ଓ୍ବାଶିଂଟନ,୨୫।୬ : ବିଶ୍ୱ ବଜାର ମାନ୍ଦାବସ୍ଥା ଦେଇ ଗତି କରୁଥିବା ବେଳେ ବଜାର ପ୍ରଭାବିତ ହୋଇ ରହିଛି। ହେଲେ ମାନ୍ଦାବସ୍ଥାର ପ୍ରଭାବ ଯେତିକି ରହିବ ବୋଲି ଆକଳନ କରାଯାଇଥିଲା ତା’ଠାରୁ ସ୍ଥିତି ଏବେ ଅଧିକ ଜଟିଳ ହେଉଥିବା ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ବୁଧବାର ଏହାର ରିପୋର୍ଟରେ ଉଲ୍ଲେଖ କରିଛି। ଏହି ଏଜେନ୍ସି ପୂର୍ବରୁ ଯାହା ପୂର୍ବାନୁମାନ କରିଥିବା ତା’ଠାରୁ ବଜାରକୁ ଅଧିକ କ୍ଷତି ସହିବାକୁ ପଡୁଥିବା କୁହାଯାଇଛି। କରୋନା ମହାମାରୀ ବଜାରରେ ଅନିଶ୍ଚିତତାକୁ ବଢ଼ାଇଥିବା ବେଳେ ବିଶ୍ୱ ଅର୍ଥ ବ୍ୟବସ୍ଥାକୁ ଏହା ଦ୍ୱାରା ଶକ୍ତ ଧକ୍କା ଲାଗିଛି। ଏହି ଭାଇରସ୍ କବଳରୁ ମୁକ୍ତ ହୋଇ ପୁଣି ଥରେ ଛିଡ଼ାହେବାକୁ ବିଶ୍ୱ ବଜାରର ବାଣିଜ୍ୟ ବର୍ତ୍ତମାନ ଉଦ୍ୟମ ଜାରି ରଖିଥିବା କୁହାଯାଇଛି।
କରୋନା ପାଇଁ କରାଯାଇଥିବା ଲକ୍ଡାଉନ କଟକଣାକୁ ବର୍ତ୍ତମାନ ଧୀରେ ଧୀରେ କୋହଳ କରାଯାଉଛି। ହେଲେ କରୋନା ମାମଲା ବଢ଼ି ଚାଲିଥିବା ବେଳେ ଏହାକୁ ଭଲ କରିବା ଲାଗି ଠୋସ୍ ଭ୍ୟାକ୍ସିନ ଏବେ ଯାଏ ଆସିନାହିଁ। ବଜାର କ୍ଷତିଗ୍ରସ୍ତ ସ୍ଥିତିରେ ରହିଛି। ଗ୍ରେଡ୍ ଡିପ୍ରେସନ ପରଠାରୁ ବର୍ତ୍ତମାନର ସ୍ଥିତି ସବୁଠାରୁ ଖରାପ। ଏହା ଦ୍ୱାରା ଅର୍ଥ ବ୍ୟବସ୍ଥାର ଗତି ମନ୍ଥର ହୋଇଯାଇଛି। ଅଭିବୃଦ୍ଧି ସାଂଘାତିକ ଭାବେ ଖସୁଥିବା ରିପୋର୍ଟରେ ଉଲ୍ଲେଖ କରାଯାଇଛି। ଆଇଏମ୍ଏଫ୍ ଏହାର ଓ୍ବାର୍ଲଡ ଇକୋନୋମିକ ଆଉଟଲୁକ୍ରେ କହିଛି ଯେ, ବିଶ୍ୱ ଅର୍ଥ ବ୍ୟବସ୍ଥା ଚଳିତ ଆର୍ଥତ୍କ ବର୍ଷ ୪.୯% ଖସିଯିବ। ଏହା ପ୍ରାୟ ୩% ଖସିବ ବୋଲି ଏହା ଏପ୍ରିଲ ପୂର୍ବାନୁମାନରେ କହିଥିଲା, ଯାହାକୁ ବର୍ତ୍ତମାନ ପରିବର୍ତ୍ତନ କରିଛି। ବର୍ତ୍ତମାନ ସାମାଜିକ ଦୂରତ୍ୱ ନିୟମ ରଖି ସବୁ କାର୍ଯ୍ୟ ସମ୍ପାଦନ ହେଉଛି। ବାଣିଜ୍ୟଗୁଡିକ ବର୍ତ୍ତମାନ ପୂର୍ବ ସ୍ଥିତିକୁ ଫେରି ପାରି ନାହାନ୍ତି। ବୃହତ୍ତ ମାତ୍ରାରେ ନିଯୁକ୍ତି ହ୍ରାସ ହେଉଥିବା ଦେଖାଯାଉଛି। ଏଭଳି ସ୍ଥିତିକୁ ବିଚାର କଲେ ବିଶ୍ୱ ଅର୍ଥ ବ୍ୟବସ୍ଥା ଟ୍ରାକ୍କୁ ଫେରିବା ଧାରା ବହୁତ ଧୀର ରହିଛି। ୨୦୨୧ରେ ବିଶ୍ୱ ଅର୍ଥ ବ୍ୟବସ୍ଥା ୫.୪% ରହିବା ନେଇ ଏହା ପୂର୍ବାନୁମାନ କରିଛି।
ଆମେରିକା ଅର୍ଥ ବ୍ୟବସ୍ଥା ଏହି ସମୟରେ ୮% ଖସିବ ବୋଲି କୁହାଯାଇଛି। ଏହା ଆସନ୍ତା ବର୍ଷ ୪.୫% ଅଭିବୃଦ୍ଧି ହାସଲ କରିବ। ସେହିଭଳି ୟୁରୋଜୋନ୍ରେ ରହିଥିବା ଅର୍ଥ ବ୍ୟବସ୍ଥାଗୁଡିକର ଅଭିବୃଦ୍ଧି ଚଳିତ ବର୍ଷ ୧୦.୨% ଖସିବ। ଆସନ୍ତା ବର୍ଷ ଏହା ୬% ବୃଦ୍ଧି ଘଟିବ। ସେହିଭଳି ଚାଇନା ଅର୍ଥ ବ୍ୟବସ୍ଥା ଚଳିତ ବର୍ଷ ୧% ଏବଂ ଆସନ୍ତା ବର୍ଷ ୮.୨% ଅଭିବୃଦ୍ଧି ହାସଲ କରିବା ନେଇ ରିପୋର୍ଟରେ ଉଲ୍ଲେଖ କରାଯାଇଛି। କରୋନା ଯୋଗୁ ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ବିଶ୍ୱ ବାଣିଜ୍ୟ କାରବାର ୩.୫% ଖସିବା ନେଇ ଆଶଙ୍କା କରାଯାଉଛି। ବିଶ୍ୱ ସ୍ତରରେ ଏହି ସମୟରେ ବାଣିଜ୍ୟ କାରବାର ଗଭୀର ଭାବେ କ୍ଷତିଗ୍ରସ୍ତ ହେବ ବୋଲି ବିଶ୍ୱ ବାଣିଜ୍ୟ ସଙ୍ଗଠନ ପକ୍ଷରୁ କୁହାଯାଇଛି। ପ୍ରଥମ ତ୍ରୈମାସରେ ସାମଗ୍ରୀ କାରବାର ୩% ଏବଂ ଦ୍ୱିତୀୟ ତ୍ରୈମାସରେ ଏହା ୧୮.୫% ଖସିବ ବୋଲି ଆଶଙ୍କା କରାଯାଇଛି।