ବାସ୍ତବରେ ହୃଦୟ ଭାଙ୍ଗିବା ଭାରି ଯନ୍ତ୍ରଣାଦାୟକ। ହୃଦୟ ଥରେ ଭାଙ୍ଗିଲେ ଆଉ ଯୋଡ଼ି ହୁଏନା। ଏଥିପାଇଁ ତ ବେଳେବେଳେ ନାନା ଅଘଟଣ ଘଟୁଛି। ସମ୍ପର୍କ ଭାଙ୍ଗିବା ପରେ ପ୍ରେମିକା ହୁଅନ୍ତୁ କି ପ୍ରେମିକ ପ୍ରତିଶୋଧ ପରାୟଣ ହୋଇଉଠନ୍ତି। ଏପରିକି ଯେଉଁ ସାଥୀଙ୍କୁ ସେ ଏତେ ଭଲ ପାଉଥିଲେ ତାଙ୍କୁ ମାରିବାକୁ ବି ପଛାନ୍ତି ନାହିଁ। ସମାଜରେ ଏମିତି ଘଟଣା ପ୍ରତିଦିନ ଘଟିଚାଲିଛି। କିଛି ପ୍ରେମିକା ଅବା ପ୍ରେମିକ ସାଥୀଙ୍କ ପ୍ରତିଶୋଧ ନେବା ପାଇଁ ସୁଯୋଗକୁ ଅପେକ୍ଷା କରି ରହିଥାନ୍ତି। ଠିକ୍ ସେମିତି ଭାଲେଣ୍ଟାଇନ୍ ଡେ’ ଅବସରରେ ଏକ ଘଟଣା ଚାଇନାରେ ଘଟିଛି।
ଚାଇନାର ଜଣେ ଯୁବତୀ ଡେଲିଭରି ବୟ ସହାୟତାରେ ନିଜ ପୂର୍ବ ପ୍ରେମିକଙ୍କ ପ୍ରତିଶୋଧ ନେଇଛନ୍ତି। ଚାଇନାର ଶାଙ୍ଗାଡୋଙ୍ଗରେ ଏହି ଘଟଣା ଘଟିଛି। ଖାଇବା ସାମଗ୍ରୀ ଧରି ଆସିଥିବା ଜଣେ ଡେଲିଭରି ବୟଙ୍କୁ ଯୁବତୀ ଜଣକ ଅଜବ ଅନୁରୋଧ କରିଥିଲେ। ଅର୍ଡରରେ ଏକ କପ୍ ଚା ପହଞ୍ଚାଇବା ପାଇଁ କହିଥିଲେ। ଏହି ଚା’ ସେ ତାଙ୍କ ପୂର୍ବତନ ପ୍ରେମିକଙ୍କ ନିକଟରେ ନେଇ ପହଞ୍ଚାଇବାକୁ କହିଥିଲେ। ଖାଲି ଚା’ ଅର୍ଡର କରି ନ ଥିଲେ ଏହି ଚା’କୁ ସେ ତାଙ୍କ ପ୍ରେମିକଙ୍କ ଉପରେ ଢାଳିବାକୁ ଡେଲିଭରି ବୟଙ୍କୁ ଅନୁରୋଧ କରିଥିଲେ। ଆପଣ ଭାବୁଥିବେ ଡେଲିଭରି ବୟ ଜଣ କେମିତି ଏମିତି କରିବେ? ଏଥିରେ ତାଙ୍କ ଚାକିରି ପ୍ରତି ବିପଦ ବି ରହିବ। ମାତ୍ର ଡେଲିଭର ବୟ ଏସବୁ କଥା ଚିନ୍ତା ନ କରି ଗ୍ରାହକଙ୍କ ଅନୁରୋଧ ରକ୍ଷା କରିବାକୁ ନିଃସ୍ବାର୍ଥପର ଭାବେ ଏପରି କରିଥିଲେ। ଡେଲିଭରି ବୟ ଜଣଙ୍କ ଯୁବତୀଙ୍କ ଅନୁରୋଧ ରକ୍ଷା କରି ତାଙ୍କ ପୂର୍ବତନ ପ୍ରେମିକଙ୍କ ମୁହଁରେ ଗରମ କ୍ଷୀର ଚା’ ଢାଳିଦେଲେ। ପରେ ଉକ୍ତ ଯୁବକଙ୍କୁ ସେ କ୍ଷମା ମଧ୍ୟ ମାଗିଥିଲେ। କହିଥିଲେ, ମୁଁ ଦୁଃଖିତ। ମାତ୍ର ଗ୍ରାହକଙ୍କ ଅନୁରୋଧ ରକ୍ଷା କରିବା ମୋର ପ୍ରଥମ କର୍ତ୍ତବ୍ୟ। ତେଣୁ ମୁଁ ଏପରି କଲି। ଆପଣ ମୋତେ କ୍ଷମା କରିଦେବେ।