ଟିକିନା ପାତ୍ରଙ୍କ ଛୋଟ ଝିଅକୁ ଦେଖିଲେ ତାହା ସ୍ପଷ୍ଟ ବାରି ହୋଇପଡ଼ୁଛି। ଝିଅଟିର ବୟସ ୯ ବର୍ଷ। ଓଜନ ମାତ୍ର ୬ କିଲୋ। ତା’ର ହାତ ଗୋଡ଼ ସରୁ ହୋଇଯାଇଥିବା ବେଳେ ଠିଆ ହେବାକୁ ବଳ ନାହିଁ। ଫଳରେ ଝିଅଟି ଘୁଷରିବାକୁ ବାଧ୍ୟ ହେଉଛି। ମା’ ବାପାଙ୍କ କହିବାନୁଯାୟୀ, ଜନ୍ମ ପରଠାରୁ ୨ବର୍ଷ ପର୍ଯ୍ୟନ୍ତ ଝିଅର ସ୍ବାସ୍ଥ୍ୟାବସ୍ଥା ଠିକ୍ ଥିଲା। ତେବେ ପରବର୍ତ୍ତୀ ସମୟରେ ଶାରୀରିକ ଅବନତି ଦେଖାଯାଇଥିଲା। ଝିଅର ଚିକିତ୍ସା ନିମନ୍ତେ ଶ୍ୱେତବସନ୍ତ ଚୌଦ୍ୱାରକୁ ଯାଇ ଘରୋଇ ଚିକିତ୍ସା କରିବା ସହ ଓଲଟପୁରସ୍ଥିତ ଶିଶୁଭବନ ଓ କଟକ ବଡ଼ ମେଡିକାଲରେ ଦେଖାଇଥିଲେ। ମାତ୍ର କୌଣସି ସୁଫଳ ମିଳି ନ ଥିଲା। ଶ୍ୱେତବସନ୍ତ ଓ ଟିକିନା ବୁଣାକାର ହୋଇଥିବାବେଳେ ଚିକିତ୍ସା ପାଇଁ ଅଧିକ ସମ୍ବଳ ନାହିଁ। ଏଭଳିସ୍ଥିତିରେ ଘରର ବ୍ୟବହାରିକ ଜିିନିଷ ବିକ୍ରି କରି ଝିଅର ଚିକିତ୍ସା କରାଉଛନ୍ତି। କିନ୍ତୁ ଅବସ୍ଥାରେ ସୁଧାର ଆସୁ ନ ଥିବାରୁ ମା’ ବାପା ଭାଙ୍ଗି ପଡ଼ିଛନ୍ତି।
ଏ ସମ୍ପର୍କରେ ତିଗିରିଆ ବ୍ଲକ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିକାରୀ ଡ. ବିଶ୍ୱବିକାଶ ରାଉତରାୟ କହିଛନ୍ତି, ସରକାରଙ୍କ ନିୟମ ଅନୁଯାୟୀ, ଝିଅକୁ ଚିକିତ୍ସା ସେବା ଯୋଗାଇ ଦେବାକୁ ବ୍ୟବସ୍ଥା କରାଯିବ।